ភ្នំពេញ៖ លោក សុខ រឿន ព្រះរាជអាជ្ញារងអមសាលាដំបូងរាជធានីភ្នំពេញ កាលពីរសៀលថ្ងៃទី៣ ខែកុម្ភៈ ឆ្នាំ២០១២ បានធ្វើលិខិតជម្រាបជូនទៅលោកស្រី មូរ សុខហួរ អ្នកតំណាងរាស្ត្រគណបក្សសម រង្ស៊ី ឱ្យបញ្ជាក់ពីទីលំនៅច្បាស់លាស់ ហើយសូមភ្ជាប់លិខិតនោះមកតុលាការដើម្បីពិនិត្យសម្រេច ដោយយោងតាមមាត្រា ៥៣៧ នៃក្រមនីតិវិធីព្រហ្មទណ្ឌ។
សូមរម្លឹកថា កាលពីព្រឹកថ្ងៃទី១៧ ខែមករា ឆ្នាំ២០១២ លោកស្រី មូរ សុខហួរ បានដាក់ពាក្យស្នើសុំបែបបទតាមនីតិវិធី ដើម្បីឱ្យមានការផ្តល់នីតិសម្បទាតាមផ្លូវតុលាការ ប្រយោជន៍ដើម្បីទទួលបានអភ័យឯកសិទិ្ធឡើងវិញ។ ប៉ុន្តែដោយសារលោក សុខ រឿន អវត្តមាន គឺពុំមានមន្ត្រីតុលាការណាម្នាក់ ហ៊ានទទួលយកលិខិតស្នើសុំនីតិសម្បទាពីលោកស្រីឡើយ។ នៅរសៀលថ្ងៃទី១៧ ខែមករា ឆ្នាំ២០១២ លោកស្រី មូរ សុខហួរ បានឱ្យជំនួយការរបស់លោកស្រីមកដាក់ពាក្យជំនួស។ រហូតមកដល់រសៀលថ្ងៃទី១៨ ខែមករា ឆ្នាំ២០១២ ទើបលោក សុខ រឿន ព្រះរាជអាជ្ញារងអមសាលាដំបូងរាជធានីភ្នំពេញ បានទទួលយកលិខិតសុំនីតិសម្បទា និងឯកសារពាក់ព័ន្ធមួយចំនួនទៀត ពីលេខារបស់លោកស្រី មូរ សុខហួរ។
ក្នុងលិខិតរបស់លោកស្រី បានជម្រាបជូនទៅលោកព្រះរាជអាជ្ញាថា ការអនុវត្តទោសលើរូបលោកស្រីបានចប់ជាស្ថាពរហើយ កាលពីខែកញ្ញា ឆ្នាំ២០១០ កន្លងទៅ តាមរយៈការអនុវត្តដោយបង្ខំ ដោយកាត់ប្រាក់បៀវត្សរ៍ និងប្រាក់បំណាច់ផ្សេងៗរបស់លោកស្រី នៅរដ្ឋសភា។
អនុលោមតាមក្រមនីតិវិធីព្រហ្មទណ្ឌ នៃព្រះរាជាណាចក្រកម្ពុជា លោកស្រី មូរ សុខហួរ អាចស្នើសុំតាមរយៈព្រះរាជអាជ្ញា ដែលមានសមត្ថកិច្ចខាងដែនដី ឱ្យសភាព្រហ្មទណ្ឌនៃសាលាឧទ្ធរណ៍ ផ្តល់នីតិសម្បទាឡើងវិញតាមផ្លូវតុលាការ ក្នុងរយៈពេលមួយឆ្នាំ ក្រោយពេលអនុវត្តទោសរួចរាល់ហើយ ពោលគឺនៅខែកញ្ញា ឆ្នាំ២០១១៕
No comments:
Post a Comment
yes