កសិករកំពុងប្រមូលផលសណ្តែកសៀង នៅប្រទេសអាហ្សង់ទីន។
តម្លៃសណ្តែកសៀងកំពុងឡើងថ្លៃ។ Bloomberg
អាមេរិកៈ តម្លៃសណ្តែកសៀងឡើងថ្លៃដល់តម្លៃខ្ពស់បំផុត ខណៈក្រុមហ៊ុននាំចូល កំពុងតែចាត់វិធានការធានាសន្តិសុខស្តុកសណ្តែកសៀងនៅអាមេរិក ដោយសារក្តីបារម្ភថា ការប្រមូលផលសណ្តែកសៀងនៅក្នុងប្រទេសនេះ នឹងមានបរិមាណតិចជាងការព្យាករលើកចុងក្រោយរបស់រដ្ឋាភិបាល បន្ទាប់ពីគ្រោះរាំងស្ងួតដ៏អាក្រក់ ដែលមិនធ្លាប់កើតមានក្នុងរយៈពេល៥០ឆ្នាំ បានបំផ្លាញដំណាំជាច្រើនហិកតា។
តម្លៃសណ្តែកសៀងសម្រាប់នាំចេញនៅខែវិច្ឆិកា បានកើនឡើង១,១ភាគរយ ដល់ ១៧,០១២ ដុល្លារក្នុងមួយប៊ូសែល(២៧,២១៦គីឡូក្រាម)នៅផ្សារហ៊ុនឈីកាហ្គោ។
សណ្តែកសៀងក្នុងកិច្ចសន្យាអនាគតមានតម្លៃ ១៦,៩៨៧ដុល្លារក្នុងមួយប៊ូសែល នៅប្រទេសសិង្ហបុរី។
អាមេរិកជាប្រទេសដាំដំណាំសណ្តែកសៀងច្រើនជាងគេក្នុងឆ្នាំ ២០១១-២០១២។
ធញ្ញជាតិប្រេង ដែលគេយកទៅកិនបំបែកដើម្បីផលិតជាប្រេងឆា និងចំណីសត្វនេះ បានឡើងថ្លៃ ៤១ភាគរយនៅឆ្នាំនេះ ពោលគឺជាកំណើនថ្លៃខ្ពស់បំផុតនៅលើសន្ទស្សន៍ GSCI នៃតម្លៃទំនិញទាំង២៤មុខរបស់ក្រុមហ៊ុន Standard & Poor។
គ្រោះរាំងស្ងួត ដែលបានធ្វើឲ្យដំណាំពោតក្រៀមស្វិតនៅអាមេរិកផងដែរនោះ បានជំរុញឲ្យតម្លៃស្បៀងអាហារពិភពលោក កើនឡើងខ្ពស់បំផុតកាលពីខែកក្កដា គិតចាប់តាំងពីឆ្នាំ២០០៩មក។
ក្រសួងកសិកម្មអាមេរិក បានឲ្យដឹងកាលពីថ្ងៃចន្ទថា បរិមាណសណ្តែកសៀងរបស់អាមេរិក ដែលគ្រោងនឹងនាំចេញ បានកើនឡើង៣៦ភាគរយ នៅសប្តាហ៍ដែលបញ្ចប់ទៅនៅថ្ងៃទី១៦ ខែសីហាកន្លងទៅនេះ។
លោក Victor Thianpiriya អ្នកយុទ្ធសាស្រ្តទំនិញកសិកម្មប្រចាំក្រុមហ៊ុន Australia & New Zealand Banking Group Ltd មានប្រសាសន៍ថា៖ «យើងមិនអាចទទួលបានទិន្នផលតាមកម្រិត ដែលយើងយល់ថាគ្រប់គ្រាន់សម្រាប់ចែកចាយទៅតាមតម្រូវការ ដើម្បីជួយរក្សាតុល្យភាពពិភពលោកនោះទេ»។ លោកបានឲ្យដឹងតាមទូរស័ព្ទពីប្រទេសសិង្ហបុរីថា ស្បៀង នឹងមានតម្លៃខ្ពស់បំផុតមួយរយៈមុនពេលតម្រូវការស្បៀងធ្លាក់ចុះ ។
តម្លៃសណ្តែកសៀងសម្រាប់ចែកចាយនៅខែធ្នូ បានកើនឡើង១,៣ភាគរយដល់តម្លៃខ្ពស់បំផុត ៥១៩,៤០ដុល្លារក្នុងបរិមាណ២ពាន់ផោន មុនពេលទិញលក់ក្នុងតម្លៃ ៥១៨,៩០ដុល្លារ៕ BP
No comments:
Post a Comment
yes