បន្ទាយមានជ័យៈ លោក នាយករដ្ឋមន្ត្រី ហ៊ុន សែន បានបញ្ចេញប្រតិកម្មចំពោះគម្រោងច្របាច់បញ្ចូលគ្នា រវាងគណបក្សប្រឆាំងពីរ គឺគណបក្សសម រង្ស៊ី និងគណបក្សសិទ្ធិមនុស្ស ជាការឆ្លើយតប ទៅនឹងអ្វីដែលនាយករដ្ឋមន្ត្រី កាន់អំណាចជិត ៣០ ឆ្នាំរូបនេះ បានអធិប្បាយថា ជាការ «អួតក្អេងក្អាង» តែមិនអាចយកឈ្នះគណបក្សប្រជាជនកម្ពុជាបានឡើយ។
បន្ទាប់ពីលទ្ធផលបណ្តោះអាសន្ននៃការបោះឆ្នោតឃុំ សង្កាត់ កាលពីថ្ងៃអាទិត្យ ដែលបើតាមអង្គការឃ្លាំមើលការបោះឆ្នោត ខុម ហ្វ្រែល បានបង្ហាញថា គណបក្សប្រជាជន បានឈ្នះឆ្នោតភ្លូកទឹកភ្លូកដី រហូតដល់៦១,៦៧ភាគរយ ហើយគណបក្សប្រឆាំងពីរទទួលបានសំឡេងឆ្នោត២០,៦៣ភាគរយ និង ៩,៩៥ ភាគរយនោះមក គណបក្សសមរង្ស៊ី និងគណបក្សសិទ្ធិមនុស្ស បានប្រកាសពីគោលជំហររបស់ពួកគេក្នុងការច្របាច់គណបក្សទាំង ពីរបញ្ចូលគ្នា ដើម្បីឲ្យមានកម្លាំងខ្លាំង ក្នុងការប្រកួតប្រជែងដណ្តើមយកជ័យជម្នះ ពីគណបក្សប្រជាជន នៅក្នុងការបោះឆ្នោតជាតិ នៅឆ្នាំ២០១៣ខាងមុខ។
ថ្លែងសុន្ទរកថាលើកជាដំបូង ក្រោយពីការបញ្ចប់ការបោះឆ្នោតឃុំ-សង្កាត់ នៅក្នុងពិធីបើកការដ្ឋានសាងសង់ផ្លូវជាតិលេខ ៥៦ ពីក្រុងសិរីសោភ័ណ ខេត្តបន្ទាយមានជ័យ ទៅដល់ក្រុងសំរោង ខេត្តឧត្តរមានជ័យ កាលពីថ្ងៃព្រហស្បតិ៍ម្សិលមិញ លោកហ៊ុន សែន បានធ្វើការរិះគន់មិនចំឈ្មោះ ដល់គណបក្សប្រឆាំងពីរ ដោយហៅថាមួយជា«គណបក្សប្រឆាំង» ដែលគេដឹងថា សំដៅទៅលើគណបក្សសម រង្ស៊ី និងមួយទៀតហៅថា ជា«គណបក្សបញ្ឆោត» ជាការសំដៅទៅលើគណបក្សសិទ្ធិមនុស្សនោះថា ទោះបីគណបក្សទាំងពីររួមគ្នា ក៏មិនបានសំឡេងប្រហែលគណបក្សប្រជាជនដែរ។
លោកនាយករដ្ឋមន្ត្រី និយាយថា៖ «គេថា គេរួបរួមគ្នាដើម្បីយកឈ្នះពួកផ្តាច់ការ តែខ្ញុំសូមផ្តាំទៅបក្សទី២ ដើម្បីបានស្មើបក្សប្រជាជន ត្រូវការ២ លាន ៤ សែនសំឡេងទៀត។ រកបានហ្អេ? ឯបក្សទី ៣ ដែលកំពុងលេចមុខ ក្នុងក្រុមប្រឹក្សាឃុំសង្កាត់ តែអួតក្អេងក្អាងណាស់។ បើចង់បានស្មើ កុំអាលយកឈ្នះ ត្រូវការជាង ៣ លានសំឡេងទៀតហើយបើលោកឯងបូកទាំង ២ នាក់ទៅ នៅខ្វះជិត ២ លានសំឡេងទៀត»។
លោកបន្តថា ទោះខំប្រឹងប្រែងយ៉ាងណា ក៏បក្សនយោបាយទាំងពីរនេះ នៅតែមិនអាចតាមទាន់គណបក្សប្រជាជន នាអាណត្តិក្រោយនេះដែរ ព្រោះគណបក្សកាន់អំណាច មានសមាជិកគាំទ្រច្រើន និងបានកសាងនូវទំនុកចិត្តជូនប្រជាពលរដ្ឋយូរមកហើយ។
លោកក៏បានលើកឡើងពីតួលេខបណ្តោះអាសន្ន នៃការបោះឆ្នោតឃុំសង្កាត់ ដែលបង្ហាញថា គណបក្សប្រជាជន មានប្រៀបខ្លាំងជាងគណបក្សទាំងពីរនេះ និងសំឡេងបានកើនលើសពីការបោះឆ្នោតឃុំ-សង្កាត់ឆ្នាំ ២០០៧។ លោកហ៊ុន សែនបញ្ជាក់ថា៖ «ខ្ញុំសូមជម្រាប នេះមិនមែនរឿងតូចតាចទេ...គណបក្សប្រជាជន កើន ២៩០អាសនៈទូទាំងប្រទេស»។
លោកនាយករដ្ឋមន្ត្រី ក៏បានថ្លែងផ្តាំផ្ញើទៅលោកសម រង្ស៊ី ផងដែរថា កុំព្យាយាមចង់ជួបចរចា ជាមួយហ៊ុន សែនតទៅទៀត ព្រោះលោក សម រង្ស៊ីខ្លួនឯង បានចោទប្រកាន់លោកថា ជាអាយ៉ងរបស់រដ្ឋាភិបាលប្រទេសវៀតណាមទៅហើយ ដែលសំដីនេះធ្លាប់ត្រូវបាន មេដឹកនាំសម័យខ្មែរក្រហម លោក ខៀវ សំផន រិះគន់ឲ្យលោកដូច្នេះដែរ។ លោកថ្លែងបែបនេះថា៖«មានអ្នកទោសនិរទេសខ្លួនម្នាក់ គេថា គេមិនចង់ចរចាជាមួយហ៊ុន សែន ព្រោះគ្រាន់តែជាអាយ៉ងគេ ត្រូវតែចរចាជាមួយវៀតណាម ដែលអាចបញ្ជាហ៊ុន សែនបាន។ តិចថ្ងៃក្រោយសរសេរសំបុត្រឲ្យភ្នាក់ងារមកចរចាជាមួយខ្ញុំ ខ្ញុំអត់ទេ។ ខ្ញុំអាយ៉ង ខ្ញុំគ្មានសិទ្ធិទេ។ សំឡេងភាគច្រើនរបស់ប្រជាជនខ្មែរ ទើបមានសិទ្ធិលើហ៊ុន សែន។ មានតែសំឡេងប្រជាជន ទើបអាចទម្លាក់ហ៊ុន សែនបាន»។
ទោះបីជាមានការលើកឡើងពីបក្សប្រឆាំងថា ការបោះឆ្នោតមិនត្រឹមត្រូវ និងមិនមានតម្លាភាពក្តី ក៏លោក ហ៊ុន សែន បាន សរសើរ និងអរគុណដល់កងកម្លាំងប្រដាប់អាវុធ អាជ្ញាធរ និងមន្ត្រីរៀបចំការបោះឆ្នោតថា បានរៀបចំការបោះឆ្នោតប្រព្រឹត្តទៅដោយ«សេរី យុត្តិធម៌ គ្មានហិង្សា និងការវាយតប់គ្នាដោយអាវុធ» ខុសពីកាលឆ្នាំ ១៩៩៣ ដែលការបោះឆ្នោតរៀបចំឡើងដោយអ៊ុនតាក់។
លោក យឹម សុវណ្ណ អ្នកនាំពាក្យគណបក្សសម រង្ស៊ី បានសម្តែងការសប្បាយរីករាយ ចំពោះការថ្លែងរបស់លោក ហ៊ុន សែន ជាអ្វីដែលមន្ត្រីបក្សប្រឆាំងរូបនេះ បានអធិប្បាយថា គណបក្សកាន់អំណាចកំពុងភ័យខ្លួន នៅពេលដែលឮថា គណបក្សប្រឆាំងរួបរួមគ្នា។ លោកនិយាយថា ៖ «អ្វីដែលនាយករដ្ឋមន្ត្រីលើកឡើង គឺខ្ញុំសប្បាយចិត្តទៅវិញទេ។ គាត់បារម្ភពីកម្លាំងអ្នកប្រជាធិបតេយ្យទាំងអស់ ប្រមូលផ្តុំគ្នាដើម្បីប្រកួត ១ទល់នឹង ១ ជាមួយបក្សប្រជាជន ពេលនោះ យើងនឹងទទួលបានជ័យជម្នះ នៅក្នុងការបោះឆោ្នតឆ្នាំ ២០១៣ មិនខាន»។
ចំណែកឯ លោក កឹម សុខា ប្រធានគណបក្សសិទ្ធិមនុស្ស បានថ្លែងថា ការដែលលោកហ៊ុន សែន ថា លោកក្អេងក្អាងនោះ គឺត្រឹមត្រូវ ព្រោះលោកពេញចិត្ត នឹងលទ្ធផលដែលគណបក្សរបស់លោកទទួលបាន ពីព្រោះវាជាសំឡេងដែលពលរដ្ឋផ្តល់ឲ្យដោយគ្មានការការទិញទឹក ចិត្ត។ លោកនិយាយថា៖ «ការឈ្នះដោយមិនថ្លៃថ្នូរ ជារឿងអន់បំផុត។ ឈ្នះដោយអាជ្ញាធរមូលដ្ឋាន គណៈកម្មាធិការជាតិរៀបចំការបោះឆ្នោតលម្អៀងនោះ វាមិនថ្លៃថ្នូរទេ»។
កាលពីម្សិលមិញ គណបក្សសិទ្ធិមនុស្ស បានចេញសេចក្តីថ្លែងការណ៍មួយ ដោយទទូចសូមឲ្យផ្លាស់ប្តូរ គណៈកម្មាធិការជាតិរៀបចំការបោះឆ្នោត និងរៀបចំនីតិវិធីបោះឆ្នោតមួយ ឲ្យមានប្រសិទ្ធភាព ដោយធានាឲ្យបាននូវសិទ្ធិរបស់ប្រជាពលរដ្ឋខ្មែរ ក្នុងការធ្វើការបោះឆ្នោតបានដោយសេរី ត្រឹមត្រូវ និងយុត្តិធម៌។
លោក កឹម សុខា បន្តថា បក្សប្រឆាំងធំទាំងពីរនេះ អាចនឹងបានសំឡេងគាំទ្រច្រើន បើសិនជាអ្នកមានឈ្មោះបោះឆ្នោត បានទៅបោះឆ្នោតគ្រប់ៗគ្នា។ ការមិនបោះឆ្នោត ព្រោះអ្នកទាំងនោះធុញទ្រាន់នឹងការបោះឆ្នោតដែលមាននីតិវិធី ស្មុគស្មាញ។
លោកសុខ ទូច អ្នកវិភាគនយោបាយឯករាជ្យ មើលឃើញថា ការរួបរួមរបស់គណបក្សប្រឆាំងទាំងពីរជាការឈានទៅរកចំណុចវិជ្ជមានមួយ ក្នុងនយោបាយរបស់កម្ពុជា។ លោកថ្លែងថា៖«គណបក្សរឹតតែតិច គឺងាយស្រួលប្រជាជនក្នុងការជ្រើសរើសមើលគោលនយោបាយណាមួយល្អ ហើយកម្រិតប្រកួតប្រជែង កាន់តែមានលក្ខណៈធំ។ បើមានបក្សច្រើន ធ្វើឲ្យអ្នកនយោបាយជិះសេះលែងដៃ មិនយកចិត្តរាស្ត្រ ព្រោះសំឡេងប្រមូលផ្តុំតែគណបក្សធំ»៕
No comments:
Post a Comment
yes