ថ្ងៃ​អវសាន​របស់​អ៊ី​ន​ធឺ​ណេ​ត​នឹង​មកដល់​នៅ​ថ្ងៃ​ចន្ទ​ក្រោយ​ដោយសារតែ​មេរោគ​មួយ​បង្កើតឡើង​ដោយ​ជនជាតិ​អេ​ស្តូ​នី​

ថ្ងៃ​អវសាន​របស់​អ៊ី​ន​ធឺ​ណេ​ត​នឹង​មកដល់​នៅ​ថ្ងៃ​ចន្ទ

អ្នកប្រើប្រាស់​អ៊ី​ន​ធឺ​ណេ​ត​រាប់លាន​នាក់​ទូទាំង​ពិភពលោក​អាច​នឹងត្រូវ​ដាច់ចេញពី​អ៊ី​ន​ធឺ​ណេ​ត (Offline) នៅ​ថ្ងៃ​ចន្ទ​ក្រោយ​ដោយសារ Virus មួយ​ដែល​លាក់ខ្លួន​នៅក្នុង​កុំព្យូទ័រ​របស់​ពួកគេ​អស់​ជាង​មួយឆ្នាំ​មកហើយ ។ 

​អាជ្ញាធរ​ព័ត៌មាន និង ទូរគមនាគមន៍​អូស្ត្រាលី (ACMA) បាន​ចេញមក​ព្រមាន​អ្នកប្រើប្រាស់​អ៊ី​ន​ធឺ​ណេ​ត​អំពី​ចំណែក​នៃ​សូ​ហ្វ​វែ​មេរោគ​មួយ​ដែល​គេ​ស្គាល់​ថា "Domain Name System Changer" ឬ "DNSChanger" ដែល​ត្រូវបាន​ដំឡើង​ស្ងាត់ៗ​ដោយ​ក្រុម Hacker ជនជាតិ​អេ​ស្តូ​នី ។​

​មេរោគ​នេះ​នឹង​អនុញ្ញាត​ឲ្យ​ក្រុម Hacker គ្រប់គ្រង​ប្រព័ន្ធ DNS ជា​ប្រព័ន្ធ​មួយ​ដែល​អាច​ឲ្យ​អ្នកប្រើប្រាស់​ចូលទៅ​ប្រើ​អ៊ី​ន​ធឺ​ណេ​ត និង ផ្ញើ​អ៊ីមែល ក្នុង​គោលបំណង​ប្រព្រឹត្ត​សកម្មភាព​ឧក្រិដ្ឋ​នានា​រួមមាន​ទាំង​ការបោកប្រាស់​តាម​អ៊ី​ន​ធឺ​ណេ​ត​ផងដែរ ។​

​ក្រុម​អាជ្ញាធរ​អាមេរិក និង អេ​ស្តូ​នី​បាន​នឹង​កំពុង​សហការគ្នា​លើ​បញ្ហា​នេះ​ចាប់តាំងពី​ខែវិច្ឆិកា​ឆ្នាំមុន​មកម្ល៉េះ ដោយ​ភ្នាក់ងារ FBI កំពុងតែ​រៀបចំ​ការគ្រប់គ្រង Sever ដែល​ឆ្លង​មេរោគ​បណ្តោះអាសន្ន​ដើម្បី​អនុញ្ញាត​ឲ្យ​អ្នកប្រើប្រាស់​អាច​ចូលទៅ​ប្រើ​វេ​ប​សាយ​បាន ។​

​យោងតាម​ស្ថាប័ន Internet Systems Consortium ជា​ស្ថាប័ន​មួយ​គ្រប់គ្រង​ប្រតិបត្តិ​ប​ការ​នានា​របស់​វេ​ប​សាយ​បាន​ឲ្យ​ដឹងថា ការរៀបចំ​ការគ្រប់គ្រង Sever បណ្តោះអាសន្ន​នេះ​នឹង​បញ្ចប់​នៅ​ម៉ោង ២ រសៀល នៅ​ថ្ងៃ​ចន្ទ​ទី ៩ កក្កដា ២០១២  (​ម៉ោង​នៅ​អូស្ត្រាលី​) នៅពេលដែល​កុំព្យូទ័រ​ជាច្រើន​ដែល​ត្រូវបាន​វាយប្រហារ​ដោយ​មេរោគ DNSChanger ពុំ​អាច​ចូលទៅ​សេវាកម្ម​អ៊ី​ន​ធឺ​ណេ​ត​បាន​តទៅទៀត ។​

ACMA ព្យាករណ៍​ថា ប្រជាជន​អូស្ត្រាលី ៦ ពាន់​នាក់​នឹងរង​ផលប៉ះពាល់ ។ អ្នកគ្រប់គ្រង e-Security នៅ ACMA លោក ប្រ៊ូ​ស ម៉ាត់​ស៊ូ បាន​និយាយថា "​យើង​រំពឹងថា​អ្នកប្រើប្រាស់​អ៊ី​ន​ធឺ​ណេ​ត​នឹង​មានការ​ភ័ន្ត​ភាំង​ថា​ហេតុអ្វី​បានជា​ពួកគេ​មិនអាច​ប្រើ​អ៊ី​ន​ធឺ​ណេ​ត​បាន​បន្ទាប់​ពីថ្ងៃ​ចន្ទ ហើយ​ច្បាស់​ជា​ទាក់ទង​ទៅ​ក្រុមហ៊ុន​ផ្តល់​សេវាកម្ម​អ៊ី​ន​ធឺ​ណេ​ត (ISP) ឲ្យ​មក​ពិនិត្យមើល​អ៊ី​ន​ធឺ​ណេ​ត​របស់ខ្លួន​ជាមិនខាន​" ។​

ACMA ក៏បាន​ក្រើនរំលឹក​ដល់​អ្នកប្រើប្រាស់​ទាំងអស់​ឆែក​មើល​សូ​ហ្វ​វែ​ល​ភ្ជាប់​អ៊ី​ន​ធឺ​ណេ​ត (Router) តាម Wireless របស់​ពួកគេ​ផងដែរ ព្រោះ​មេរោគ​អាច​នឹង​ផ្លាស់ប្តូរ Settings របស់ Router ។ ប្រសិនបើ Router របស់​អ្នក​នៅតែ​ប្រើ Login ដែល​ផ្តល់​ដោយ​ក្រុន​ហ៊ុន​ផលិត​សូ​ហ្វ​វែ Router នោះ​អ្នក​ត្រូវតែ​ឆែក​មើល​វា ។​

​ប្រៀបធៀប  DNS settings របស់ Router របស់​អ្នក​ទៅនឹង DNS server settings របស់​ជនខិលខូច ។ ប្រសិនបើ Router របស់​អ្នក​កំពុងតែ​ប្រើ DNS settings មួយ ឬ​ច្រើន នោះ Network របស់​អ្នក​ប្រហែលជា​បាន​ឆ្លង​មេរោគ​បាត់ទៅហើយ ។ ការណែនាំ​សម្រាប់ធ្វើ​ការផ្លាស់ប្តូរ  DNS settings នឹង​ប្រែប្រួល​ទៅតាម​ក្រុមហ៊ុន​ដែល​ផលិត​សូ​ហ្វ​វែ​ល Router ៕