តម្លៃ​មាស​ទីផ្សារ​អន្តរជាតិ​នៅ​តែ​បន្ត​ឡើង​ថ្លៃ​ដល់​៥ថ្ងៃ​ជាប់ៗ​គ្នា

ក្រុងឡុងដ៍ៈ តម្លៃ​មាស​នៅ​តែ​បន្ត​ឡើង​ថ្លៃ​៥​ថ្ងៃ​ជាប់​ៗគ្នា នៅ​ទីក្រុង​ឡុងដ៍​ ដែល​បាន​ឈាន​ដល់​កម្រិត​ខ្ពស់​រយៈ​ពេល​បី​សប្តាហ៍ ខណៈ​ការ​ធ្លាក់​ចុះ​នៃ​តម្លៃ​ប្រាក់​ដុល្លារ​អាមេរិក ធ្វើ​ឲ្យ​មាន​ការ​ចាប់​អារម្មណ៍​ក្នុង​ការ​ទិញ​មាស​។

ដុល្លារ​ធ្លាក់​ចុះ​បើ​ធៀប​នឹង​អឺរ៉ូ មុន​ពេល​នាយក​រដ្ឋ​មន្រ្តី លុចសំ​បួ លោក Jean-Claude Juncker ​ធ្វើ​ទស្សនកិច្ច​ប្រទេស​ក្រិក​នៅ​ថ្ងៃ​នេះ​ ដើម្បី​ពិភាក្សា​អំពី​សំណើ​ដែល​សុំ​ឲ្យ​មាន​ការ​បន្ត​បន្ថែម​នូវ​កម្មវិធី​កែ​សម្រួល​សារពើពន្ធ។

ក្រុមហ៊ុន Lonmin Plc បាន​ឲ្យ​ដឹង​ថា ៣៣​ភាគរយ​នៃ​កម្មករ​នៅ Marikana នៅ​អាហ្វ្រិក​ខាង​ត្បូង ដែល​ជា​ប្រទេស​ផលិត​ប្លាទីន​ធំ​បំផុត បាន​ត្រឡប់​ចូល​ធ្វើ​ការ​វិញ​ហើយ​កាល​ពីថ្ងៃ​ម្សិលមិញ បន្ទាប់​ពី​ការ​ប៉ះ​ទង្គិច​ជាមួយ​នគរបាល​កាល​ពី​សប្តាហ៍​មុន​បាន​ បណ្តាល​ឲ្យ​មាន​អ្នក​ស្លាប់ និង​ជំរុញ​ឲ្យ​តម្លៃ​ប្លាទីន​ឡើង​ថ្លៃ​។

លោក Peter Fertig ​ម្ចាស់​ក្រុមហ៊ុន​ស្រាវ​ជ្រាវ Quantitative Commodity Research Ltd នៅ​ទីក្រុង​ប្រទេស​អាល្លឺម៉ង់ បាន​ថ្លែង​កាលពី​ថ្ងៃ​ម្សិលមិញ​តាម​ទូរស័ព្ទ​ថា៖ «មាស​ក៏​កំពុង​ផ្តល់​ប្រាក់​ចំណេញ​ដោយ​សារ​មាន​ការ​រំពឹង​ថា ប្រហែល​ជា​មាន​ការ​ជួយ​សម្រួល​រូបិយវត្ថុ​ច្រើន​ជាង​មុន​ពី​ធនាគារ កណ្តាល​»។

ការ​លក់​មាស​ភ្លាមៗ​កើន​ឡើង​០,៣​ភាគរយ​ដល់​ ១ ៦២៥,៥២ ដុល្លារ​ក្នុង​មួយ​អោន​កាល​ពីថ្ងៃ​ម្សិលមិញ​នៅ​ទីក្រុង​ឡុងដ៍។​

ធនាគារ​កណ្តាល​គ្រោង​នឹង​ចេញ​ផ្សាយ​កំណត់​ហេតុ​នៃ​កិច្ច​ប្រជុំ​រយៈ ​ពេល​ពីរ​ថ្ងៃ​របស់​ខ្លួន​នៅ​ថ្ងៃ​នេះ ដែល​បាន​បញ្ចប់​កិច្ច​ប្រជុំ​កាល​ពី​ថ្ងៃ​ទី១ សីហា។

ធនាគារ​កណ្តាល​សន្យា​ថា​នឹង​បន្ធូរបន្ថយ​គោលនយោបាយ​បន្ថែម​ទៀត​បើ​ ចាំបាច់​។ ទេសាភិបាល​ធនាគារ​កណ្តាល​អាមេរិក​លោក Ben S Bernanke អាច​នឹង​ពិភាក្សា​អំពី​ជម្រើស​រូបិយ​វត្ថុ​នៅ​សន្និសីទ​មួយ​នៅ Jackson Hole នៅ​ចុង​ខែ​នេះ៕