ភ្នំពេញ ៖ សេចក្ដីរាយការណ៍បានឱ្យដឹងថា រៀងរាល់យប់ថ្ងៃក្រុមឈ្មួញ មានឱកាសដឹកជញ្ជូនត្រីឆ្ដោនិងត្រីរ៉ស់ជាប្រភេទត្រីស៊ីកូនត្រីតូចៗ ជាអាហារចូលទៅលក់ក្នុងយឿត្រីធំៗចំនួន៣នៅរាជធានីភ្នំពេញ កាន់តែអនាធិបតេយ្យខ្លាំងឡើង ហើយវាជាប្រភពសេដ្ឋកិច្ចមិនចេះរីងស្ងួតរបស់លោក សុង ហុង និង លោក ម៉ាញ់ ពៅ ដែលជាប្រធាន-អនុប្រធានអធិការដ្ឋានរដ្ឋបាលជលផលចតុមុខពោលគឺគំនិតពុក រលួយរបស់ជំនាញរដ្ឋបាលជលផលដែលមិនបង្ក្រាបការលួចដឹកជញ្ជូនចែកចាយត្រីឆ្ដោត្រីរ៉ស់ តាមគោលការណ៍របស់ថ្នាក់លើ អាចចាត់ទុកជាកំហុសឆ្គង និងជាអំពើពុករលួយដែលត្រូវតែនាំទៅដាក់ពិន័យជាបន្ទាន់។
ប្រជាពលរដ្ឋបានអះអាងថា ប្រភេទត្រីឆ្ដោនិងត្រីរ៉ស់ រាប់សិបតោនក្នុងមួយថ្ងៃៗត្រូវបានក្រុម ឈ្មួញលួចនាំចូលពីប្រទេសវៀតណាមយ៉ាងអនាធិបតេយ្យ យកទៅលក់ចែកចាយនៅយឿត្រីព្រែកព្នៅ យឿគីឡូលេខ៩ និងយឿច្បារអំពៅ គេមិនដែលឃើញមន្ដ្រីជំនាញនិងសមត្ថកិច្ចពាក់ព័ន្ធចាត់វិធានការបង្ក្រាបជំនួញខុសច្បាប់មួយនេះឱ្យមានប្រសិទ្ធភាពតាមបទបញ្ជារបស់រដ្ឋាភិបាលនោះទេ ព្រោះពួកគេទទួលបានការបន្ដក់ពីក្រុមឈ្មួញជាប់ជាប្រចាំ ហើយអ្វីៗចេះតែដំណើរការដោយរលូនល្អគឺសង្ឃឹមទៅលើអង្គភាពប្រឆាំងអំពើពុករលួយរបស់លោក ឱម យ៉ិនទៀង ប៉ុណ្ណោះ ដែលអាចចាត់វិធានការលុបបំបាត់ភាពអសកម្ម និងពុករលួយយ៉ាងស៊ីជម្រៅរបស់លោក សុង ហុង និងលោក ម៉ាញ់ ពៅ ជាបន្ទាន់ ។
មានការអះអាងផងដែរថា ការចិញ្ចឹមត្រីឆ្ដោឬត្រីរ៉ស់ ត្រូវបានចាត់ទុកជាអំពើខុសច្បាប់ព្រោះវាជាប្រភពធំបំផុតនាំឱ្យមានការបំផ្លាញធនធានមច្ឆជាតិ នៅក្នុងប្រទេសកម្ពុជា ហើយឯកឧត្តមរដ្ឋមន្ដ្រីក្រសួងកសិកម្ម ក៏ធ្លាប់បានអះអាងនៅក្នុងសម័យប្រជុំពេញអង្គគណៈរដ្ឋមន្ដ្រីផងដែរថា ការចិញ្ចឹមត្រីឆ្ដោនិងត្រី រ៉ស់ មិនអាចអនុញ្ញាតបានទេ បើទោះបីមានសំណើសុំដោយប្រើប្រាស់ចំណីសិប្បនិមិត្ដក៏ដោយ ព្រោះកម្ពុជាមិនមានយន្ដការគ្រប់គ្រាន់ក្នុងការគ្រប់គ្រងភាពអនាធិបតេយ្យដែលអាចកើតមាន ដោយសារការលួចចិញ្ចឹមត្រីប្រភេទនេះទេ ប៉ុន្ដែវាជាឱកាសដែលមន្ដ្រីជំនាញជលផលគ្រប់ជាន់ថ្នាក់ដើរគាបជំរិតពីអាជីវករ និងប្រជាពលរដ្ឋដែលចិញ្ចឹមត្រីឆ្ដោ ឱ្យបង់ប្រាក់តាមតែទំនើងចិត្ដជាថ្នូរនៃការមិនបង្ក្រាប ។
សកម្មភាពនាំចូលដឹកជញ្ជូនឬចែកចាយត្រីឆ្ដោត្រីរ៉ស់ ក៏ត្រូវបានហាមឃាត់ដូចគ្នា ប៉ុន្ដែសម្រាប់ លោក សុង ហុង និងលោក ម៉ាញ់ ពៅ បានធ្វើសកម្មភាពគ្រប់បែបយ៉ាងការពារក្រុមឈ្មួញដែលរកស៊ីនាំចូលត្រីមកពីប្រទេសវៀតណាមកាន់តែអនាធិបតេយ្យ សូម្បីតែការដឹកជញ្ជូនត្រីតូចៗយកទៅធ្វើជានុយសម្រាប់ត្រីឆ្ដោនិងត្រីរ៉ស់ដែលក្រុមឈ្មួញលួចចិញ្ចឹមដោយខុសច្បាប់ ក៏រងនូវការគាបជំរិតឱ្យបង់ប្រាក់ពីជំនាញជលផលចតុមុខរបស់លោក សុង ហុង និងលោក ម៉ាញ់ ពៅ ដោយគ្មានការយោគយល់អ្វីឡើយ ហើយមន្ដ្រីជលផលអនុវត្ដន៍ការងារបែបនេះ ច្រើនឆ្នាំមកហើយអត់មានការកែទម្រង់ទាល់តែសោះ ព្រោះថា មកដល់ម៉ោងនេះគេមិនទាន់ឃើញមន្ដ្រីជំនាញជលផលណាម្នាក់ត្រូវបានដាក់ពិន័យឬផ្ដន្ទាទោស ដោយសារកំហុសឆ្គងនៅឡើយទេ។
ក្នុងតំណែងជាប្រធាននិងអនុប្រធានអធិការដ្ឋានរដ្ឋបាលជលផលចតុមុខ គេសង្កេតឃើញលោក សុង ហុង និងលោក ម៉ាញ់ ពៅ មិនដែលដកថយពីគំនិតពុករលួយ ហើយកែទម្រង់ភាពអសកម្មរបស់ខ្លួនឱ្យស្របតាមការព្រមានរបស់អង្គភាពប្រឆាំងអំពើពុករលួយ ដែលចាត់ទុកថាការប្រើប្រាស់តួនាទីមុខតំណែងក្នុង ស្ថាប័នរដ្ឋទៅស្វែងរកផលប្រយោជន៍ខាងក្រៅ ដើម្បីច្រកហោប៉ៅផ្ទាល់ខ្លួនចាប់ពី១០០រៀល ឡើងទៅត្រូវចាត់ទុកជាអំពើពុករលួយនិងត្រូវនាំទៅផ្ដន្ទាទោស ដោយគ្មានការយោគយល់អ្វីឡើយ ប៉ុន្ដែចំណាត់ការក្ដៅរបស់អង្គភាពប្រឆាំងអំពើពុករលួយមិនទាន់ធ្វើឱ្យលោក សុង ហុង និងលោក ម៉ាញ់ ពៅ ព្រឺរោមជើងទេ ហើយមន្ដ្រីសមត្ថកិច្ចដទៃទៀតគ្រាន់តែជាជើងក្រោយ ប៉ុណ្ណោះនៅពេលដែលជំនាញជលផលអូខេរួចហើយនោះ ពួកគេចាំតែទៅទទួលចំណែកដែល បានមកពីអំពើ ល្មើសច្បាប់យកទៅធ្វើមានធ្វើបានយ៉ាងងាយ ស្រួលបំផុត៕
No comments:
Post a Comment
yes