គណបក្ស សម រង្ស៊ី មិនទទួលស្គាល់ការបោះបង្គោលព្រំដែន រវាងរដ្ឋាភិបាលកម្ពុជា ជាមួយនិងរដ្ឋាភិបាលយួន

ថ្ងៃទី២៤ ខែមិថុនា ឆ្នាំ២០១២ គឺជាថ្ងៃដែលយួនមានការសប្បាយរីករាយយ៉ាងខ្លាំង ក្នុងការបានរំ លោភយកទឹកដីរបស់ខ្មែរបានមួយផ្នែកទៀត ចំណែករដ្ឋាភិបាលខ្មែរក៏សប្បាយរីករាយណាស់ ផងដែរ ដែលបានកាត់ទឹកដីរបស់ខ្លួនឲ្យទៅយួន ព្រោះដើម្បីការពារអំណាច ។

ជាញ៉យដងគណបក្ស សម​ រង្ស៊ី ក្រោមការដឹកនាំរបស់លោក សម រង្ស៊ី ដ៏អង់អាចក្លាហាន គឺបាន ធ្វើការបដិសេធ និងមិនដែលទទួលស្គាល់ម្តងណាទេ ចំពោះការបោះបង្គោលព្រំដែន រវាង​រដ្ឋាភិ​បាល​ខ្មែរ ជាមួយនិងរដ្ឋាភិបាលយួននោះ ។

ការមិនទទួលស្គាល់ក្នុងការបោះបង្គោលព្រំដែនរវាងរដ្ឋាភិបាលកម្ពុជា និងរដ្ឋាភិបាលយួន ពីសំ​ណាក់​គណបក្ស សម រង្ស៊ី ដោយសារតែការបោះបង្គោលព្រំដែននេះ គឺជាការធ្វើឲ្យបាត់​បង់​នូវ​​បូរណៈ​ភាព​​ទឹកដីកម្ពុជារបស់យើង ដោយគេមិនបានធ្វើការវាស់វែង និងត្រួតពិនិត្យឲ្យបាន​ត្រឹម​ត្រូវ ក៏ដូចជាមានការចូលរួមពីសំណាក់អ្នកជំនាញណានោះទេ ហើយការប្រើប្រាស់ផែនទី ក្នុង​ការ​បោះបង្គោលព្រំដែននោះទៀតសោត ក៏ជាផែនទីដែលមិនត្រឹមត្រូវផងដែរ ព្រោះជាការ​ធ្វើ​ឡើងរវាងកិច្ចព្រមព្រៀងរបស់រដ្ឋាភិបាលខ្មែរ និងរដ្ឋាភិបាលយួន តែប៉ុណ្ណោះ ។

ស្របពេលជាមួយនិងការបោះបង្គោលព្រំដែននៅក្នុងខេត្តកំពត និងខេត្តកៀងយ៉ាង ដែលនាយក​រដ្ឋមន្រ្តីទាំង២គឺលោក ហ៊ុន សែន និងលោក ង្វៀង តាន់យុង កំពុងតែសប្បាយរីករាយក្នុងការ កាត់ និងលួចដីរបស់ខ្មែរនោះលោក សម រង្ស៊ី ពីប្រទេសបារាំងក៏បានចេញសេចក្តីថ្លែងការណ៏ ដោយធ្វើការច្រានចោល និងមិនទទួលស្គាល់ជាដាច់ខាតចំពោះការបោះបង្គោលព្រំដែនលេខ ៣១៤ នេះព្រោះវាបានធ្វើឲ្យខ្មែរបាត់បង់ទឹកដីជាច្រើនចូលទៅខាងភាគីយួន ។

សូមរំលឹកផងដែរថា កាលពីថ្ងៃទី២៥ ខែតុលា ឆ្នាំ២០០៩ នៅក្នុងពិធីដង្ហែរអង្គកឋិនទាន ចូលទៅ កាន់វត្តអង្គរំដេញ ស្ថិតនៅក្នុងភូមិកោះក្បានកណ្តាល ឃុំសំរោង ស្រុកចន្ទ្រា ខេត្តស្វាយរៀង លោក សម រង្ស៊ី បានទទួលការអំពាវនាវពីប្រជាពលរដ្ឋនៅទីនោះ សូមឲ្យជួយអន្តរាគមន៏​ចំពោះ​ការបោះ បង្គោលព្រំដែនរវាងរដ្ឋាភិបាលខ្មែរ និងរដ្ឋាភិបាលយួន ដែលចំនៅលើដីស្រែ​របស់ពួក​គាត់ ។ ស្របពេលជាមួយគ្នានោះលោក សម រង្ស៊ី មិនបង្អង់យូក៏បានដឹកនាំគណប្រតិភូ ទៅធ្វើ​ការ​​ត្រួតពិនិត្យភ្លាម ។ ពេលទៅដល់ ពិតជាមានតំរុយបង្គោលព្រំដែនបានបោះចូលមកដីខ្មែ និង​នៅលើដីស្រែរបស់ប្រជាពលរដ្ឋដូចអ្វីដែលពួកគាត់បានអះអាងមែន ដោយមើលឃើញនូវការ រំលោភទឹកដីពីសំណាក់រដ្ឋាភិបាលយួនបែបនេះលោក សម រង្ស៊ី ក្នុងនាមជាកូនខ្មែរ និងជាអ្នក​តំណាងរាស្រ្តជាប់ឆ្នោតមួយរូប ដែល​មានមន​សិ​ការ​​ស្រលាញ់ជាតិ មាតុភូមិ និងមិនចង់ឲ្យទឹកដី​របស់ខ្មែរត្រូវបាត់បង់ចូលទៅ​ក្នុងប្រទេសយួន​នោះ លោក សម រង្ស៊ី ក៏បានធ្វើការដកបង្គោល​ឈើ​​ទាំងនោះចេញពីលើដីស្រែរបស់ប្រជាពលរដ្ឋ ដែល​រដ្ឋាភិបាល​ខ្មែរអះអាង​ថា​ជាតំរ៉ុយ​បង្គោល​​​ព្រំដែន​​លេខ ១៨៥ ។ បន្តរបន្ទាប់ពីនោះមក រដ្ឋាភិបាលយួនក៏បានធ្វើការដក​បង្គោល​ព្រំ​ដែល​លេខ ១៨៣,១៨៤,១៨៦និង១៨៧ យកទៅស្រុកយួនវិញដោយខ្លួនឯងជាបន្ទាន់ផងដែរ ។ សូម្បីតែរដ្ឋាភិបាលខ្មែរក៏មិន មានប្រតិកម្មអ្វីជុំវិញទៅនិងការដកបង្គោលព្រំដែនឈ្លានពាននេះ​នោះទេ តែបានប៉ុន្មានថ្ងៃក្រោយមក បន្ទាប់ពីយួនបានដកបង្គោលព្រំដែលលេខ ១៨៣,១៨៤,​១៨៦និង១៨៧ត្រឡប់ទៅស្រុកវិញ ដោយមិនចង់ឲ្យខ្លួនអាម៉ាស់រដ្ឋាភិបាលយួន ដែលមាន​អំ​ណាច​លើរដ្ឋាភិបាលខ្មែរសព្វថ្ងៃ បានស្រែកពីស្រុកយួនមកឲ្យកុំចាត់លោក សម រង្ស៊ី ជាដាច់​ខាត​ព្រោះបានលូកដៃចូលទៅកកូក កាយក្នុងរឿងបោះបង្គោលព្រំដែនរបស់ពួកគេ ដែលធ្វើឲ្យខាត​ប្រយោជន៏របស់គេនោះ ។ ភ្លាមនោះ បន្ទាប់ពីទទួលបានបញ្ជាពីនាយករដ្ឋមន្រ្តីយួនហើយ លោក ហ៊ុន សែន បានប្រើតុលាការខេត្ត ស្វាយរៀង ដែលជាឧបករណ៏នយោបាយរបស់ខ្លួន ឲ្យចាត់​ការ​លោក សម រង្ស៊ី ភ្លាមដោយធ្វើការចោទប្រកាន់លោក សម រង្ស៊ី ពីបទបំផ្លិចបំផ្លាញទ្រព្យសម្បត្តិ​សាធារណៈ និងផ្តន្ទាទោស ឲ្យជាប់ពន្ធនាគារជាច្រើនឆ្នាំ និងពិន័យជាប្រាក់ជាច្រើន​លានរៀល​​ផងដែរ ។

ដូចនេះបងប្អូនត្រូវតែដឹងថា ប្រទេសកម្ពុជាយើងកំពុងតែរងគ្រោះដោយសារការ​បាត់បង់ទឹក​ដី​ចូលទៅក្នុងប្រទេសយួនច្រើនណាស់តាមរយៈការបោះបង្គោលព្រំដែន រវាងរដ្ឋាភិបាលខ្មែរ និង រដ្ឋាភិបាលយួននេះ ។

គណបក្ស សម រង្ស៊ី ដែរនឹងដឹកនាំរដ្ឋាភិបាលនាពេលខាងមុខ និងធ្វើការសើរើបង្គោលព្រំដែន ទាំងអស់ដែលបានធ្វើតាំងពីពេលកន្លងមក និងបច្ចុប្បន្ននេះឡើងវិញ ហើយការបោះបង្គោល​ព្រំដែននេះត្រូវបានគេដឹងថា គឺធ្វើឡើងស្រមតាមកិច្ចព្រមព្រៀងរវាងប្រទេសទាំងពីរ កាលពីឆ្នាំ ១៩៨២-១៩៨៣ និងឆ្នាំ១៩៨៥ ។

សន្ធិសញ្ញា ឬកិច្ចព្រមព្រៀងទាំងនោះត្រូវបានចាត់ទុកថាខុសច្បាប់ទាំងស្រុង ដោយបានធ្វើឡើង ក្នុងកាលៈទេសៈដែលប្រទេសកម្ពុជា ស្ថិតនៅក្រោមអំណាចគ្រប់គ្រងរបស់ប្រទេសយួន ។ សន្ធិ សញ្ញាទាំងនោះ ត្រូវបានសកម្មជនព្រំដែនចាត់ទុកថាជាសន្ធិសញ្ញាដែលខុសពីសន្ធិសញ្ញាទីក្រុង ប៉ារីស ឆ្នាំ១៩៩១ ដែលមិនអាចទទួលយកបាននោះទេ ។ ប៉ុន្តែតាមរយៈសន្ធិសញ្ញាបំពេញបន្ថែម ឆ្នាំ២០០៥ រដ្ឋាភិបាលកម្ពុជាបានធ្វើឲ្យសន្ធិសញ្ញាទាំងអស់នោះក្លាយទៅជាស្របច្បាប់វិញ ។ ហើយជាបន្តបន្ទាប់ការបោះបង្គោលព្រំដែនត្រូវបានអនុវត្តន៏រហូតមកដល់ពេលនេះ ហើយការ បោះបង្គោលព្រំដែនរវាងរដ្ឋាភិបាលខ្មែរ និងរដ្ឋាភិបាលយួន ត្រូវបានអ្នកឃ្លាំមើលព្រំដែនអះអាង ថា មិនបានធ្វើឲ្យប្រទេសកម្ពុជាចំណេញនោះទេ តែផ្ទុយទៅវិញបានខាតបង់ទឹកដី មួយចំនួនទៅ ខាងភាគគីយួនអស់យ៉ាងច្រើន ក៏ប៉ុន្តែទោះបីជាយ៉ាងណាក៏ដោយត្រូវបានរដ្ឋាភិបាលខ្មែរអំអាង ថា វាគឺជាជោគជ័យរបស់ខ្លួនទៅវិញ ។

ក្រុមអង្គការសង្គមស៊ីវិលបានលើកឡើងផងដែរថា ការលើកឡើងរបស់លោក ហ៊ុណ សែន ថានេះពិតជាជោគជ័យរបស់ខ្លួននោះ វាពិតជាត្រឹមត្រូវណាស់ ជោគជ័យ របស់លោក ហ៊ុន សែន គឺជាជោគជ័យក្នុងការបំរើនយោបាយឲ្យយួន ទៅតាមបំណងប្រាថ្នារបស់យួន និងដើម្បី​ការ​ពារ​អំណាចរបស់ខ្លួននោះ ៕