អង្គជំនុំជម្រះសាលាដំបូង របស់តុលាការខ្មែរក្រហម បានចេញសេចក្តីសម្រេចថា លោកស្រី អៀង ធីរិទ្ធ មិនអាចនាំយកមកកាត់ទោសបានទេ ដោយសារតែអតីតរដ្ឋមន្ត្រីក្រសួងសង្គមកិច្ចខ្មែរក្រហម និងជាភរិយាលោកអៀងសារី មានជំងឺវង្វេងវង្វាន់ មិនអាចនាំមកកាត់ទោសបានឡើយ។
តុលាការសាលាដំបូង ក៏បានសម្រេចដោះលែងលោកស្រី អៀងធីរិទ្ធ។ ការសម្រេចដូច្នេះ បានធ្វើឡើងតែ ៤ថ្ងៃប៉ុណ្ណោះ មុនពេលតុលាការខ្មែរក្រហម បើកសវនាការ ជំនុំជម្រះក្តី លើសំណុំរឿង០០២។
មានអាយុ ៧៩ ឆ្នាំ លោកស្រី អៀង ធីរិទ្ធិ ត្រូវបានតុលាការខ្មែរក្រហម ចោទប្រកាន់ក្នុងរឿងសម្លាប់មនុស្សសម័យខ្មែរក្រហម ក្នុងសំណុំរឿង០០២ ជាមួយនឹងអតីតមេខ្មែរក្រហម ៣ រូបផ្សេងទៀត គឺលោកនួនជា លោកខៀវសំផន និងលោកអៀងសារី។ សំណុំរឿង០០២ នឹងត្រូវតុលាការបើកសវនាការ នាថ្ងៃទី២១វិច្ឆិកា ឆ្នាំ២០១១។
ក្នុងដីកាកម្រាស់ ៣០ ទំព័រ ជាភាសាអង់គ្លេស ចុះថ្ងៃទី១៧វិច្ឆិកា ឆ្នាំ២០១១ អង្គជំនុំជម្រះសាលាដំបូង ក្នុងតុលាការខ្មែរក្រហម ដែលមានចៅក្រម ៥ រូប គឺចៅក្រមជាតិ ៣ រូប និងបរទេស ២ រូប បានឯកភាពរួមគ្នាថា លោកស្រី អៀង ធីរិទ្ធ មិនមានកាយសម្បទាគ្រប់គ្រាន់ ក្នុងការចូលរួមសវនាការបានទេ។ អង្គជំនុំជម្រះសាលាដំបូង ក៏បានសម្រេចដោះលែងលោកស្រីអៀងធីរិទ្ធ ចេញពីពន្ធនាគាររបស់តុលាការខ្មែរក្រហមផងដែរ។
ក៏ប៉ុន្តែក្នុងសេចក្តីសម្រេច ដែលចុះហត្ថលេខាដោយលោកចៅក្រម និល ណុល ប្រធានអង្គជំនុំជម្រះសាលាដំបូង បានកំណត់ថា ទោះបីអង្គជំនុំជម្រះសម្រេចមិនកាត់ទោសលើលោកស្រី អៀង ធីរិទ្ធ តែមិនមែនបញ្ចប់ការចោទប្រកាន់ប្រឆាំងលោកស្រីអៀងធីរិទ្ធឡើយ។ តុលាការអាចនឹងបំបែកការចោទប្រកាន់ប្រឆាំងលោកស្រី អៀង ធីរិទ្ធ ចេញពីសំណុំរឿង០០២ និងដោះលែងលោកស្រី ឲ្យនៅក្រៅឃុំ ស្ថិតនៅក្រោមការត្រួតពិនិត្យរបស់តុលាការ។
ចំពោះការសម្រេចខាងលើនេះ ត្រូវបានលោក នេត្រ ភក្ត្រា អ្នកនាំពាក្យសាលាក្តីខ្មែរក្រហម បញ្ជាក់ថា ការសម្រេចរបស់អង្គជំនុំជម្រះសាលាដំបូងខាងលើនេះ មិនមែនមានន័យថា គេដោះលែងលោកស្រីអៀងធីរិទ្ធ ចេញពីបន្ទប់ឃុំឃាំងភ្លាមៗនោះទេ។ បើតាមនីតិវិធី សហព្រះរាជអាជ្ញា មានពេល ២៤ ម៉ោង គិតចាប់ពីពេលតុលាការចេញដីកា នៅម៉ោង ១៧ និង ២០ នាទី ថ្ងៃទី១៧វិច្ឆិកា ឆ្នាំ២០១១ ដើម្បីដាក់ពាក្យបណ្តឹងឧទ្ធរណ៍ទៅកាន់អង្គជំនុំជម្រះតុលាការកំពូល។ តុលាការកំពូល មានពេល ៤៨ ម៉ោង ក្នុងការសម្រេចចិត្ត ថាតើទទួលយកបាន ឬទេ ចំពោះបណ្តឹងឧទ្ធរណ៍នោះ។
លោក នេត្រ ភក្ត្រា ក៏បានបន្ថែមថា អង្គជំនុំជម្រះតុលាការកំពូល មានរយៈពេល ១៥ ថ្ងៃ ក្នុងការសម្រេចលើពាក្យបណ្តឹងឧទ្ធរណ៍របស់សហព្រះរាជអាជ្ញា ដែលជំទាស់នឹងការសម្រេចរបស់អង្គជំនុំជម្រះសាលាដំបូង។ ដូច្នេះទោះបីជាអង្គជំនុំជម្រះសាលាដំបូង បានសម្រេចឲ្យមានការដោះលែងលោកស្រី អៀង ធីរិទ្ធ ក្តី តែមកដល់ពេលនេះ មិនទាន់មានការដោះលែងលោកស្រីអៀងធីរិទ្ធទេ ដោយរង់ចាំនីតិវិធីសិន។
សូមរម្លឹកថា លោកស្រី អៀងធីរិទ្ធ ត្រូវបានក្រុមគ្រូពេទ្យឯកទេសមនុស្សចាស់ និងវិកលវិទ្យាពីរក្រុម ជាតិ និងអន្តរជាតិ បានវាយតម្លៃលើកាយសម្បទា និងបញ្ញាស្មារតីរបស់លោកស្រីចំនួនពីរលើកមកហើយ។ តុលាការខ្មែរក្រហម ក៏បានបើកសវនាការលើបញ្ហាសុខភាព និងកាយសម្បទារបស់លោកស្រី អៀង ធីរិទ្ធ នៅខែសីហា និងខែតុលា ឆ្នាំ២០១១។ ក្រុមគ្រូពេទ្យបានរកឃើញស្រដៀងគ្នាថា លោកស្រី អៀង ធីរិទ្ធ អាយុ ៧៩ ឆ្នាំ មានបញ្ហាស្មារតី ដែលវង្វេងវង្វាន់ ចាំមុខ ភ្លេចក្រោយ និងមិនអាចចូលរួមសវនាការកាត់ទោសបានទេ៕
CEN
No comments:
Post a Comment
yes