រថយន្ដ ហ៊ីលុច្ស ផ្ទុះកង់ក្រោយ ក្រឡាប់ របួសធ្ងន់ស្រាល ជាង ១០នាក់

ពោធិ៍សាត់ ៖ អ្នកធ្វើដំណើរ តាមរថយន្ដម៉ាក តូយ៉ូតា ហ៊ីលុច្ស ពាក់ស្លាកលេខ បាត់ដំបង 2A 4850 ជាង ១០នាក់ មានក្មេង ចាស់ ប្រុស ស្រី ក្ន្នុងមួយគ្រួសារ បាន រងរបួសធ្ងន់ស្រាល ដោយសារគ្រោះថ្នាក់ចរាចរ ក្រឡាប់រថយន្ដពីលើផ្លូវជាតិលេខ៥ កាលពីវេលាម៉ោង៥និង ៣០នាទី ល្ងាចថ្ងៃទី៤ ខែកក្កដានេះ លើកំណាត់ផ្លូវជាតិ លេខ៥ ស្ថិតនៅក្នុងភូមិសាលាគម្រូ សង្កាត់ព្រៃញី ក្រុងពោធិ៍សាត់  ខេត្ដពោធិ៍សាត់ ដោយសារតែរថយន្ដផ្ទុះកង់ខាងក្រោយ ផ្នែកខាងឆ្វេង ។

សាក្សីដែលបាន ឃើញហេតុការណ៍នេះ បានឱ្យដឹងថា ខណៈរថយន្ដខាងលើកំពុងដឹក មនុស្សពេញ ទំនងធ្វើដំណើរពីភ្នំពេញ ទៅតាមបណ្ដាខេត្ដជាប់ព្រំដែន ស្រាប់ តែដល់កន្លែងកើតហេតុ ក៏ផ្ទុះកង់ខាងក្រោយ ស្របពេលដែល រថយន្ដបើកលឿន បណ្ដាលឱ្យក្រឡាប់ធ្លាក់ពីលើផ្លូវ ចម្ងាយប្រហែល ៥០ម៉ែត្រ រងរបួសធ្ងន់ ស្រាល ប៉ុន្ដែគ្មានអ្នកស្លាប់នោះឡើយ។

យ៉ាងណាក៏ដោយ មន្ដ្រីនគរបាលចរាចរ ដែលចុះទៅអន្ដរាគមន៍ នៅកន្លែងកើតហេតុ មិនទាន់បានបញ្ជាក់ពីអត្ដសញ្ញាណ ជនរងគ្រោះ នៅឡើយទេ គ្រាន់តែដឹងថា អ្នកបើកបរមានឈ្មោះ អែល វណ្ណៈ ភេទប្រុស អាយុ ៣៤ឆ្នាំ បច្ចុប្បន្នរស់នៅភូមិទ្រា សង្កាត់ស្ទឹងមានជ័យ ខណ្ឌមានជ័យ៕