 |
បន្ទាយមានជ័យ: មានអំពើហិង្សាមួយ បានកើតឡើង នៅវេលាម៉ោង ១២ ថ្ងៃត្រង់ ថ្ងៃទី២៤ ខែកុម្ភៈ ឆ្នាំ២០១២ ដោយសារប្រជាពលរដ្ឋចំនួនជាង ២០០ នាក់ មកពីភូមិចំនួន ៨ ក្នុងឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ និងឃុំអំពិល ស្រុកបន្ទាយអំពិល ខេត្តឧត្តរមានជ័យ បានប្រមូលផ្តុំគ្នាទៅឃាត់គ្រឿងចក្រ ចូក និងឈូសឆាយដីព្រៃចំនួន ១៧ គ្រឿង។
គ្រឿងចក្រទាំងនោះ ជាអ្នកស៊ីឈ្មួលឈូសឆាយដីសម្បទានសេដ្ឋកិច្ច ដែលរាជរដ្ឋាភិបាលប្រគល់ឲ្យក្រុមហ៊ុនជាតិអភិវឌ្ឍន៍ ក្នុងចំណោមដី ៦.០០០ ហិចតា នៅចំណុចចន្លោះភូមិធ្លក ឃុំបន្ទាយឆ្មារ និងឃុំអំពិល ស្រុកបន្ទាយអំពិល ក្បែរព្រំដែនកម្ពុជា-ថៃ។
ក្នុងហេតុការណ៍នោះ ក្រុមប្រជាពលរដ្ឋ ដែលមានកំហឹងបានទាស់សំដីជាមួយអ្នកស៊ីឈ្មួលឈូសឆាយដីព្រៃសម្បទាន ឲ្យក្រុមហ៊ុនជាតិអភិវឌ្ឍន៍ កាលពីថ្ងៃទី២៣ ខែកុម្ភៈ ម្តងរួចមកហើយ ហើយបញ្ជាឲ្យអ្នកឈូសឆាយដីឲ្យក្រុមហ៊ុនបញ្ឈប់ការឈូសឆាយដីព្រៃ ព្រោះវាបានធ្វើប៉ះពាល់ដីស្រែរបស់ពួកគាត់។
ចំណែកអ្នកការពារដីព្រៃនេះ បាននិយាយថា ពួកគាត់មិនអាចបញ្ឈប់បានទេ ព្រោះពួកគាត់ឈូសឆាយដីសម្បទានឲ្យក្រុមហ៊ុនជាតិអភិវឌ្ឍន៍ ហើយបានទាស់ពាក្យសំដីគ្នា រហូតដល់ថ្ងៃទី២៤ ខែកុម្ភៈ ឆ្នាំ២០១២ ក្រុមប្រជាពលរដ្ឋក៏បាននាំគ្នាជាង ២០០ នាក់ មកតវ៉ាសារជាថ្មីនៅកន្លែងឈូសឆាយដីព្រៃនេះ។
ក្រុមប្រជាពលរដ្ឋប្រដាប់ដោយចប កាំបិត និងចំពាមកៅស៊ី។ ចំណែកឯខាងអ្នកការពារដីសម្បទានមានគ្នា ៤ នាក់ ស្លៀកពាក់ ដូចទាហាន មានកាំភ្លើងអាកាចំនួន ២ដើម ក្នុងនោះមានម្នាក់បានបាញ់គំរាមប្រជាពលរដ្ឋចំនួន៣គ្រាប់ ដើម្បីកុំឲ្យប្រជាពលរដ្ឋចូលមកជិតគ្រឿងចក្រហើយបានរំដោះរត់គេចខ្លួនបាត់ទៅ។
អ្នកបាញ់កាំភ្លើងនោះ ឈ្មោះ ម៉ុង ជាទាហាននៅវរសេនាតូចលេខ៥០៥ យោធាខេត្តបន្ទាយមានជ័យ។
ពាក់ព័ន្ធករណីនេះ លោក ប្លែក វារី អភិបាលស្រុកថ្មពួក បាននិយាយថា ករណីនេះក្រុមហ៊ុនជាតិអភិវឌ្ឍន៍ បានឈូសឆាយលើដីក្រុមហ៊ុនគេទេ មិនបានឈូសប៉ះទៅលើដីប្រជាពលរដ្ឋទេ ប៉ុន្តែកាលពីពេលកន្លងមកក្រុមហ៊ុនបានឈូសឆាយធ្វើឲ្យប៉ះពាល់ដីស្រែប្រជាពលរដ្ឋ ដែលធ្វើនៅចន្លោះព្រៃ ហើយក្រោយមកខាងក្រុមហ៊ុនបានទៅលើកយកឈើរបស់គេវិញ និងសម្របសម្រួលជាមួយប្រជាពលរដ្ឋ ដើម្បីជៀសវាងមានទំនាស់ណាមួយកើតឡើង។
លោក ប្លែក វារី បានបន្តថា លោកបានទទួលព័ត៌មានពីនគរបាលថា ក្រុមប្រជាពលរដ្ឋបានទៅព័ទ្ធគ្រឿងចក្ររបស់ក្រមហ៊ុន ហើយសន្តិសុខមានការភ័យខ្លាច ក៏បាញ់គំរាមឡើងលើមេឃ ដើម្បីរំដោះខ្លួនរត់គេច។
ប៉ុន្តែពលរដ្ឋឈ្មោះ រិនរី ភេទប្រុស រស់នៅភូមិធ្លក និងឈ្មោះ វណ្ណា ភេទស្រី រស់នៅភូមិបន្ទាយឆ្មារលិច បានបញ្ជាក់ថា ពលរដ្ឋបានទៅហាមឃាត់ខាងគ្រឿង ដែលឈូសឆាយដីរបស់ក្រុមហ៊ុនជាតិអភិវឌ្ឍន៍ ជាច្រើនលើកជាច្រើនសារមកហើយ ប៉ុន្តែក្រុមហ៊ុនមិនអើពើទេ ហើយនៅតែបន្តឈូសឆាយដល់ដីស្រែពួកគាត់ ហេតុនេះ ប្រជាពលរដ្ឋប្រើសិទ្ធិការពារ និងបានទៅកន្លែងគ្រឿងចក្រដើម្បីធ្វើការហាមឃាត់។
ក្នុងពេលនោះ ទាហានម្នាក់បានបាញ់សំដៅមកលើប្រជាពលរដ្ឋម្នាក់ ឈ្មោះ សឿន ថន ភេទប្រុស អាយុ ៣០ឆ្នាំ រស់នៅភូមិបន្ទាយឆ្មារលិច តែមិនត្រូវ ខណៈពេលជននោះ បានភៀសខ្លួនធ្លាក់ចូលជង្ហុក រួចផុតពីសេចក្តីស្លាប់ ហើយទាហានបង្ក បានរត់គេចខ្លួនបាត់។
ប្រជាពលរដ្ឋបាននិយាយថា បើដឹងថា ទាហាននោះ បាញ់សំដៅមកលើពលរដ្ឋក្នុងបំណងសម្លាប់ដូច្នេះ ក្រុមប្រជាពលរដ្ឋជាង ២០០នាក់នោះ មិនឲ្យទាហាននោះ រត់គេចខ្លួនបានទេ។
មកដល់ម៉ោង ៥ ល្ងាច ថ្ងៃទី២៤ ខែកុម្ភៈ ឆ្នាំ២០១២ ក្រុមអ្នកស៊ីឈ្មួលឈូសឆាយដីព្រៃសម្បទានក្រុមហ៊ុនជាតិអភិវឌ្ឍន៍ បានបញ្ឈប់គ្រឿងចក្រហើយ។
ចំណែកក្រុមប្រជាពលរដ្ឋទាំងអស់ បានវិលត្រឡប់ទៅលំនៅដ្ឋានអស់ហើយ។ ប៉ុន្តែរឿងរ៉ាវនេះ នៅតែតានតឹង មិនទាន់មានដំណោះស្រាយបែបណាទេ៕
CEN
No comments:
Post a Comment
yes