លោកនាយករដ្ឋមន្ត្រី ហ៊ុន សែន ប្រតិកម្មនឹងការលើកឡើងរបស់អង្គការសិទ្ធិមនុស្សអន្តរជាតិ ដែលរិះគន់ការកាន់តំណែងជានាយករដ្ឋមន្ត្រីបានយូរ បើទោះជាមានការតិចទៀនច្រើនពីរឿងពុករលួយ និងរំលោភសិទ្ធិមនុស្ស។
ថ្លែងនៅក្នុងពិធីបើកការដ្ឋានផ្លូវជាតិលេខ៥៦ នៅខេត្តបន្ទាយមានជ័យ កាលពីថ្ងៃព្រហស្បតិ៍ លោកនាយករដ្ឋមន្ត្រី ហ៊ុន សែន មានប្រសាសន៍ថា ក្រោមការដឹកនាំរបស់លោកកន្លងមក លោកបានកសាងហេដ្ឋារចនាសម្ព័ន្ធនានា ដែលត្រូវបំផ្លាញដោយសង្គ្រាមនោះឡើងវិញ ដែលធ្វើឲ្យប្រជាពលរដ្ឋច្រើនលើសលុបបោះឆ្នោត គាំទ្រគណបក្សលោកឲ្យដឹកនាំប្រទេសរហូតជិត៣០ឆ្នាំនេះ (២៧ឆ្នាំ) ៖”ការបណ្ដុះបណ្ដាលធនធានមនុស្សរបស់យើង ដែលជាអាទិភាពនៃនយោបាយរបស់រដ្ឋាភិបាល ហើយនិយាយតែមួយបែបរបស់ខ្ញុំ ខ្ញុំព្រះករុណាខ្ញុំបានប្រកាសចេញតាំងពីឆ្នាំ១៩៨៧ បានសេចក្ដីថាមកដល់ពេលនេះ ២៥ឆ្នាំ នៅតែត្រឹមត្រូវ ហើយថ្ងៃនោះ ប្រេដ អាដាម គេសរសេរ អាក្រក់ គេយកទៅចុះអា New York Time គេថា ហ៊ុន សែន ជាមួយនឹង ១ម៉ឺនថ្ងៃ ខ្ញុំដំបូងអត់ដឹងដែរ ថា ១ម៉ឺនថ្ងៃស្អី ១ម៉ឺនថ្ងៃហ្នឹងគេគន់គូ។ ឥឡូវហ្នឹងខ្ញុំព្រះករុណាខ្ញុំរស់បានជាង២ម៉ឺនថ្ងៃហើយ បានសេចក្ដីថា ១ម៉ឺនថ្ងៃគឺជាថ្ងៃ ២៧ឆ្នាំនៃការធ្វើនាយករដ្ឋមន្ត្រី គេហៅថា ពួកនៅក្នុងក្លឹបមួយម៉ឺនថ្ងៃ ហើយក្មេងជាងគេទៀត។ បើមិនក្មេងម៉េច បើធ្វើពីក្មេងវី ឲ្យគ្នាចាស់ទៅណា ហើយស្មានតែចង់ចាស់ណាស់"។
ប្រតិកម្មរបស់លោកនាយករដ្ឋមន្ត្រី ហ៊ុន សែន បានធ្វើឡើងដោយឆ្លើយតបនឹងការរិះគន់ខ្លាំងៗ ពីនាយកប្រចាំតំបន់របស់អង្គការឃ្លាំមើលសិទ្ធិមនុស្ស អន្តរជាតិ គឺលោក ប្រេត អាដាម (brad Adams)។ លោក ប្រេត អាដាម បានបញ្ចេញអត្ថបទរិះគន់មួយនៅពេលថ្មីៗនេះ ក្រោមចំណងជើងថា មួយម៉ឺនថ្ងៃនៃ ការកាន់អំណាចរបស់លោក ហ៊ុន សែន។ អត្ថបទដែលត្រូវបានចុះផ្សាយដោយសារព័ត៌មានល្បីៗលើពិភពលោកនោះ បានរិះគន់ចំៗ ពីការរំលោភសិទ្ធិមនុស្ស អំពើពុករលួយ បក្សពួកនិយម ការជ្រៀតជ្រែកលើប្រព័ន្ធតុលាការ និងការគៀបសង្កត់លើគណបក្សប្រឆាំងនៅកម្ពុជាជាដើម។
អ្នកវិភាគនយោបាយមួយរូប លោកបណ្ឌិត សុខ ទូច មានប្រសាសន៍ថា កាវាយតម្លៃរបស់លោក ប្រេត អាដាំ មិនទាន់គ្រប់ជ្រុងជ្រោយទេ ដោយសារការដឹកនាំនៅកម្ពុជា ខុសពីការដឹកនាំនៅមជ្ឈឹមបូព៌ា ដែលពលរដ្ឋធ្វើបាតុកម្មទម្លាក់ ៖ “មជ្ឈឹមបូព៌ាអត់មានបោះឆ្នោតទេ តែបើប្រៀបធៀបជាមួយប្រទេសប្រ៊ុយណេ ប្រ៊ុយណេអំណាចចាស់វស្សាដូចគ្នា ប៉ុន្តែអំណាចគឺកើតចេញមកពីការបោះឆ្នោត ហើយអ្វីដែលកើតចេញពីអំណាចរបស់ សាដាម ហ៊ូសេន របស់ស៊ីរី របស់នេះទាំងអស់ គឺជាអំណាចកើតចេញពីរដ្ឋប្រហារ ហើយមិនបោះឆ្នោត តែអានេះគេបោះឆ្នោតនៅឆ្នាំ១៩៩៣ រហូតដល់២០១២នេះ គឺគេបោះឆ្នោត ដូច្នេះយើងប្រៀបធៀបអញ្ចឹងអត់ត្រូវទេ”។
លោកនាយករដ្ឋមន្ត្រី ហ៊ុន សែន ជាអតីតកម្មាភិបាលខ្មែរក្រហម ប៉ុន្តែលោកជាឥស្សរជនម្នាក់ ក្នុងចំណោមឥស្សរជនច្រើនទៀត បានដឹកនាំកម្លាំងទ័ព តស៊ូ ក្រោមការជួយគាំទ្រដោយទ័ពវៀតណាម បានផ្ដួលរំលំរបបខ្មែរក្រហម នៅថ្ងៃ៧មករាឆ្នាំ១៩៧៩ ហើយក្រោយមក លោកបានក្លាយជាឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសនៃរបបប្រជាមានិត្យកម្ពុជា ដោយការលើកបន្ទុបរបស់ក្រុងហាណូយ។
អ្នកវិភាគឯករាជ្យ លោក បណ្ឌិត ឡៅ ម៉ុងហៃ មានប្រសាសន៍ថា ការដឹកនាំរបស់រដ្ឋាភិបាលសព្វថ្ងៃមានលក្ខណៈល្អមួយចំនួន ប៉ុន្តែលោកថា ការគំរាមកំហែងទៅលើគណបក្សប្រឆាំង និងការសម្លាប់មនុស្សក្រៅច្បាប់ទៅលើអ្នកដែលហ៊ានរិះគន់រដ្ឋាភិបាលនៅតែកើតមានមិនអាចប្រកែកបាន ៖ “របៀបគ្រប់គ្រងហ្នឹង ហើយមធ្យោបាយគ្រប់គ្រង ដូចជាវិធានការតទល់ ឬក៏ធ្វើអោយខាងអ្នកប្រឆាំងហ្នឹងទន់ខ្សោយ ឬក៏បំបិទមាត់អ្នកប្រឆាំង ឬក៏បង្ក្រាបអ្នកប្រឆាំង គេឃើញមានអញ្ចឹងមែន”។
លោកនាយករដ្ឋមន្ត្រី ហ៊ុន សែន បានបាត់បង់អំណាចម្ដងរួចហើយ បន្ទាប់ពីការបោះឆ្នោតជាតិអាណត្តិទី១ ឆ្នាំ១៩៩៣ ប៉ុន្តែក្រោមការសម្របសម្រួលរបស់អតីតព្រះមហាក្សត្រ សម្តេចសីហនុ បានផ្តល់អំណាចឲ្យ លោក ហ៊ុន សែន ត្រូវបានតែងតាំងជានាយករដ្ឋមន្ត្រីទី២ បន្ទាប់ពីសម្ដេចក្រុមព្រះ៕
No comments:
Post a Comment
yes