លោក ឡុង ថា ប្រាប់ថា ប្រជាពលរដ្ឋជាង២០០នាក់ នៅស្រុករមាសហែក គ្រោងនឹងប្រមូលផ្តុំគ្នាមុខតុលាការ ខេត្តស្វាយរៀង ដើម្បីលើកទឹកចិត្តដល់តំណាងរបស់ពួកគេ តែត្រូវសមត្ថកិច្ចរារាំង នៅចំណុចឃុំក្រសាំង ដោយចោទថាប្រជាពលរដ្ឋមានបំណងធ្វើបាតុកម្ម ៖ "គាត់អញ្ជើញទៅតុលាការ តែប្រជាពលរដ្ឋចេញមក អាជ្ញាធរគាត់ឃាត់តាមផ្លូវបង ហើយគេថាប្រជាពលរដ្ឋទៅបាតុកម្ម។"
មិនអាចទាក់ទងសមត្ថកិច្ចដែលប្រជាពលរដ្ឋអះអាងថា បានឃាត់ពួកគេនោះបានទេ។ ចំណែកប៉ូលិសប្រចំានៅអធិការដ្ឋាននគរបាលស្រុករមាសហែក ដែលមិនបញ្ចេញឈ្មោះ អះអាងថា មិនបានដឹងពីករណីនេះទេ។
មន្ត្រីសម្របសម្រួលសម្ព័ន្ធសហជីពកសិករកម្ពុជា លោក ធេង សារឿន មានប្រសាសន៍ថា ការកោះហៅលោក សួន សីហា ជាប្រធានសហគមន៍ព្រៃឈើ ពីបទលួចកាប់ព្រៃឈើខុសច្បាប់នោះ មិនត្រឹមត្រូវទេ។ លោកបន្តថា ការដែលសមត្ថកិច្ចធ្វើការរារំាងបែបនេះ គឺជាការគំរាមកំហែងនិងបំបិទសិទ្ធិសេរីភាពប្រជាពលរដ្ឋ ៖ "នេះជាការគំរាមកំហែង និងបំបិទសិទ្ធិសេរីភាព ចំពោះតំណាងសហគមន៍ ដែលគាត់ហ៊ានធ្វើការតវ៉ា ដើម្បីផលប្រយោជន៍របស់ប្រជាពលរដ្ឋ ដើម្បីការពារដីធ្លី និងដើម្បីការពារ របស់បុគ្គលដែលគេរំលោភ ហើយអ្វីដែលរដ្ឋបាលព្រៃឈើប្តឹងគាត់មិនសមហេតុផលនោះទេ។"
សមាជិកក្រុមប្រឹក្សាឃុំអណ្តូងត្របែក លោក ប៊ូ ប៊ុនណា មានប្រសាសន៍ថា ប្រជាពលរដ្ឋគ្រាន់តែឡើងមកលើកទឹកចិត្តតំណាងរបស់គេដែលមិនមានកំហុស។ លោកសំណូមពរឲ្យស្ថាប័នពាក់ព័ន្ធជួយអន្តរាគមន៍លើករណីនេះ ព្រោះតំណាងសហគមន៍ដែលតុលាការចោទថាកាប់ព្រៃឈើខុសច្បាប់នោះ មិនពិតទេ។
បន្ទាប់ពីសមត្ថកិច្ចបានរារំាងនោះ នៅមានប្រជាពលរដ្ឋប្រមាណ៥០នាក់ បានឡើងទៅដល់តុលាការខេត្តស្វាយរៀង ដើម្បីលើកទឹកចិត្តតំណាងដែលត្រូវតុលាការកោះហៅ ប៉ុន្តែនៅគ្រានោះ តុលាការបានលើកពេលសវនាការវិញ ដោយអះអាងថាចៅក្រមស៊ើបសួរមិននៅ។
គួរបញ្ជាក់ថា នាយសង្កាត់រដ្ឋបាលព្រៃឈើស្រុករមាសហែក លោក នេត គក បានប្តឹងតំណាងសហគមន៍២នាក់ ឈ្មោះ សួន សីហា និង សួន ហុងលី តំាងពីខែឧសភា ឆ្នំា២០១២ ដោយចោទថាលួចកាប់ព្រៃខុសច្បាប់។ តែប្រជាពលរដ្ឋអះអាង ការប្តឹងនោះ ដោយសារតែតំណាងសហគមន៍២រូបនោះ ជាសកម្មជនតវ៉ាជាមួយជម្លោះដីធ្លីនៅស្រុករមាសហែក៕
No comments:
Post a Comment
yes