លោកណុប បាយ៉ារិទ្ធ
រាជធានីភ្នំពេញ ៖ លោកណុប បាយ៉ារិទ្ធ ជាតារាចម្រៀងពេញនិយមសម្រាប់យុវវ័យ បានចាក់ឫសយ៉ាងជ្រៅជាច្រើនឆ្នាំមកហើយនៅផលិតកម្មហង្សមាស ។ ពេលនេះលេចឮថា លោកត្រៀមខ្លួនចាកចេញពីផលិតកម្មធំមួយនេះហើយ ។តើរឿងនេះពិតមែនឬយ៉ាងណា ហើយបើពិតតើមកពីហេតុអ្វី ?
តាមមិត្តរួមការងារជាមួយលោក ណុប បាយ៉ារិទ្ធ ម្នាក់ដែលសុំមិនបញ្ចេញឈ្មោះបានប្រាប់កោះសន្តិភាពឱ្យដឹងថា លោក ណុប បាយ៉ារិទ្ធ កំពុងត្រៀមខ្លួនចាកចេញពីផលិតកម្មរស្មីហង្សមាសទៅចុះកិច្ចសន្យាជាមួយផលិតកម្មថ្មីមួយដែលកំពុងតែរៀបចំជិតរួចរាល់ហើយ ។
ទោះជាយ៉ាងណាក្តីប្រភពនេះមិនហ៊ានបញ្ជាក់ឈ្មោះផលិតកម្មថ្មីនោះទេ ដោយគ្រាន់តែប្រាប់ថា ផលិតកម្មនោះកំពុងតែប្រមូលផ្តុំតារាចម្រៀងប្រុសស្រីជាច្រើននាក់ ក្នុងនោះលោក ណុប បាយ៉ារិទ្ធ ក៏មានឈ្មោះផងដែរ ។ទាក់ទិនទៅនឹងបញ្ហានេះយើងមិនអាចទទួលការបកស្រាយពីលោក ណុប បាយ៉ារិទ្ធ បានទេ ព្រោះទូរស័ព្ទរបស់លោកបិទ ។
អ្នកគាំទ្រលោក ណុប បាយ៉ារិទ្ធ មួយចំនួននិយាយថាលោកទំនងមិនចាកចេញពីហង្សមាសទេ ព្រោះផលិតកម្មថ្មីមិនអាចឱ្យលោកល្បីដូចហង្សមាសទេ ។ កន្លងមកផលិតកម្មថ្មីៗជាច្រើនបើកមិនបានប៉ុន្មានផង ស្រាប់តែក្ស័យទុន និងបិទទ្វារទៅវិញ ដូច្នេះរឿងអ្វីលោកណុប បាយ៉ារិទ្ធ ទៅប្រថុយជាមួយផលិតកម្មថ្មីនោះ ។ ម៉្យាងថ្មីៗនេះបទចម្រៀងរបស់លោកបានដំណើរការយ៉ាងរលូន ហើយបើសិនជាលោកចេញមែននោះបទចម្រៀងរបស់លោកប្រហែលជាមិនមានលក់នៅលើទីផ្សារទេ ។ អ្នកគាំទ្រម្នាក់និយាយថា «វាមិនអាចទេ ដែលលោក ណុប បាយ៉ារិទ្ធ លែងត្រីរ៉ស់ទៅចាប់ត្រីកំផ្លៀញនោះ» ។
កាន់តែច្បាស់ជាងនេះលោកទី តូ ដែលជាជំនួយការនៅផលិតកម្មហង្សមាសបានបញ្ជាក់ថា «លោកណុប បាយ៉ារិទ្ធ មិនចេញទៅណានោះទេ ហើយពេលនេះគាត់កំពុងតែមានការមមាញឹកនឹងការងាររបស់គាត់ផងដែរ ទាំងការបញ្ចូលសំឡេងក្នុងស៊ីឌី និងការសម្តែងផងដែរ» ។ក្នុងឆ្នាំ២០១២នេះ ផលិតកម្មរស្មីហង្សមាសប្រមូលផ្តុំតារាចម្រៀងថ្មីថែមជាច្រើននាក់ទៀតមាន កញ្ញា ទេព បូព្រឹក្ស លោក នៅ ស៊ីនឿន អ្នកនាង យក់ ឋិតរដ្ឋា និងលោកសូណូ ដើម្បីពង្រីកខ្លួនឱ្យកាន់តែខ្លាំងឡើង ។ ដោយសាររឿងនេះ មានព័ត៌មានជាច្រើនទាក់ទងទៅនឹងតារាចាស់ៗថា អន់ចិត្តជាមួយផលិតកម្មដែលយកចិត្តទុកដាក់ចំពោះតារាថ្មីៗ ចំណែកតារាចាស់ៗវិញមិនសូវរវីរវល់ ។
ដូច្នេះហើយធ្វើឱ្យតារាមួយចំនួនចង់ចាកចេញពីផលិតកម្មទៀតផង គឺពីដំបូងកញ្ញា ពេជ្រ សោភា បន្ទាប់មកលេចឮថា លោក ឆន សុវណ្ណរាជ ងាកទៅចូលផលិតកម្មថោន ។ ទោះជាយ៉ាងណាក្តីសាមីខ្លួន និងខាងក្រុមហ៊ុនបានច្រានចោលទាំងស្រុងអំពីដំណឹងនៃការចាកចេញនេះ ។ ចំពោះលោក ណុប បាយ៉ារិទ្ធ ចាកចេញពីផលិតកម្មរស្មីហង្សមាស ឬមិនចាកចេញនោះ អ្នកគាំទ្រនឹងរង់ចាំមើលតទៅទៀត ៕
No comments:
Post a Comment
yes