ឃាត់ខ្លួនកូនស្រី អធិការរង ខណ្ឌពោធិ៍សែនជ័យ ពាក់ព័ន្ធចែកចាយ ថ្នាំញៀន

ភ្នំពេញ៖ មនុស្សប្រុស ស្រី ៤នាក់ ត្រូវកម្លាំងនគរបាល ខណ្ឌចំការមន ឃាត់ខ្លួនដែលក្នុង នោះ ម្នាក់ត្រូវ គេស្គាល់ថា ជាកូនស្រី លោក អធិការរង មួយរូបឈ្មោះ សោម សាម៉ុន នៅ ខណ្ឌពោធិសែនជ័យ រួមទាំងបក្ខពួក ខណ:ពួកគេកំពុង ពពាក់ពពួនគ្នា ប្រើប្រាស់ និង ចែកចាយថ្នាំញៀន នៅក្នុងបន្ទប់ជួល ជាន់ទី៣  នៃផ្ទះលេខ០១ ផ្លូវ៩៥ ភូមិ២ ក្រុម១៦ នៅចំពីមុខប៉ុស្តិ៍ រដ្ឋបាល សង្កាត់ បឹងកេងកង២ ខណ្ឌចំការមន កាលពីវេលាម៉ោង៩ និង៣០នាទីព្រឹក ថ្ងៃទី១៣ ខែកញ្ញា ឆ្នាំ២០១២។

ជនសង្ស័យ៤នាក់ ដែលត្រូវសមត្ថកិច្ចឃាត់ខ្លួន១ ឈ្មោះ ងួន ហេម៉ាល័យ ភេទស្រី ស្នាក់នៅ ផ្ទះជាន់ទី៣ ទល់មុខប៉ុស្តិ៍រដ្ឋបាល ត្រូវគេស្គាល់ថា ជាកូនស្រី លោកអធិការរងមួយរូប ឈ្មោះ សោម សាម៉ុន ២ ឈ្មោះ ជូ សិត្យា ភេទប្រុស អាយុ១៧ឆ្នាំ ត្រូវជាគូ សង្សារបស់នាង ងួន ហេម៉ាល័យ ៣ ឈ្មោះ ជឺ តារា ភេទប្រុស អាយុ ២៦ឆ្នាំ មានទីលំនៅក្នុង សង្កាត់បឹងកក់១ ខណ្ឌទួលគោក និងទី៤ ឈ្មោះ ហង្ស ភិរុណ ភេទប្រុស អាយុ ១៧ឆ្នាំ ស្នាក់នៅក្នុងសង្កាត់ទន្លេបាសាក់ ខណ្ឌចំការមន។ សមត្ថកិច្ចដកហូត វត្ថុតាង បានរួមមានថ្នាំញៀន ប្រភេទម៉ាទឹកកក ចំនួន២កញ្ចប់ ជញ្ជីង ថ្លឹងថ្នាំ ចំនួន២ ព្រមទាំងសម្ភារ:សម្រាប់ សេពគ្រឿង ញៀន មួយចំនួន ផងដែរ។

តាមប្រភពព័ត៌មាន បានឲ្យដឹងថា កាលពីព្រឹកថ្ងៃទី១៣ ខែកញ្ញា កម្លាំងសមត្ថកិច្ច ចំរុះមួយ ក្រុមរបស់អធិការ នគរបាល ខណ្ឌ ចំការមន បានចុះធ្វើរដ្ឋបាល នៅក្នុងមូលដ្ឋាន ក្នុងសង្កាត់ បឹងកេងកង២ ដោយធ្វើទៅលើទីតាំង ស្មុគស្មាញ និងផ្ទះជួល។

ប្រភពព័ត៌មានបន្តថា ខណ: ចុះធ្វើរដ្ឋបាល មកដល់ ផ្ទះជួលនៅមុខ ស្នាក់ការ ប៉ុស្តិ៍រដ្ឋបាល សង្កាត់បឹងកេងកង២ សមត្ថកិច្ច បានឆែកឆេរក្នុង បន្ទប់ផ្ទះជួលជាន់ទី៣ មួយកន្លែង  បានឃើញគូស្នេហ៍មួយ គូឈ្មោះ ងួន ហេម៉ាល័យ និងបុរសជា សង្សារ ឈ្មោះ ជូ សិត្យា នៅក្នុងបន្ទប់ និងរកឃើញ ថ្នាំញៀនចំនួន ២កញ្ចប់ ជញ្ជីងថ្លឹងថ្នាំញៀនចំនួន២  ព្រមទាំងសម្ភារ:សម្រាប់ សេពគ្រឿងញៀន មួយចំនួន ។ ខណ:នោះសមត្ថកិច្ច ក៏បានឃាត់ខ្លួន ជនសង្ស័យ ២នាក់ទៀត ដែលទៅទីនោះ នាំយកទាំង វត្ថុតាង និងមនុស្សមកកាន់ អធិការដ្ឋាននគរបាល ខណ្ឌចំការមន ដើម្បីសាកសួរ និងមាន វិធានការ ទៅតាមផ្លូវច្បាប់។

តាមសមត្ថកិច្ចនគរបាលខណ្ឌចំការមន បានឲ្យដឹងថា ក្រោយពីធ្វើការសាកសួរជនសង្ស័យ ២នាក់ ត្រូវបានសមត្ថកិច្ច ដោះលែង ឲ្យមានសេរីភាពវិញ ដោយសំអាងថា ពុំរកឃើញ បទល្មើសណា មួយក្នុងការដាក់បន្ទុក ចំណែកគូស្នេហ៍ ឈ្មោះ ងួន ហេម៉ាល័យ និង ឈ្មោះ ជូ សិត្យា ត្រូវបានសមត្ថកិច្ច កសាងសំណុំរឿង បញ្ជួនទៅសាលាដំបូង រាជធានីភ្នំពេញ ដើម្បីចាត់ការ តាមច្បាប់៕