ពលរដ្ឋនៅភូមិកោះគ ឃុំរកាខ្ពស់ ស្រុកស្អាង ខេត្តកណ្ដាល ឲ្យដឹងនៅថ្ងៃទី២៧ វិច្ឆិកាថា ផ្លូវជាតិលេខ២១ ដែលនៅមិនឆ្ងាយពីផ្ទះនាយករដ្ឋមន្ត្រី ហ៊ុន សែន ក្នុងខេត្តកណ្ដាល កំពុងរងការខូចខាតយ៉ាងខ្លាំង ដោយរថយន្តដឹកជញ្ជូនបានដឹកសម្ភារៈសំណង់ចេញពីកំពង់ដរ ភូមិកោះគ ឆ្លងកាត់។
ពលរដ្ឋម្នាក់ទៀតបន្ថែមថា ក្នុង១ថ្ងៃរថយន្តក្រុមហ៊ុន ដែលគាត់មិនបានដឹងឈ្មោះក្រុមហ៊ុនជាផ្លូវការពិតប្រាកដ តែលើឡានពាក់រូបសញ្ញានាគក្បាលខៀវ បើកបរប្រមាណ ២០គ្រឿងដឹកសម្ភារៈសំណង់ មានស៊ីម៉ងត៍ ដែក ឥដ្ឋការ៉ូ ដឹកលើសទម្ងន់ច្រើនតោនលើផ្លូវលេខ២១ នោះ ធ្វើឲ្យផ្លូវស្រុតយ៉ាងខ្លាំង។ សូម្បីតែអ្នកធ្វើដំណើរ ដឹកបន្លែចេញចូលក៏លំបាកខ្លាំងច្រើនកន្លែង ក្នុងចម្ងាយផ្លូវដីប្រមាណ ៩គីឡូម៉ែត្រនោះ ៖ "៧-៨ម៉ែត្រ មួយកន្លែងទៅវាស្រុតដុំៗ មកតាមមុខវត្តឈូងលាបហ្នឹង ប្រហែល ១០០ម៉ែត្រ ផ្អៀងមួយចំហៀងតែម្ដង ផ្អៀងខាងស្ដាំបើយើងទៅពីខាងនេះទៅ វានៅខាងស្ដាំ វាខូចផ្លូវ ផ្លូវកាលពីទឹកឡើងហ្នឹងវាដីរាងសើមនោះ ម្ល៉ោះហើយវាស្រុត។ វាស្រុតមួយដុំៗ កន្លែងណាដែលវារាងជោរទឹក វារាងស្រុតបន្តិចទៅ។ ស្រុតឡានតូចអីបើកពិបាក... ម៉ូតូដឹកបន្លែអីរវល់តែដួលវាកោសទ្រូង"។
មេឃុំរកាខ្ពស់ ស្រុកស្អាង ខេត្តកណ្ដាល លោក ឈឿង ឆូ ឲ្យដឹងថា សេចក្ដីជូនដំណឹងរបស់មន្ទីរសាធារណការខេត្តកណ្ដាលបានឲ្យអាជ្ញាធរឃុំជូនលិខិតទៅក្រុមហ៊ុនដឹកសម្ភារៈសំណង់នោះឲ្យបញ្ឈប់ការដឹកជញ្ជូន ពីព្រោះផ្លូវត្រូវជួសជុលនៅពេលខាងមុខ។ ម្យ៉ាងទៀត ការចូលចតទូកដឹកសម្ភារៈសំណង់ពីប្រទេសវៀតណាម កាត់តាមភូមិកោះគនោះ មិនគួរនឹងមានទៀតឡើយ ហើយខាងក្រុមហ៊ុនគេថានឹងផ្អាកការដឹកជញ្ជូននៅក្នុងសប្ដាហ៍ក្រោយនេះ ៖ "ព្រោះគេឲ្យដឹកជញ្ជូនមូលគ្នាទៅខាងសាលាស្រុក ឬក៏ដូចជាតាមចំណតគេធំៗ ឯណោះវិញ"។
ប្រជាពលរដ្ឋខេត្តកណ្ដាលឲ្យដឹងថា ផ្លូវជាតិលេខ២១ តភ្ជាប់ពីភ្នំពេញទៅក្រុងតាខ្មៅ និងឆ្ពោះទៅកាន់ព្រំដែនវៀតណាម កាត់តាមស្រុកកោះធំ តាមផ្លូវមាត់ទន្លេបាសាក់។ ផ្លូវនោះបានបែកជា២ ត្រង់បន្ទាយទួលក្រសាំង ហួសមុខផ្ទះនាយករដ្ឋមន្ត្រី បត់ចូលស្វាយរលំ និងឃុំសិត្បូ កាត់ត្រង់ទៅឃុំរកាខ្ពស់តែម្ដង។ ពលរដ្ឋបានឲ្យដឹងថា ផ្លូវលេខ២១ នោះ ពីមុនគឺលោក ឌុល កឿន នាយទាហានផ្ដួចផ្ដើមកសាង ដោយបានរៃប្រាក់ពីសប្បុរសជនបានជួយសង់ផ្លូវ ទើបពលរដ្ឋមានផ្លូវល្អ ងាយធ្វើដំណើរកន្លងមក៕
វិទ្យុ អាស៊ីសេរី
No comments:
Post a Comment
yes