រាជធានីភ្នំពេញ ៖ មិនមែនប្រាក់កំរៃមិនសំខាន់ទេ តែបុស្បា ប៉ាន់ មិនខ្វល់ពីរឿងនោះទេ គឺកាលពីរាត្រីថ្ងៃសៅរ៍ទី១១ កុម្ភៈ ឆ្នាំ២០១២ នៅសាកលវិទ្យាល័យបញ្ញាសាស្ត្រក្នុងរាជធានី នាងបានចូលរួមក្នុងកម្មវិធីប្រគំតន្ត្រីសប្បុរសធម៌ដើម្បីស្វែងរកប្រាក់ក្នុងឧត្តមគតិដ៏ថ្លៃថ្លា គឺជួយដល់កុមារក្រីក្រនៅតាមដងទន្លេសាប និងទន្លេមេគង្គ ឱ្យបានចូលរៀនស្វែងរកពន្លឺសម្រាប់អនាគតពួកគេ ។
មានប្រិយមិត្តទស្សនិកជនច្រើនបានចូលរួមនាឱកាសនោះ ដែលសំដែងនូវការគាំាំទ្រទេពកោសល្យរបស់បុស្បា ប៉ាន់ ព្រមទាំងឧត្តមគតិរបស់នាងចំពោះបុព្វហេតុសង្គមនោះ ។ នេះជាឧត្តមគតិរបស់សិល្បការិនីមួយរូប ហើយវាជាគំរូសម្រាប់អ្នកឯទៀត ។
ទស្សនិកជនទាំងអស់ត្រូវតារាចម្រៀងបុស្បា ប៉ាន់ អន្ទងអារម្មណ៍ឱ្យឈានចូលក្នុងពិភពដ៏សែនរំភើបទៅតាមអត្ថន័យបទចម្រៀង និងទឹកដមសំឡេងដ៏សែនពីរោះរបស់នាង ។ នាងច្រៀងចំនួន៣បទ ហើយបទនីមួយៗទទួលបាននូវការតបស្នងពីប្រិយមិត្តទស្សនិកជនចេញពីដួងចិត្តពួកគេតាមរយៈការទះដៃអបអរសាទរ និងសំដែងការពេញចិត្ត ។ បុស្បា ប៉ាន់ អាចច្រៀងបានច្រើនបទ ច្រើនភាសា តែរាត្រីនោះនាងបំពេអារម្មណ៍អ្នកគាំទ្រខ្លួនចំនួនបីបទ គឺបទជីវិតកូនស្រីអ្នកនេសាទ ត្រូវនឹងប្រភពដែលនាងត្រូវជួយដល់កុមារក្រីក្របានចូលសាលា។ បទទីពីរ របស់នាង គឺបទ នឹកឃើញទាំងអស់ និងបទភាសាអង់គ្លេស «My Ship »ប្រគំព្យ៉ាណូ ដោយភរិយាលោកតឺរ៉ូ ជីនណៃ អតីតប្រធានតំណាងអង្គការយូណេស្កូ ប្រចាំកម្ពុជា និងបច្ចុប្បន្ន ជាទីប្រឹក្សារាជរដ្ឋាភិបាលកម្ពុជា ។
បុស្បា ប៉ាន់ លេចធ្លោណាស់ទៅហើយ តែសិល្បករផ្សេងទៀតបានចូលរួមលើកកម្ពស់កម្មវិធីប្រគំតន្ត្រីសប្បុរសធម៌នោះដែរ គឺពូឃ្លាំង លោកនេន ទុំ និងក្រុមសិល្បៈAnimation ។ អ្នកទាំងអស់សុទ្ធតែគាំទ្របុស្បា ប៉ាន់ ក្នុងគំនិត ជួយដល់កុមារក្រីក្រឱ្យបានចូលរៀន ។
លោកតឺរ៉ូ ជីនណៃ មានប្រសាសន៍ថា តាមរយៈការច្រៀងរបស់បុស្បា ប៉ាន់ ដើម្បីអង្គាសប្រាក់ជួយកុមារក្រីក្រនេះ ជាការលើកទឹកចិត្តដ៏មានប្រយោជន៍ណាស់ដល់សង្គមកម្ពុជា ។ បុស្បា ប៉ាន់ បង្ហាញទេពកោសល្យសិល្បៈរបស់ខ្លួន លើកទឹកចិត្តដល់ពលរដ្ឋខ្មែរ ក្នុងកិច្ចការសប្បុរសធម៌ និងចូលរួមអភិវឌ្ឍប្រទេសរបស់ខ្លួន ។
លោកសរសើរបុស្បា ប៉ាន់ ថា ជាយុវតីមានទេពកោសល្យដ៏អស្ចារ្យដែលធម្មជាតិផ្តល់ឱ្យនាង ឯឪពុកម្តាយរបស់នាងជួយជំរុញបន្ថែមកាន់តែធ្វើឱ្យនាងមានភាពលេចធ្លោថែមទៀត ។
លោកថ្លែងថា «បុស្បា ប៉ាន់ នៅក្មេងដូច្នេះនាងត្រូវទៅកាន់សាលារៀនដូចកុមារធម្មតា ប៉ុន្តែនាងត្រូវបានបង្ហាត់ឱ្យដឹកនាំជីវិតប្រកបដោយគុណតម្លៃ ព្រោះនាងមានទេពកោសល្យច្រើនទាំងការច្រៀង ការលេងឧបករណ៍ភ្លេង និងកីឡា »។
លោកថ្លែងថា «បុស្បា ប៉ាន់ នៅក្មេងដូច្នេះនាងត្រូវទៅកាន់សាលារៀនដូចកុមារធម្មតា ប៉ុន្តែនាងត្រូវបានបង្ហាត់ឱ្យដឹកនាំជីវិតប្រកបដោយគុណតម្លៃ ព្រោះនាងមានទេពកោសល្យច្រើនទាំងការច្រៀង ការលេងឧបករណ៍ភ្លេង និងកីឡា »។
លោកសឺន ស៊ូប៊ែរ្តិ៍ សមាជិកក្រុមប្រឹក្សាធម្មនុញ្ញ ដែលអញ្ជើញចូលរួមជាកិត្តិយសនាឱកាសនោះដែរ មានប្រសាសន៍ថា «យើងមិនមានក្មេងមានទេពកោសល្យដូចបុស្បា ប៉ាន់ ឡើយ ពីមុនមក ដូច្នេះបើយើងរួមគ្នាជួយលើកស្ទួយនាងថែមទៀត នាងនឹងអាចប្រឡូកក្នុងឆាកអន្តរជាតិ បាន» ។
លោកកុល ផេង ទេសរដ្ឋមន្ត្រី និងជាសាកលវិទ្យាធិការសាកលវិទ្យាល័យបញ្ញាសាស្ត្រទីដែលកម្មវិធីប្រគំតន្ត្រីរៀបចំឡើងនោះថ្លែងថា «យើងប្រគំតន្ត្រីប្រមូលប្រាក់ ជួយកុមារក្រីក្រនៅដងទន្លេសាប និងតាមដងទន្លេមេគង្គ បានទៅសាលារៀនគឺជាទានជួយសង្គ្រោះដ៏សំខាន់ដែលយើងអាចធ្វើនៅពេលណាក៏បាន ។ ជីវិតមនុស្សតែងតែជួបរឿងក្នុងជីវិត គឺសេចក្តីសុខនិងសេចក្តីទុក្ខ ហើយបើយើងម្នាក់ៗចង់សុខ និងគិតថាជួយអ្នកកើតទុក្ខម្តេចបាន គឺជួយបាន ព្រោះការជួយអ្នកមានទុក្ខធ្វើឱ្យយើងបានសុខ»។
លោកស្រីដូមីនីក ឌូហ្វ្រេក មន្ត្រីទំនាក់ទំនងសាធារណៈនៃក្រុមហ៊ុន RMAគ្រុប មានប្រសាសន៍ថា បុស្បា ប៉ាន់ មានសំឡេងកាន់តែខ្ពស់ទៅៗពីមួយឆ្នាំទៅមួយឆ្នាំ ដូច្នេះថ្ងៃអនាគត នាងនឹងល្បីល្បាញលើឆាកអន្តរជាតិដោយសារមានទេពកោសល្យចម្រុះ និងអាចនិយាយបានជាច្រើនភាសាដូចជា ភាសា បារាំង អង់គ្លេស ឡាវ ជាដើម ។
នៅរាត្រីនោះមានការរៀបចំចាក់បញ្ចាំង ខ្សែវីដេអូ កម្មវិធីប្រគំតន្ត្រីព្រះគុណគ្រូដែលរៀបចំធ្វើនៅប្រាសាទបាយ័ន កាលពីឆ្នាំ២០១១ផងដែរ ដើម្បីឱ្យទស្សនិកជនទស្សនាមុនការចាប់ផ្តើមប្រគំតន្ត្រីសប្បុរសធម៌ដែលដឹកនាំរៀបចំឡើងដោយលោកប៉ាន់ ម៉េងហ៊ាង ដែលជាឪពុក និងជាផ្នែកមួយនៃការរុញបុស្បា ប៉ាន់ ឱ្យរះចិញ្ចាចក្នុងវេហាស៍សិល្បៈ ។
អ្នកអង្គម្ចាស់ស៊ីសុវត្ថិ ពង្សនារី មុនីពង្ស មានបន្ទូលថា បុស្បា ប៉ាន់ នឹងមានអនាគតភ្លឺស្វាង ជាមោទនភាពសម្រាប់ជាតិ ហើយជឿថា ការខិតខំរបស់នាង និងក្រុមគ្រួសារនឹងជោគជ័យជានិច្ច ។
និស្សិតសាកលវិទ្យាល័យបញ្ញាសាស្ត្រដែលចូលរួមទស្សនាការប្រគំតន្ត្រីរបស់បុស្បា ប៉ាន់ សុទ្ធតែកោតសរសើរឧត្តមគតិរបស់នាងដែលគិតគូរដល់កុមារក្រីក្រឱ្យបានចូលរៀន ហើយប្រាថ្នាចង់ឃើញនាង និងលោកឪពុករបស់នាង រួមជាមួយក្រុមគ្រួសារបង្កើតកម្មវិធីផ្សេងៗបន្តបន្ទាប់ទៀត ដែលរួមចំណែកដល់ការជួយ សង្គម ។
សម្រាប់បុស្បា ប៉ាន់ និងក្រុមគ្រួសារការរួមចំណែកលើកស្ទួយសិល្បៈវប្បធម៌ជាតិ និងការជួយសង្គមគឺនៅជាមួយគ្នា ហើយឧត្តមគតិនេះមានជាដរាប ៕
កោះសន្តីភាព
No comments:
Post a Comment
yes