លោក សម រង្ស៊ី ជាអ្នកស្នេហាជាតិ និងស្រលាញ់ប្រជាពលរដ្ឋពិតប្រាកដ មិនមែន ដូចរដ្ឋាភិបាលសព្វថ្ងៃដែលធ្វើអ្វីដើម្បីផលប្រយោជន៏ខ្លួន មិនគិតជាតិនិងរាស្រ្តជាធំ

លោក សម រង្ស៊ី ប្រធាន គណបក្ស សម រង្ស៊ី

 និងជាប្រធាន ចលនាប្រជាធិបតេយ្យសង្គ្រោះជាតិ

« ពូជជិនវង្ស គឺមិនស្លាប់នោះទេគ្រាន់តែកុំសត់បន្តិច » នេះគឺជាការលើកឡើងរបស់លោក សម រង្ស៊ី ប្រធានគណបក្ស​ សម រង្ស៊ី និងជាប្រធាន ចលនាប្រជាធិបតេយ្យសង្គ្រោះជាតិ ក៏ដូចជា​ប្រ​ធាន គណបក្ស សង្គ្រោះជាតិ ទៅថ្ងៃខាងមុខផងដែរ ដែលតែងតែធ្វើការជំរាបជូនដល់សកម្មជន សមាជិក-ថ្នាក់ដឹកនាំ និងប្រជាពលរដ្ឋដែលជាអ្នកគាំទ្រគណបក្ស​ សម រង្ស៊ី ។

អ្វីដែលជាការលើកឡើងរបស់លោក សម រង្ស៊ី គឺជាការពិតព្រោះពីមុនគណបក្ស​ សម រង្ស៊ី និង រូបលោក សម រង្ស៊ី ផ្ទាល់គឺស្ថិតនៅក្នុងសភាពមួយដែលទទួលរងការវាយប្រហារ ទាំងផ្នែក​អារម្ម​ណ៏ និងទង្វើជាក់ស្តែង របស់គណបក្សកាន់អំណាចសព្វថ្ងៃ ដែលខំប្រឹងរកគ្រប់វិធីដើម្បីបំផ្លាញ គណបក្ស​ សម រង្ស៊ី និងបញ្ចប់ជីវិតនយោបាយរបស់លោក សម រង្ស៊ី ។

ការខិតខំប្រឹងប្រែងតស៊ូ និងអត់ធ្មត់របស់សកម្មជន និងថ្នាក់ដឹកនាំគណបក្ស​ សម រង្ស៊ី  ជាពិ​សេស​គឺ​រូបលោក សម រង្ស៊ី ផ្ទាល់តែម្តង បានធ្វើឲ្យគណបក្ស​ សម រង្ស៊ី ទទួលបានការគាំទ្រពី​សំណាក់ប្រជាពលរដ្ឋទាំងក្នុងប្រទេស និងក្រៅប្រទេសកាន់តែច្រើនឡើងៗ ជាពិសេសគឺ​កាល​ពីពេលកន្លងទៅថ្មីៗនេះ ​ការខិតខំប្រឹងប្រែងរបស់គណបក្ស សម រង្ស៊ី ដែលមានរូបលោក សម រង្ស៊ី ជាប្រធាន បានទទួលនូវភាពជោគជ័យ នៃការអំពាវនាវរបស់គណបក្ស សម រង្ស៊ី ដែលជា​គោលជំហរឥតងាករ៉េ សុំឲ្យអ្នកប្រជាធិបតេយ្យ ស្រលាញ់ជាតិ និងស្នេហាជាតិទាំងអស់ មក​ចូលរួមជាមួយនិងគណបក្ស​ សម រង្ស៊ី ដើម្បីយើងធ្វើការរួមគ្នា បញ្ចប់អំណាចសព្វថ្ងៃ ដែលដឹក នាំប្រទេសតាមរបៀបផ្តាច់ការ ។

ជាលទ្ធផលនៃការខិតខំប្រឹងប្រែងនេះ បានធ្វើឲ្យគណបក្ស​ សម រង្ស៊ី និងគណបក្ស សិទ្ធិមនុស្ស បានធ្វើការសម្រេចដឹកដៃគ្នាទៅប្រជុំនៅប្រទេសហ្វីលីពីន ស្តីពីការចងសម្ព័ន្ធភាពគ្នា ហើយជា​លទ្ធផលបន្ទាប់ពីការប្រជុំអស់រយៈពេលពីរថ្ងៃ គឺនៅថ្ងៃទី១៧ ខែកក្កដា ឆ្នាំ២០១២ គណបក្ស សម រង្ស៊ី និង គណបក្ស​ សិទ្ធិមនុស្ស បានសម្រេចធ្វើការប្រកាសជាផ្លូវការនូវការចងសម្ព័ន្ធភាព​ជាមួយគ្នា ដោយជាជំហានដំបូងបានបង្កើត ចលនាប្រជាធិបតេយ្យសង្គ្រោះជាតិ ហើយជា​បន្ត​បន្ទាប់​មកគណបក្សប្រជាធិបតេយ្យទាំងពីរនេះ បានធ្វើការងាររួមគ្នា​ចាប់តាំងពី​ថ្នាក់លើ​រហូត​ដល់ថ្នាក់ក្រោមពី ចលនាប្រជាធិបតេយ្យសង្គ្រោះជាតិ ។ ជំហ៊ានបន្តនិងបង្កើតគណបក្សថ្មី​មួយ​ដើម្បី​ចូល​រួមការបោះឆ្នោតថ្នាក់ជាតិនៅឆ្នាំ២០១៣ខាងមុខ ហើយគណបក្សថ្មីដែល ចលនា​ប្រជា​ធិបតេយ្យសង្គ្រោះជាតិបង្កើត ដើម្បីប្រឡូកក្នុងឆាកនយោបាយ​របស់ប្រទេសកម្ពុជា មាន​ឈ្មោះ​ថាគណបក្ស សង្គ្រោះជាតិ ។

អ្វីដែលជាការគ្រោងទុករបស់គណបក្ស សម រង្ស៊ី និងគណបក្ស សិទ្ធិមនុស្ស ក្នុង ចលនាប្រជាធិ បតេយ្យសង្គ្រោះជាតិ កាលពីថ្ងៃទី១៦ ខែសីហា ឆ្នាំ២០១២ បានជួបប្រជុំជាមួយស្ថាបនិក​របស់​គណបក្ស សង្គ្រោះជាតិ ចំនួន៨០នាក់ ដែលនៅក្នុងការជួបប្រជុំស្ថាបនិករបស់គណបក្ស សង្គ្រោះ​ជាតិ ជា​លើដំបូងនោះ ក៏មានការចូលរួមពីសំណាក់លោក សម រង្ស៊ី ដែលជា​ប្រធាន ចល​នាប្រជាធិបតេយ្យសង្គ្រោះជាតិ ពីប្រទេសបារាំងតាមរយៈ វីដេអូ ខន់ហ្វឺរ៉ុន ផងដែរ ។

សូមជំរាបជូនផងដែរថា នៅក្នុងឱកាសនៃការជួបប្រជុំរបស់ស្ថាបនិកគណបក្ស សង្គ្រោះជាតិ កាលពីថ្ងៃទី១៦ ខែសីហា ឆ្នាំ២០១២ ចំនួន៨០នាក់នោះ អង្គប្រជុំក៏បានសម្រេចបោះឆ្នោត​ជ្រើស​រើសគណៈកម្មាធិការបណ្តោះអាសន្នចំនួន៧នាក់ផងដែរ ដើម្បីដឹកនាំការងារ​របស់​គណ​បក្ស សង្គ្រោះជាតិ ដែលក្នុងនោះការបោះឆ្នោតបានសម្រេចជាឯកឆ្ឆ័នជ្រើសរើសលោក សម រង្ស៊ី ជា​ប្រធាន និងលោក ប៉ុល ហំម ជាអនុប្រធានគណៈកម្មាធិការបណ្តោះអាសន្ន រួមទាំងសមា​ជិក គណៈកម្មាធិការបណ្តោះអាសន្នចំនួន៥នាក់ផ្សេងទៀត ។

បន្តបន្ទាប់មកក្រុមការងាររបស់គណបក្ស សង្គ្រោះជាតិ ក្រោមការដឹកនាំរបស់គណៈកម្មាធិការ បណ្តោះអាសន្នទាំង៧នាក់ បានធ្វើការងារសំខាន់ៗរបស់គណបក្សដោយបានចងក្រងជារចនា សម្ធ័ន្ធរបស់គណបក្ស បទបញ្ជាផ្ទៃក្នុងរបស់គណបក្ស រួមជាមួយនិងការបង្កើតក្រុមការងារ​ពិ​សេស ដើម្បីរៀបចំឯកសារដាក់ទៅក្រសួងមហាផ្ទៃ សុំបង្កើតគណបក្ស​ សង្គ្រោះជាតិ និងចុះបញ្ជី​ឈ្មោះគណបក្សជាផ្លូវការ ។

សូមជំរាបជូនផងដែរថា នៅបន្ទាប់ពី ចលនាប្រជាធិបតេយ្យសង្គ្រោះជាតិ បានបង្កើតឡើង ក្រុម ការងារនៃគណបក្សទាំងពីរ គឺគណបក្ស សម រង្ស៊ី និងគណបក្ស សិទ្ធិមនុស្ស បានចុះទៅតាម មូលដ្ឋានដើម្បីជំរាបជូននូវដំណឹងទាំងអស់នេះជូនទៅដល់ប្រជាពលរដ្ឋដែលជាអ្នកគាំទ្រគណកប្សទាំងពីរក៏ដូចជា សមាជិក-សមាជិការ និងថ្នាក់ដឹកនាំនៅតាមបណ្តាភូមិ-ឃុំ-ស្រុក-ខេត្ត-ខណ្ឌ័ និងរាជធានីផងដែរ ដើម្បីឲ្យពួកគាត់បានជ្រាបជុំវិញការរួមបញ្ចូលគ្នាជាសម្លេងតែមួយរវាងគណ​បក្ស សម រង្ស៊ី ជាមួយគណបក្ស សិទ្ធិមនុស្ស ។

ថ្លែងនៅក្នុងពិធីចុះជួបជាមួយប្រជាពលរដ្ឋ និងសមាជិក-សមាជិការ របស់គណបក្សទាំងពីរ លោក ស៊ុន ឆ័យ ប្រធានក្រុមអ្នកតំណាងរាស្រ្តរបស់គណបក្ស សម រង្ស៊ី បានមានប្រសាសន៏ថា « ការរួមគ្នារវាងគណបក្សទាំងពីរនេះគឺដើម្បីប្រមូលផ្តុំនៃកម្លាំងអ្នកស្នេហាជាតិទាំងអស់ ដើម្បី​យើងយកជ័យជំនះតាមការបោះឆ្នោតប្រជាធិបតេយ្យត្រឹមត្រូវ មិនមែនជាការបោះឆ្នោតប្រជាធិប តេយ្យក្លែងក្លាយ បាត់ឈ្មោះប្រជាពលរដ្ឋ លួចបន្លំសន្លឹកឆ្នោត និងការទិញដូរជាដើម ។ ជា​មួយ​គ្នានោះរដ្ឋាភិបាលត្រូវតែហ៊ានបើកផ្លូវឲ្យលោក សម រង្ស៊ី ចូលមកក្នុងប្រទេសដោយសេរី  ដើម្បី ធ្វើការប្រគួតប្រជែងគ្នាមួយទល់និងមួយដោយយុត្តិធម៌ ហើយការបោះឆ្នោតសំខាន់ណាស់ត្រូវតែ ប្រព្រឹត្តទៅដោយយុត្តិធម៌ » ។

លោក សុន ឆ័យ បានបន្តទៀតថា « គណបក្ស សម រង្ស៊ី និងគណបក្ស សិទ្ធិមនុស្ស រួបរួមគ្នា​ដើម្បីឲ្យមានការផ្លាស់ប្តូររដ្ឋាភិបាលសព្វថ្ងៃនេះចេញ ផ្លាស់ប្តូរអ្នកដឹកនាំ ​ដែលគ្មានការទទួល​ខុស​ត្រូវ មិនចេះស្រលាញ់ជាតិ និងប្រជារាស្រ្ត គិតតែពីសម្បទានដីសេដ្ឋកិច្ច គិតតែពីយក​ដីប្រជា​ពល​រដ្ឋ ទៅឲ្យក្រុមហ៊ុនឯកជន ឈ្មួញទុច្ចរឹត និងប្រព្រឹត្តតែអំពើពុករលួយ » ។

លោក សុន ឆ័យ ថ្លែងថា » ចលនា​ប្រជាធិបតេយ្យសង្គ្រោះជាតិ និងគណបក្ស​ សង្គ្រោះជាតិ និង​ធ្វើ​ឲ្យមានការផ្លាស់ប្តូរពិតប្រាកដ ដើម្បីឲ្យប្រជាពលរដ្ឋរស់នៅបានសមរម្យ មានជីវភាពធូធា មាន​​សិទ្ធិពេញ​លេញ​គ្រប់បែបយ៉ាងក្នុងការបញ្ចេញមតិយោបល់ និងឲ្យជាតិរបស់​យើងមាន​ឈ្មោះបោះសម្លេងនៅលើឆាកជាតិ អន្តរជាតិ ដែលជាប្រទេសប្រកាន់យករបបប្រជាធិបតេយ្យ ផ្តល់​សិទ្ធិអំណាចជូនប្រជាពលរដ្ឋជាធំ » ។

ជាការពិតអ្វីដែលលោក សុន ឆ័យ ប្រធានក្រុមតំណាងរាស្រ្តរបស់គណបក្ស សម រង្ស៊ី បានលើក ឡើងខាងលើនេះ គឺជាអ្វីដែលប្រជាពលរដ្ឋលោកចង់បានជាយូរមកហើយ ព្រោះប្រជាពលរដ្ឋ លោកត្រូវការអ្នកដឹកនាំពិតប្រាដក ដែលស្រលាញ់ប្រទេសជាតិ និងពលរដ្ឋជាធំ ៕