ក្មេងស្រី ដែលរងគ្រោះ ដែលឃាតករអារកសម្លាប់ តែមិនស្លាប់ ហើយនិយាយមិនទាន់ចេញខាងលើ មានឈ្មោះ អ៊ឹង អ៊ីលួង អាយុ ១៥ឆ្នាំ ជាសិស្សរៀននៅវិទ្យាល័យអង្គរ ថ្នាក់ទី១១ មានទីលំនៅកន្លែងកើតហេតុភូមិចុងកៅស៊ូ សង្កាត់ ស្លក្រាម ក្រុង-ខេត្ដសៀមរាប។
លោក ថៃ ម៉េង អាយុ ៦១ឆ្នាំ មានទីលំនៅភូមិចុងកៅស៊ូ សង្កាត់ស្លក្រាម ក្រុង-ខេត្ដសៀមរាប បាននិយាយថា ក្មួយរបស់គាត់ឈ្មោះ អ៊ឹង អ៊ីលួង បន្ទាប់ពីរងរបួសបំពង់កជាទម្ងន់ សល់ពីការស្លាប់ ត្រូវបានបញ្ជូនទៅកាន់មន្ទីរពេទ្យកាល់ម៉ែត ដើម្បីធ្វើការព្យាបាល បន្ទាប់ពីសង្គ្រោះបន្ទាន់នៅពេទ្យបង្អែកខេត្ដសៀមរាប អស់មួយរយៈ។
លោក ថៃ ម៉េង បានបន្ដថា ក្មួយរបស់គាត់នៅពេលនេះ មុខរបួសត្រង់បំពង់កបានជាសះស្បើយស្ទើរអស់ទៅហើយ ប៉ុន្ដែបន្ដស្នាក់នៅមន្ទីរពេទ្យថែមទៀត ព្រោះថា ស្ថានភាពនិយាយ គឺក្មេងរងគ្រោះ មិនទាន់និយាយបាននៅឡើយ ដែលករណីនេះ គ្រូពេទ្យបានប្រាប់ថា អាចមានថេរវេលាពី ៨ខែ ទៅ ១ឆ្នាំឯណោះ ទើបអាចនិយាយកើត។
តាមការបញ្ជាក់របស់ឪពុកធំក្មេងរងគ្រោះ រូបនាងនៅតែមានការភិតភ័យ ហើយមានការតក់ស្លុតនៅឡើយ បន្ទាប់ពីដឹងថា ម្ដាយរបស់នាង និងបងស្រីបង្កើតម្នាក់ទៀត ត្រូវបានស្លាប់ក្នុងអំពើឃាតកម្មដ៏សាហាវមួយនេះ លើក្រុមគ្រួសាររបស់នាង ដែលកើតចេញពីកម្មករទឹកសុទ្ធចំនួន ៦នាក់ បានរួមគំនិតគ្នា សម្លាប់ផ្តាច់ពូជ។
លោក ថៃ ម៉េង បាននិយាយថា ក្រោយពីផ្ទះកើតហេតុ ដែលជាទីតាំងផលិតទឹកសុទ្ធរបស់ប្អូនស្រីគាត់ ខាងសមត្ថកិច្ចតុលាការ បានបិទបណ្ដោះអាសន្ន ចំពោះទីតាំងផលិតទឹកសុទ្ធ ដើម្បីធ្វើការស្រាវជ្រាវស៊ើបអង្កេត។
លោកបន្ដថា ប៉ុន្មានថ្ងៃមុន លោក និងបងប្អូនជាច្រើនទៀត បានឯកភាពគ្នា ហើយក៏បានសុំទៅតុលាការ ដើម្បីបើកផ្ទះកើតហេតុឡើងវិញ ប៉ុន្ដែខាងតុលាការមិនទាន់អនុញ្ញាតនៅឡើយ។ ករណីនេះដែរ ខាងក្រុមគ្រួសារសាច់ញាតិ ក៏បានឯកភាពគ្នាម្ដងទៀតថា នឹងធ្វើពាក្យជាលាយល័ក្ខអក្សរធ្វើទៅកាន់តុលាការម្ដងទៀត នៅព្រឹកថ្ងៃទី១៧ ខែវិច្ឆិកានេះ ដើម្បីឲ្យតុលាការអនុញ្ញាតបើកផ្ទះនោះឡើងវិញ ដើម្បីរៀបចំទុកសម្រាប់ការវិលត្រឡប់របស់ក្មួយស្រី ដែលរងគ្រោះមកស្នាក់នៅជាមួយនឹងបងប្អូនឯទៀត។
ពាក់ព័ន្ធនឹងការត្រឡប់មកពីពេទ្យមកវិញរបស់ក្មេងរងគ្រោះឈ្មោះ អ៊ឹង អ៊ីលួង ត្រូវបានឪពុកធំរូបនោះ បញ្ជាក់ថា មិនដឹងថា ត្រូវឲ្យនាងបើកនូវរបរទឹកសុទ្ធឡើងវិញ ឬយ៉ាងណាឡើយ។ ចំពោះការរស់នៅមិនដឹងថា ឱ្យក្មួយរបស់គាត់ទៅរស់នៅក្នុងផ្ទះនោះវិញ ហើយបងប្អូនទៅរស់នៅជាមួយ ឬក៏យកក្មេងស្រីរងគ្រោះមកនៅជាមួយបងប្អូន ឬយ៉ាងណានោះឡើយ។ ករណីនេះនឹងធ្វើការពិភាក្សាជាមួយបងប្អូនជាច្រើននាក់ទៀតនៅពេលក្រោយ។
សូមបញ្ជាក់ថា កាលពីម៉ោងពាក់កណ្ដាលអធ្រាត្រ ថ្ងៃទី៣១ ខែតុលា ឆ្នាំ២០១១ ស្ថិតនៅសិប្បកម្មផលិតទឹកសុទ្ធ ក្នុងភូមិចុងកៅស៊ូ សង្កាត់ស្លក្រាម ក្រុង-ខេត្ដសៀមរាប មានករណីឃាតកម្មដ៏សាហាវមួយ ដែលជនរងគ្រោះជាថៅកែទឹកសុទ្ធនៅសៀមរាប និងកូនស្រីចំនួនពីរនាក់ ត្រូវបានកម្មកររបស់ខ្លួនរៀបចំគម្រោងសម្លាប់ ដើម្បីប្លន់យកទ្រព្យសម្បត្ដិ ប៉ុន្ដែក្នុងនោះ មានកូនស្រីម្នាក់ត្រូវអារកជិតដាច់ហើយរត់រួចខ្លួន។ ក្រោយពីប្លន់សម្លាប់បានសម្រេចហើយ ជនដៃដល់ចំនួន ៦នាក់ បានយករថយន្ដតូចមួយគ្រឿងរបស់ថៅកែ ជិះគេចខ្លួនរួមគ្នាទៅខេត្ដបាត់ដំបង តែត្រូវសមត្ថកិច្ចនគរបាល និងអាវុធហត្ថតាមចាប់ខ្លួនបានទាំង ៦នាក់ នៅខេត្ដបាត់ដំបង។
ស្ដ្រីថៅកែទឹកសុទ្ធ និងកូនស្រីត្រូវឃាតករសម្លាប់បានសម្រេចនោះ គឺម្ដាយមានឈ្មោះ ថៃ លីហួរ អាយុ ៤៤ឆ្នាំ និងកូនស្រីច្បងឈ្មោះ អ៊ឹង អ៊ីឈីវ អាយុ ២០ឆ្នាំ។ ម្ដាយ និងកូនស្រី ត្រូវបានឃាតករចំនួន ៦នាក់ សម្លាប់នៅក្នុងបន្ទប់របស់ខ្លួន ដោយវិធីអារផ្ដាច់បំពង់ក និងមានស្នាមវាយបន្ថែមទៀត។
ក្នុងអំពើឃាតកម្មនោះដែរ ជនទី៣ គឺជាកុមារីរងគ្រោះឈ្មោះ អ៊ឹង អ៊ីលួង អាយុ ១៥ឆ្នាំ ត្រូវបានអារក្នុងគោលបំណងផ្ដាច់បំពង់កដូចម្ដាយ និងបងស្រីរបស់នាងដែរ។ ប៉ុន្ដែក្នុងហេតុការណ៍នោះ កុមារី អ៊ឹង អ៊ីលួង បានរើបម្រាស់ចេញពីក្រញាំដៃឃាតករ ហើយរត់ចេញមកក្រៅផ្ទះ និងបានយកទូរស័ព្ទបញ្ជូនសារទៅឱ្យបងប្អូនប្រាប់ពីសកម្មភាព នៃក្រុមគ្រួសារ នាងត្រូវបានក្រុមកម្មករទឹកសុទ្ធបានសម្លាប់។
នៅពេលចេញមកក្រៅកុមារី អ៊ឹង អ៊ីលួង ត្រូវបានរងរបួសជាទម្ងន់ ហើយក៏ត្រូវបានគេបញ្ជូនមកកាន់មន្ទីរពេទ្យខេត្ដសៀមរាប ហើយសង្គ្រោះបន្ទាន់ភ្លាមៗនោះដែរ ទើបជីវិតនាងបានសល់ពីការស្លាប់តែម្នាក់ឯងគត់ក្នុងគ្រួសារ។ ហើយពេលនេះ នាងបានក្លាយជាក្មេងកំព្រាថែមទៀតផង។
ដោយឡែកឃាតករទាំង ៦នាក់ ដែលចាប់បាននៅខេត្ដបាត់ដំបង គឺមានម្នាក់ជាកូនចិញ្ចឹមរបស់ស្ដ្រីថៅកែទឹកសុទ្ធ នោះផងដែរ។ កូនចិញ្ចឹមនោះឈ្មោះ ប៉ុក ហ៊ីត ភេទប្រុស អាយុ២០ឆ្នាំ។ និងអ្នកទាំង ៥នាក់ ដែលចាប់ខ្លួនបាននោះមាន ឈ្មោះ លាង ដួង ភេទប្រុស អាយុ ២៤ឆ្នាំ, ឈ្មោះ កែវ សុខនី ហៅភ័ក្ដ្រ ភេទប្រុស អាយុ២០ឆ្នាំ, ឈ្មោះ ឃី វ៉ាន់ណី ភេទប្រុស អាយុ ១៦ឆ្នាំ, ឈ្មោះ រស់ បូរី ភេទប្រុស អាយុ ២៣ឆ្នាំ និងឈ្មោះ កុយ ភេទប្រុស អាយុ ២២ឆ្នាំ។ ជនដៃដល់ទាំង៦ ពេលនេះកំពុងត្រូវបានឃុំខ្លួនបណ្ដោះអាសន្ននៅពន្ធនាគារខេត្ដសៀមរាប។
មូលហេតុដែលឈានដល់សម្លាប់ក្រុមគ្រួសារថៅកែទឹកសុទ្ធ ផ្ដាច់ពូជខាងលើ គឺកើតឡើងដោយសាររឿងបន្ដិចបន្ដួច ព្រោះថា មុនថ្ងៃកើតហេតុថៅកែស្រីទឹកសុទ្ធ បានឱ្យកូនចិញ្ចឹម និងបក្ខពួកផ្សេងទៀតដឹកទឹកសុទ្ធទៅឱ្យម៉ូយចំនួន ២៥០យួរ។ ក្រោយពីត្រឡប់មកដល់ផ្ទះវិញ ថៅកែស្រីបានសួរអំពីលុយដែលដឹកទឹកសុទ្ធទៅ បានទូទាត់ពីម៉ូយមកវិញ ឬនៅ។ ករណីនោះ ជនដែលជាកូនចិញ្ចឹមឈ្មោះ ប៉ុក ហ៊ីត គេថា មិនទាន់បានទូទាត់ធ្វើឲ្យថៅកែស្រីស្ដីឱ្យបន្ដិចបន្ដួចពីរបៀបរកស៊ី។
ប៉ុន្ដែនៅម៉ោង ៧យប់ មុនម៉ោងកើតហេតុ ឈ្មោះ ប៉ុក ហ៊ីត បានទិញស្រាបៀរយកមកផឹកជុំជាមួយកម្មករ ៥នាក់ផ្សេងទៀត ហើយក៏រៀបចំគម្រោងសម្លាប់ថៅកែ និងកូនៗទាំង ២នាក់នោះឡើង។ រហូតដល់ពាក់កណ្ដាលយប់គម្រោងក៏ត្រូវបានចាប់ផ្ដើមឡើង ហើយថៅកែ និងកូនស្រីច្បងត្រូវបានសម្លាប់ដូចបំណង និងកូនស្រីពៅរងរបួសធ្ងន់នៅមានជីវិត។ ប៉ុន្ដែឃាតករឈាមស្រែកស្បែកហៅ មិនអាចគេចផុតពីសំណាញ់ច្បាប់បានឡើយ។ ទីបំផុតទាំង៦នាក់ ដែលរត់ទៅខេត្ដបាត់ដំបង តាមរយៈមធ្យោបាយឡានកូរ៉ូឡារបស់ម្ចាស់ផ្ទះមួយគ្រឿង ដែលពួកវាជិះយកទៅត្រូវបានក្រុមសមត្ថកិច្ចកងរាជអាវុធហត្ថ និងកងនគរបាលជាតិខេត្ដបាត់ដំបង ចាប់បានជាបន្ដបន្ទាប់៕
CEN
No comments:
Post a Comment
yes