កូដកម្មបុគ្គលិកកាស៊ីណូត្រូពីកាណា នៅប៉ាយប៉ែត កាលពីខែមុន
បន្ទាយមានជ័យៈ មន្ត្រីសហជីព បាននិយាយកាលពីថ្ងៃម្សិលមិញថា បុគ្គលិកក្រុមហ៊ុនកាស៊ីណូ និងរមណីយដ្ឋានត្រូពីកាណាជាង៣០០នាក់ នៅក្រុងប៉ោយប៉ែតខេត្តបន្ទាយមានជ័យ បានសម្រេចចិត្តលាលែងពីការងាររបស់ពួកគេ ដោយយល់ព្រមទទួលយកប្រាក់អតីតភាពការងារ បន្ទាប់ពីថៅកែរបស់ពួកគេ បានបង្ខំឲ្យចុះហត្ថលេខាលើកិច្ចសន្យាការងាររយៈពេលខ្លី៦ខែ។
លោក សាត សែប ប្រធានសហជីពសេរីកម្មករនិយោជិកក្រុមហ៊ុនកាស៊ីណូត្រូពីកាណា ដែលត្រូវបានគេបណ្តេញចេញពីការងារកាលពីដើមឆ្នាំមុន បានថ្លែងថា កាលពីថ្ងៃសុក្រ ថៅកែកាស៊ីណូត្រូពីកាណា បានបង្ខំឲ្យកម្មករចុះហត្ថលេខាលើកុងត្រារយៈពេលខ្លី ព្រោះក្រុមហ៊ុន មិនចង់ឲ្យមានសហជីពនៅក្នុងក្រុមហ៊ុនទៀតទេ។ លោកបានបញ្ជាក់ថា៖«ថៅកែ បានគំរាមកំហែងឲ្យកម្មករចុះហត្ថលេខាលើកុងត្រារយៈពេលខ្លី ហើយសមាជិកសហជីពស្ទើរតែទាំងអស់ បានសម្រេចចិត្តលាលែង ហើយទទួលយកប្រាក់អតីតភាពការងាររបស់ពួកគេប្រសើរជាងចុះ ហត្ថលេខាលើកុងត្រាការងារថ្មី»។
លោក បានថ្លែងបន្តថា៖ «កម្មករ មិនបានឯកភាពទេព្រោះប្រសិនបើពួកគេ ចុះហត្ថលេខា ពួកគេនឹងបាត់បង់ប្រយោជន៍ទាំងអស់ដែលពួកគេមានជាច្រើនឆ្នាំមក ហើយ ហើយកម្មករខ្លះ ធ្វើការជាង១០ឆ្នាំទៅហើយ»។
លោក បានមានប្រសាសន៍បន្តថា ពួកគេនឹងត្រូវគេបណ្តេញចេញ នៅពេលណាដែលកុងត្រារយៈពេលខ្លីរបស់ពួកគេផុត ទង្វើដែលក្រុមហ៊ុន បានធ្វើជាមួយកម្មករ ដែលវាបង្ហាញពីភាពមិនបានគោរពច្បាប់ការងារ។ លោក សាត សែប បានបញ្ជាក់ថា៖«យើង មិនតវ៉ា ឬធ្វើកូដកម្មទេ ព្រោះកម្មករបានទទួលយកអតីតភាពរបស់ពួកគេ ហើយដើរចេញពីកន្លែងការងាររបស់ពួកគេរួចហើយ។ ខ្ញុំមានការសោកស្តាយ ហើយអាណិតបុគ្គលិកដែលបានបាត់បង់ការងាររបស់ពួកគេ»។
លោក អេង កុសល ដែលធ្វើការនៅកាស៊ីណូត្រូពីកាណាចំនួន១២ឆ្នាំហើយបានសម្រេចចិត្ត ឈប់ធ្វើការ ឲ្យដឹងថា លោក បានលាលែងព្រោះលោក នឹងត្រូវគេបណ្តេញចេញ នៅពេលដែលកុងត្រារយៈពេលខ្លីរបស់ លោកត្រូវបានបញ្ចប់។ លោកបានថ្លែងថា៖«ក្រុមហ៊ុន មិនចង់ឲ្យមានសហជីពធ្វើការក្នុងកាស៊ីណូនេះទៀតទេ ខ្ញុំជាសមាជិក FTWUT ដែលដឹកនាំដោយលោក សាត សែប»។
លោក អេង កុសល បានមានប្រសាសន៍បន្តថា បុគ្គលិកដែលមិនមែនជាសមាជិកសហជីពនឹងបន្តកុងត្រារបស់ពួកគេ បន្ទាប់ពី៦ខែ ប៉ុន្តែសមាជិករបស់សហជីព នឹងត្រូវគេបញ្ឈប់។ លោកបានបញ្ជាក់ថា៖«ខ្ញុំកំពុងតែរកការងារថ្មី ប៉ុន្តែវា ពិបាកណាស់ក្នុងការរកការងារ ព្រោះឈ្មោះរបស់ខ្ញុំ ត្រូវបានគេបញ្ជូនទៅក្រុមហ៊ុនផ្សេងៗទៀត ហើយក្រុមហ៊ុនទាំងនោះ នឹងមិនទទួលខ្ញុំឲ្យធ្វើការជាមួយពួកគេទេ»។
តំណាងកាស៊ីណូ និងរមណីយដ្ឋានត្រូពីកាណា បានបដិសេធមិនធ្វើអត្ថាធិប្បាយទេកាលពីថ្ងៃម្សិលមិញ៕
No comments:
Post a Comment
yes