ព្រះសីហនុ៖ ភាពអាណាធិបតេយ្យ នៃការំលោភបំពានដីព្រះរាជដំណាក់ ដែលមានទីតាំងស្ថិតនៅក្នុងភូមិលេខ២ សង្កាត់លេខ៣ ក្រុងព្រះសីហនុ នៅតែបន្តមានយ៉ាងសកម្ម ហើយអ្នកដែលក្រាញននាលប៉ុនប៉ងរំលោភខ្លាំងខ្លាជាងគេនោះ ត្រូវបានមន្ត្រីថ្នាក់អាជ្ញាធរមូលដ្ឋាន អះអាងថា គឺលោករដ្ឋលេខាធិការក្រសួងព្រះបរមរាជវាំង ឈ្មោះ ជុំ ងឿន តែម្តង។
យោងតាមការប្រាប់ឲ្យដឹងពីមន្ត្រីអាជ្ញាធរ សង្កាត់លេខ៣ បានបញ្ជាក់ថា ថ្មីៗនេះ លោក ជុំ ងឿន បានបញ្ជារឲ្យកម្មករជាច្រើននាក់ ចូលទៅកាប់ឆ្ការព្រៃដីតំបន់ហាមឃាត់ខាងលើ ក្នុងគោលបំណងធ្វើការសាងសង់ជាសំណង់ផ្សេងៗ នៅទីនោះ ហើយសកម្មភាពដ៍ស្រួចស្រាវនេះ ត្រូវបានអជ្ញាធរថ្នាក់មូលដ្ឋាន រហូតដល់ថ្នាក់អជ្ញាធរក្រុង.ខេត្ត ចុះទៅធ្វើការហាមឃាត់ជាច្រើនលើកជាច្រើនសារផងដែរ ប៉ុន្តែ ក្រុមកម្មករទាំងនោះ ហាក់មានភាពក្លាហានមិនព្រមស្ដាប់ ឬបញ្ឈប់សកម្មភាពរបស់ពួកគេឡើយ។
មិនតែប៉ុណ្ណោះ ពួកគេថែមទាំងធ្វើការចាក់សោរទ្វារបងមិនអនុញាត្តិឲ្យក្រុមសមត្ថកិច្ចរបស់អាជ្ញាធរក្រុង.ខេត្ត ចូលទៀតផង។ បុរសម្នាក់ ដែលអះអាងថា ខ្លួនជាអ្នកយាមដីឲ្យ លោក ជុំ ងឿន និងជាអ្នកមើលការខុសត្រូវលើក្រុមកម្មករខាងលើ បាននិយាយថា លោក ជុំងឿន បានបញ្ជារឲ្យខ្លួនជួលកម្មករកាប់ឆ្ការព្រៃលើដីតំបន់ខាងលើ ក្នុងគោលបំណងសាងសង់ជាខ្ចុសទុកសំរាប់អង្គុយលែងតែប៉ណ្ណោះ មិនមានការសាងសង់ជាសំណង់ធំដុំនោះឡើយ។
អ្នកយាមដីដដែល បានបន្តទៀតថា ការសាងសង់ខ្ចុសនេះ ពុំមានច្បាប់ទំលាប់អ្វីនោះទេ គឺធ្វើការសាងសង់ ឬកាប់ឆ្កាព្រៃ តាមតែការបញ្ជាររបស់ លោក ជុំ ងឿន ប៉ុណ្ណោះ។
លោក នូន ប៊ុនថុល នាយកចាត់ការអន្តរវិស័យ សាលាខេត្តព្រះសីហនុ កលាពីព្រឹក ថ្ងៃទី១០ ខែតុលា ឆ្នាំ២០១២ ខណៈពេលលោកដឹកនាំកំលាំងសមត្ថកិច្ច ចុះទៅធ្វើការហាមឃាត់ការសាងសង់ និងកាប់ឆ្ការព្រៃលើទីតាំងដីខាងលើ បាននិយាយប្រាប់ឲ្យដឹងថា នេះជាលើទី៣ ហើយ ដែលក្រុមការងាររបស់អជ្ញាធរក្រុង.ខេត្ត ចុះទៅធ្វើការហាមឃាត់មិនឲ្យមានការសាងសង់សំណង់នៅលើដីតំបន់ខាងលើនេះ ប៉ុន្តែ កន្លងមក ការហាមឃាត់មិនត្រូវបានក្រុមកម្មករ ដែលកំពុងកាប់ឆ្កាព្រៃនៅទីនោះ ស្ដាប់ឡើយ ពោលគឺ ពួកគេស្ដាប់ដែរ តែស្ដាប់នៅពេលដែលក្រុមអជ្ញាធរចុះទៅធ្វើការហាមឃាត់តែប៉ុណ្ណោះ លុះដល់ពេលសមត្ថកិច្ចចេញទៅវិញផុត ពួកគេក៏ចាប់ផ្តើមធ្វើសកម្មភាពបន្តដដែល ជាដដែល មិនមានខ្លាចក្រែងរអែងអ្វីឡើយ។
លោក នូន ប៊ុនថុល បានបញ្ជាក់ថា ទីតាំងដីព្រះរាជដំណាក់នេះ ជាដីរបស់រដ្ឋ គ្រប់គ្រងដោយសាលាខេត្ត ដូចនេះ សំរាប់បុគ្គលណា ដែលមានបំណងចង់រំលោភបំពានយកដីតំបន់នេះ កាន់កាប់ គួរមានការយល់ដឹងខ្លះផងទៅ ពីព្រោះនេះ ជាទង្វើខុសច្បាប់ទាំងស្រុង ហើយអ្នកដែលរឹងទទឹងនៅតែបន្តរំលោភបំពាន អាចប្រឈមមុខនឹងការផ្តន្ទាទោសគេចមិនផុតឡើយ។
លោក សូ សុខ ប្រធានមន្ទីររៀបចំដែនដី នគរូបនីយកម្ម សុរិយោដី និងសំណង់ ខេត្តព្រះសីហនុ បានប្រាប់ឲ្យដឹងដែរថា ដីតំបន់ខាងលើនេះ មានទំហំ ៦ ហិកតា ៨១ អា ជាដីព្រះរាជទ្រព្យ គ្រប់គ្រងយោយសាលាខេត្តព្រះសីហនុ ដូចនេះ រាល់ការចូលទៅរំលោភបំពានចង់យកដីតំបន់នោះ កាន់កាប់ជាកម្មសិទ្ធិឯកជន គឺមិនអាចធ្វើបាននោះទេ។
ជុំវិញបញ្ហាខាងលើនេះ ត្រូវបានអ្នកក្រុងព្រះសីហនុ ទូទៅធ្វើការរិះគន់ត្រង់ៗ ទៅលើ លោក ជុំ ងឿន ថា លោក ជុំ ងឿន គឺជាមន្ត្រីថ្នាក់ដឹកនាំស្គាល់ច្បាប់ ស្គាល់ទំលាប់ និងមានការយលដឹងជាងប្រជាពលរដ្ឋ គួរណាស់តែធ្វើជាគំរូល្អដល់ប្រជាពលរដ្ឋ តែផ្ទុយទៅវិញបែរជាមានគំនិតរំលោភបំពានដីព្រះរាជដំណាក់ ដូចនេះសោះ។ ទង្វើរបស់ លោក ជុំ ងឿន បានប្រព្រឹត្តនាពេលនេះ មិនខុសពីការជុំរុញបង្កឲ្យមានភាពអានាធិបតេយ្យលើដីព្រះរាជដំណាក់ ឡើងវិញយ៉ាងដូចច្នេះដែរ។ សារព័ត៌មានយើង មិនអាចសុំការបំភ្លឺពី លោក ជុំ ងឿន បានទេនាពេលនេះ៕
No comments:
Post a Comment
yes