ក្នុងសន្និសីទកាសែត នៅផ្ទះរបស់លោក នៅជ្រោយចង្វារ កាលពីព្រឹកថ្ងៃទី១៧វិច្ឆិកា ឆ្នាំ២០១១ លោក ញឹក ប៊ុនឆៃ អតីតអ្នកជំនិតរបស់សម្តេចក្រុមព្រះ នរោត្តម រណឫទ្ធិ បានលើកឡើងថា សមាជគណបក្សហ្វ៊ុនស៊ិនប៉ិច ថ្ងៃទី១៨តុលា ឆ្នាំ២០០៦ ខុសច្បាប់ទេ។ ផ្ទុយទៅវិញសមាជនោះ ដើម្បីដោះស្រាយបញ្ហាផ្ទៃក្នុងរបស់គណបក្សហ្វ៊ុនស៊ិនប៉ិច និងអំពើពុករលួយ ក្នុងគណបក្សហ្វ៊ុនស៊ិនប៉ិចប៉ុណ្ណោះ។
ជាមួយនឹងការលើកឡើងដូច្នេះ លោក ញឹក ប៊ុនឆៃ ក៏បានលាតត្រដាងព្រឹត្តិការណ៍បង្ហូរឈាមរវាងកងទ័ពគាំទ្រគណបក្សហ្វ៊ុនស៊ិនប៉ិច និងកងទ័ពគាំទ្រគណបក្សប្រជាជនកម្ពុជារបស់សម្តេចហ៊ុនសែន កាលពីថ្ងៃទី៥ និងថ្ងៃទី៦កក្កដា ឆ្នាំ១៩៩៧។ ជាព្រឹត្តិការណ៍ ដែលលោក ញឹក ប៊ុនឆៃ ចាត់ទុកថា បង្កើតឡើងដោយសម្តេចក្រុមព្រះ នរោត្តម រណឫទ្ធិ។
លោក ញឹក ប៊ុនឆៃ បានលើកឡើងថា សម្តេចក្រុមព្រះ នរោត្តម រណឫទ្ធិ បានឲ្យលោក ទៅទាក់ទងជាមួយនឹងលោកខៀវសំផន លោកនួនជា និងតាម៉ុក នៅក្នុងព្រៃ ដើម្បីនាំយកកងកម្លាំងខ្មែរក្រហម ចូលមកប្រយុទ្ធជាមួយនឹងកងទ័ពរបស់សម្តេចហ៊ុនសែន។ ការបង្ហូរឈាមនោះ ក៏ដោយសារតែសម្តេចក្រុមព្រះ នរោត្តម រណឫទ្ធិ ដែលកាលណោះជានាយករដ្ឋមន្ត្រីទី១ ក្តាប់ព័ត៌មានមិនច្បាស់អំពីការបែងចែកកូត្តានៅថ្នាក់ស្រុកចំនួន ៥០ % រវាងគណបក្សហ្វ៊ុនស៊ិនប៉ិច និងគណបក្សប្រជាជនកម្ពុជា។ ពេលនោះ សម្តេចក្រុមព្រះ ក៏បានប្រកាសដកខ្លួនពីរដ្ឋាភិបាលចម្រុះ រវាងគណបក្សហ្វ៊ុនស៊ិនប៉ិច និងគណបក្សប្រជាជនកម្ពុជា។
លោក ញឹក ប៊ុនឆៃ ក៏បានបញ្ជាក់ថា សមាជគណបក្សហ្វ៊ុនស៊ិនប៉ិច នៅថ្ងៃទី១៨តុលា ឆ្នាំ២០០៦ ក៏បានធ្វើឡើង ខណៈដែលសម្តេចក្រុមព្រះ នរោត្តម រណឫទ្ធិ បានគេចវេស បដិសេធម្តងជាពីរដង មិនចេញមុខដោះស្រាយជម្លោះជាមួយសម្តេចនាយករដ្ឋមន្ត្រី ហ៊ុនសែន លើព្រឹត្តិការណ៍បង្ហូរឈាម ថ្ងៃទី៥ និងថ្ងៃទី៦កក្កដា ឆ្នាំ១៩៩៧។
សូមរម្លឹកថា ប្រតិកម្មរបស់លោក ញឹក ប៊ុនឆៃ ដែលសព្វថ្ងៃជាប្រធានគណបក្សហ្វ៊ុនស៊ិនប៉ិច ខាងលើនេះ បានធ្វើឡើងមួយក្រោយពីសម្តេចក្រុមព្រះ នរោត្តម រណឫទ្ធិ បានប្រកាសជាថ្មី កាលពីខួប ៥ ឆ្នាំ ថ្ងៃបង្កើតគណបក្សនរោត្តមរណឫទ្ធិ កាលពីថ្ងៃទី១៦វិច្ឆិកា ឆ្នាំ២០១១។ ក្នុងពិធីជួបជុំនោះ សម្តេចក្រុមព្រះ បានរម្លឹកឡើងវិញ ពីការបណ្ថេញព្រះអង្គ ចេញពីប្រធានហ្វ៊ុនស៊ិនប៉ិច តាមរយៈសមាជថ្ងៃទី១៨តុលា ឆ្នាំ២០០៦ ដែលព្រះចាត់ទុកជា បក្សប្រហារ បង្កើតឡើងដោយក្រុមរបស់លោក ញឹក ប៊ុនឆៃ និងលោក កែវ ពុទ្ធរស្មី៕
CEN
No comments:
Post a Comment
yes