សហជីពសេរីកម្មករ នៃព្រះរាជាណាចក្រកម្ពុជាដែលដឹកនាំដោយលោក ជា មុនី កាលពីថ្ងៃទី២៧ ខែមិថុនា ថ្មីៗនេះ បានដាក់លិខិតជូនដំណឹងមួយទៅក្រសួងការងារ ដោយប្រកាសផ្តាច់ចំណងសម្ព័ន្ធភាពជាមួយសមាគមគ្រូបង្រៀនកម្ពុជាឯករាជ្យដឹកនាំដោយលោក រ៉ុង ឈុន ក្រោមដំបូលសហភាពសហជីពកម្ពុជា (CCU)នោះ។
លោក ជា មុនី និងលោក រ៉ុង ឈុន
បើតាមសេចក្តីប្រកាសព័ត៌មានរបស់សហជីពសេរីកម្មករ នៃព្រះរាជាណាចក្រកម្ពុជា សហជីពនេះបានចងសម្ព័ន្ធភាពជាមួយសមាគមគ្រូបង្រៀនកម្ពុជាឯករាជ្យអស់រយៈពេលជាច្រើនឆ្នាំកន្លងមកហើយក្នុងឈ្មោះ សហភាពសហជីពកម្ពុជា (CCU) ដើម្បីសកម្មភាពបម្រើឲ្យផលប្រយោជន៍កម្មករ កម្មការិនី ដូចជាការទាមទារដំឡើងប្រាក់ឈ្នួល និងអត្ថប្រយោជន៍ផ្សេងៗជូនកម្មករ និយោជិត ការជំរុញឲ្យមានការគោរពច្បាប់ស្តីពីការងារ នៃព្រះរាជាណាចក្រកម្ពុជា។ល។ ប៉ុន្តែនារយៈពេលថ្មីៗនេះ សកម្មភាពរបស់សហភាពសហជីពកម្ពុជា ជារឿយៗបានដើរផ្ទុយទៅនឹងគោលបំណង និងគោលដៅរបស់សហជីពសេរីកម្មករ ដែលទាមទារឲ្យមានការគិតគូរទៅដល់ឧត្តមប្រយោជន៍របស់កម្មករ និយោជិត។
ដូច្នេះហើយ ទើបសហជីពសេរីកម្មករប្រកាសបញ្ឈប់ការចងសម្ព័ន្ធភាពជាមួយសមាគមគ្រូបង្រៀន និងមិនស្ថិតនៅក្រោមដំបូលរបស់សហភាពសហជីពកម្ពុជាទៀត។ ដោយបញ្ជាក់ជាចុងក្រោយថា គ្រប់អំពើ ឬសកម្មភាពទាំងឡាយរបស់សហភាពសហជីពកម្ពុជា (CCU) តទៅមិនឆ្លុះបញ្ចាំងអំពីសកម្មភាព ឬគោលជំហរពិតប្រាកដរបស់សហជីពសេរីកម្មករ នៃព្រះរាជាណាចក្រកម្ពុជាឡើយ។
នៅមិនទាន់មានការឆ្លើយតបណាមួយពីសមាគមគ្រូបង្រៀនកម្ពុជាឯករាជ្យ ចំពោះការប្រកាសផ្តាច់សម្ព័ន្ធភាពរបស់សហជីពសេរីកម្មករ នៃព្រះរាជាណាចក្រកម្ពុជានេះនៅឡើយទេ៕
No comments:
Post a Comment
yes