កែ សុវណ្ណរតន៏៖ គណបក្ស សម រង្ស៊ី ជាក្តីសង្ឃឹមរបស់ប្រជាពលរដ្ឋខ្មែរ ធ្វើអ្វីដើម្បីពលរដ្ឋ និងប្រទេសជាតិ

អគ្គលេខាធិការគណបក្ស សម រង្ស៊ី និងជាសមាជិកព្រឹទ្ធសភា លោកស្រី កែ សុវណ្ណរតន៏ អមដំ​ណើរដោយថ្នាក់ដឹកនាំចលនា​ស្ត្រី​របស់គ​ណបក្ស សម រង្ស៊ី មួយចំនួនទៀត កាលពី​ថ្ងៃអាទិត្យ​ បានធ្វើដំណើរចុះទៅជួបសំណេះ​សំណាល​ជាមួយសមាជិក និងថ្នាក់ដឹកនាំគណបក្ស សម រង្ស៊ី  ឃុំ និងស្រុក ក្នុងខេត្តបន្ទាយមានជ័យ ប្រមាណជាង១០០​នាក់ ។

នៅក្នុងពិធីនេះ លោកស្រី កែ សុវណ្ណរតន៍ បានថ្លែងអំណរគុណ ជូនចំពោះថ្នាក់ដឹកនាំ និងសកម្ម​ជនរបស់​​គណបក្ស សម រង្ស៊ី ទាំងអស់ នៅក្នុងខេត្តបន្ទាយមានជ័យ ក៏ដូចជា នៅតាមបណ្តាខេត្ត​និងរាជធានី នានានៅទូទាំប្រទេស ដែលបានប្រឹងប្រែងយ៉ាងសកម្ម ក្នុងយុទ្ធនាការឃោសនា​បោះ​ឆ្នោត​ជ្រើសរើស​សមាជិកក្រុមប្រឹក្សាឃុំ-សង្កាត់ អាណត្តិទី៣ កាលទើបតែកន្លង​ផុតទៅ​បានជាង១ខែនោះ។

សកម្មភាព​នេះ ក្នុងនាមលោកស្រី កែ សុវណ្ណរតន៏ ជា​ថ្នាក់ដឹកនាំរបស់គណ​បក្ស​សមរង្ស៊ី លោកស្រីសូមកោតសរសើរចំពោះ​ថ្នាក់ដឹកនាំ និងសកម្មជន​ទាំងគ្នា បើទោះបីលទ្ធ​ផលបោះឆ្នោតមិនបានផ្តល់ឲ្យគណបក្សតាមការ​គ្រោងទុកយ៉ាងណា ដែលទាំងអស់នេះ​ដោយ​សារ​តែ​មានការរៀបចំ និងជាល្បិចកលខិលខូចរបស់ពួកគេដែលមានលក្ខណៈជាប្រព័ន្ធ ។

ក្នុងឱកាសនោះដែរ លោកស្រី កែ សុវណ្ណរតន៍ អគ្គលេខាធិការគណបក្ស ក៏បានលើកទឹកចិត្តបន្ត​ឲ្យថ្នាក់ដឹកនាំ និងសកម្មជនទាំងអស់ ត្រូវតែខិតខំបំពេញការងារទាំងនេះបន្ថែមទៀត ពិសេស​ក្នុងឱកាសខាងមុខ គឺត្រូវធ្វើយ៉ាងណា ណែនាំប្រជាពលរដ្ឋឲ្យបានទៅចុះឈ្មោះ ពិនិត្យបញ្ជី​ឈ្មោះ បោះឆ្នោត និងត្រៀមឯកសារសំរាប់ការបោះឆ្នោតឲ្យបានគ្រប់ៗគ្នា ។ លោកស្រីបាន​បញ្ជាក់​ថា មានតែការចុះឈ្មោះបោះឆ្នោតទេ ទើបអាចឲ្យប្រជាពលរដ្ឋ មានសិទ្ធិគ្រប់គ្រាន់​ដើម្បី​អាចបោះឆ្នោតបាន។

ដូចនេះដើម្បីឲ្យប្រជាពលរដ្ឋបានសម្តែងមតិតាម​រយៈសន្លឹកឆ្នោត ពួកគាត់ត្រូវតែទៅចុះ ឈ្មោះ បោះឆ្នោត ដែលនឹងចាប់ផ្តើមពីខែតុលាខាងមុខ។ការខកខាន ក្នុងការជំរាប​ប្រជាពលរដ្ឋឲ្យ​ទៅ

ចុះឈ្មោះបោះឆ្នោត គឺជាការហុចឱកាសឈ្នះរួច ជាស្រេចដល់គណបក្សកាន់អំណា​ច ដូចនេះ​ការចុះឈ្មោះបោះឆ្នោត​ត្រូវបានគណបក្ស សម រង្ស៊ី ចាត់ទុកជាព្រឹត្តិការណ៏ដ៏សំខាន់ ដែលត្រូវ​តែមានការចូលរួមទាំងប្រជាពលរដ្ឋ និងថ្នាក់ដឹកនាំ​មូលដ្ឋានរបស់គណបក្ស សម រង្ស៊ី ។

ចំពោះការបោះឆ្នោតនាពេលកន្លងមក លោកស្រី កែ សុវណ្ណរតន៏ បានធ្វើការកត់សំគាល់ ដោយ​បញ្ជាក់ថាមានភាពមិនប្រក្រតីច្រើន កើតមានតាមបណ្តាខេត្តទាំងអស់។ ហើយជាមួយគ្នានោះ​គណបក្ស សម រង្ស៊ី បានដាក់ពាក្យប្តឹងជាច្រើនករណី ទៅកាន់ គ.ជ.ប ប៉ុន្តែត្រូវបានដោះស្រាយ​ដោយ​មិន​យុត្តិធម៌ លំអៀង និងភាគច្រើនត្រូវបានគ.ជ.ប ទាត់ចោលតែម្តង ។

លោកស្រីអគ្គលេខាធិការ កែ សុវណ្ណរតន៏ ក៏បានចោទប្រកាន់ គ.ជ.ប ថាកំពុងអនុវត្តយុទ្ធ សាស្ត្រ​ដើម្បីជួយការពារ និងរកជ័យជំនះជូនគណបក្សកាន់អំណាច តាមរយៈការរៀបចំការបោះ​ឆ្នោត​របស់ខ្លួន។ប៉ុន្តែទោះជាយ៉ាងណា​ក៏ដោយគណបក្ស សម រង្ស៊ី មានមោទនភាពចំពោះប្រជាពល

រដ្ឋដែលបានបោះ​ឆ្នោតជូនគណបក្ស សម រង្ស៊ី ។ បើទោះបីជាមានការរំខាន ការលុបឈ្មោះ​ប្រជា​ពលរដ្ឋ ជាប្រព័ន្ធ​ប៉ុន្តែនៅតែមានប្រជាពលរដ្ឋយ៉ាងច្រើនបានបោះឆ្នោតជូនគណបក្ស សម រង្ស៊ី ។ សម្លេងដែលគណបក្ស សម រង្ស៊ី ទទួលបានគឺជា​សម្លេង ដែលនៅសេសសល់ពីការលួចបន្លំ និងជាសម្លេងរបស់ពលរដ្ឋខ្មែរសុទ្ធសាធ ផ្ទុយពីសម្លេងរបស់គណបក្សកាន់អំណាច បើទោះ​បីជា​ឈ្នះ ក៏ឈ្នះដោយទុច្ចរិត មិនយុត្តិធម៌ ជាសម្លេងបំប៉ោង ដោយការលួចបន្លំជាដើម ។

ដូចនេះអ្វីដែលសមាជិករបស់គណបក្ស សម រង្ស៊ី ត្រូវធ្វើបន្ត គឺការណែនាំពន្យល់ប្រជាពលរដ្ឋ​ឲ្យបាន​កាន់​តែច្រើនទៅចុះឈ្មោះថ្មី និងប្រជាពលរដ្ឋ​ដែលត្រូវបានគេលួច លុបឈ្មោះ ក៏ត្រូវតែ​ទៅចុះឈ្មោះឡើងវិញផងដែរ លើសពីនេះ​ក៏ត្រូវជួយតាមដាន​ចំពោះសកម្មភាពរបស់ គ.ជ.ប ដើម្បីកាត់បន្ថយ សកម្មភាពបំរើនយោបាយ​គណបក្សកាន់អំណាចធ្វើដោយស្ថាប័ននេះឲ្យបាន​

ជាអតិបរមា។

នៅក្នុងឱកាសនោះផងដែរ លោកស្រី អគ្គលេខាធិការគណបក្ស សម រង្ស៊ី កែ សុវណ្ណរតន៏ ក៏បាន​ផ្តាំផ្ញើឲ្យថ្នាក់ដឹកនាំគ្រប់រចនាសម្ព័ន្ធគណបក្សក្នុងខេត្តបន្ទាយមានជ័យទាំងអស់ ក៏ត្រូវតែរួមគ្នា​តាម​ដានមើលសកម្មភាពរំលោភជិះជាន់ធ្វើបាបដល់ប្រជាពលរដ្ឋ ផងដែរ​ពិសេសសកម្មភាព​រំលោភ​ដីធ្លីប្រជាពលរដ្ឋ។ ព្រោះគណបក្ស សម រង្ស៊ី គឺជាក្តីសង្ឃឹមរបស់​ប្រជាពលរដ្ឋ ដូចនេះនៅ​ពេលដែលប្រជាពលរដ្ឋរងគ្រោះដោយការរំលោភដីធ្លី ថ្នាក់ដឹកនាំ​គណបក្ស​ សម រង្ស៊ី​ត្រូវតែចេញ​មុខធ្វើអន្តរាគមន៏ភ្លាមៗតាមផ្លូវច្បាប់ដល់ពួកគាត់ ។

សូមជំរាបផងដែរថា កាលពីថ្ងៃទី២២ ខែមិថុនាកន្លងមកលោកស្រី កែ សុវណ្ណរតន៏ ក៏បានដឹកនាំ ថ្នាក់ដឹកនាំគណបក្ស សម រង្ស៊ី មួយចំនួនចុះជួបសំណេះសំណាលជាមួយថ្នាក់ដឹកនាំ និងសកម្ម​ជន​របស់​គណបក្ស សម រង្ស៊ី ក្នុងស្រុកឱរ៉ាល់ ខេត្តកំពង់ស្ពឺ ផងដែរ។ ថ្នាក់ដឹកនាំដែលចូល​រួម​នៅក្នុងខេត្តកំពង់ស្ពឺរួមមាន លោក នុត រំដួល ប្រធានក្រុម​ប្រឹក្សាខេត្តកំពង់ស្ពឺ លោក​ម៉ែន​សុថាវរិន្ទ្រ ប្រធានក្រុមប្រឹក្សាខេត្តកំពង់ធំ និងលោក​ ឡុង រី ប្រធានក្រុមប្រឹក្សាគណបក្ស សម រង្ស៊ី ខេត្តក្រចេះ ។

គណបក្ស សម រង្ស៊ី ជានិច្ចជាកាលតែងតែយកចិត្តទុកដាក់ចំពោះសុខទុក្ខរបស់ប្រជាពលរដ្ឋ និង តែងតែចេញមុខការពារប្រជាពលរដ្ឋគ្រប់ពេលវេលានៅពេលដែលប្រជាពលរដ្ឋ ត្រូវទទួលរងនូវ ការធ្វើបាបពីសំណាក់មន្រ្តីរបស់គណបក្សប្រជាជន ក្រុមហ៊ុន និងឈ្មួញជាដើម ។ ព្រោះប្រជា ពលរដ្ឋភាគច្រើននៅក្នុងប្រទេសកម្ពុជា គឺត្រូវទទួលរងនូវការរំលោភដីធ្លី ពីសំណាក់ក្រុមហ៊ុន ឬឈ្មួញដែលទទួលបានការសម្បទានពីរដ្ឋាភិបាល ដោយមិនបានគិតអំពីផលប៉ះពាល់ដល់ ប្រជាពលរដ្ឋនោះ ។ គណបក្ស សម រង្ស៊ី ជាគណបក្សដែលមានគោលនយោបាយច្បាស់លាស់ ក្នុងការការពារប្រជាពលរដ្ឋ និងប្រទេសជាតិ លើកកំពស់កំរិតជីវភាពរស់នៅរបស់ប្រជាពលរដ្ឋ ដោយរកឈ្មួញល្អៗពីក្រៅប្រទេសចូលមកវិនិយោគនៅក្នុងស្រុក បង្កើនប្រាក់ចំណូលជូនប្រជា ពលរដ្ឋ មិនចាំបាប់ប្រជាពលរដ្ឋធ្វើចំណាកស្រុកចេញទៅរកការងារធ្វើទាំងប្រថុយប្រថាននៅ ក្រៅប្រទេស ។ រួមជាមួយនិងគោលនយោបាយសំខាន់ៗមួយចំនួនទៀត ព្រោះថ្នាក់ដឹកនាំរបស់ គណបក្ស សម រង្ស៊ី គឺជាអ្នកដែលមានជំនាញខាងផ្នែកសេដ្ឋកិច្ច និងពាណិជ្ជកម្ម ។ មិនមែនដូច រដ្ឋាភិបាលសព្វថ្ងៃដែលអសមត្ថភាព គ្រានជំនាញពិតប្រាកដ ក៏ដូចជាគ្មានលទ្ធភាពក្នុងការរក​ការងារឲ្យប្រជាពលរដ្ឋធ្វើ ។ សូមចូលរួមជាមួយនិងគណបក្ស សម រង្ស៊ី ដើម្បីអនាគត់របស់អ្នក និងប្រទេសជាតិ បោះឆ្នោតជូនគណបក្ស សម រង្ស៊ី ទាំងអស់គ្នានៅថ្ងៃទី ២៨ ខែកក្កដា ឆ្នាំ២០​១៣ កុំបីខាន ៕