ក្រុមការងារចលនាប្រជាធិបតេយ្យសង្គ្រោះជាតិខេត្តសៀមរាបចុះលើកនិងជួសជុលស្លាក គណបក្សសង្គ្រោះជាតិចំនួន២ស្រុកចំណែកនៅខេត្តកំពង់ឆ្នាំងក្រុមការងារខេត្តចុះជួបពលរដ្ឋ ចំនួន៣ក្រុមស្មើនិង៦កន្លែងស្ថិតនៅស្រុកកំពង់ត្រឡាច

នៅបន្ទាប់ពីបានចុះជួបសំណេះសំណាល សួរសុខទុក្ខ ព្រមទាំងធ្វើការផ្សព្វផ្សាយគោល​ន​យោ​​បាយ និងការបង្ហាញស្លាកសញ្ញាគណបក្ស សង្គ្រោះជាតិ ដល់ប្រជាពលរដ្ឋ​ឲ្យពួកគាត់​បាន​​ដឹង និងស្គាល់នាពេលកន្លងមក ព្រមជាមួយគ្នានេះថ្នាក់ដឹកនាំចលនាប្រជាធិបតេ​យ្យ​សង្គ្រោះជាតិខេត្តសៀមរាប ក៏បានចុះលើក​ និងជួសជុលស្លាកគណបក្ស​ សង្គ្រោះជាតិ បន្ថែមទៀតលើស្លាកដែលបានលើក និងជួសជុលរួចរាល់មួយចំនួននាពេលកន្លងមក ។

ដូចជានៅថ្ងៃទី១៨ ខែមីនា ឆ្នាំ២០១៣ ក្រុមការងារចលនាប្រជាធិបតេយ្យសង្គ្រោះជាតិ ខេត្ត​សៀមរាប ចែកចេញជា២ក្រុមដែលមួយក្រុមធ្វើការលើក និងជួសជុលស្លាកគណបក្ស សង្គ្រោះ​ជាតិ នៅស្រុកប្រាសាទបាគង និងមួយក្រុមទៀតចុះជួសជុល និងលើកស្លាកថ្មីនៅ ស្រុកពួក ដែលតាមគោលការណ៏គឺលើនិងជួសជុលស្លាក​គណបក្ស​ឲ្យបានរួចរាល់នៅ​មុនការ​បោះឆ្នោតចូលមកដល់ ។

ព្រមជាមួយគ្នានោះ ប្រជាពលរដ្ឋមានការរីករាយយ៉ាងខ្លាំង ដោយបានឃើញស្លាកសញ្ញាគណ បក្ស សង្គ្រោះជាតិ បានលើកយ៉ាងព្រោងព្រាតនៅលើទឹកដីនៃខេត្តសៀមរាប ក៏ដូចជានៅតាម បណ្តាខេត្តនានាផងដែរ ដែលនេះជាសញ្ញាបង្ហាញថា គណបក្ស សង្គ្រោះជាតិ ពិតជាឈ្នះលើ ការបោះឆ្នោតមួយរយភាគរយសម្រាប់អាណត្តិថ្មីទី៥នេះ ស្របពេលដែលការគាំ​ទ្ររបស់​ពល​រដ្ឋមកលើគណបក្ស សង្គ្រោះជាតិ មានសន្ទុះកាន់តែខ្លាំងឡើងៗជារៀងរាល់ថ្ងៃផងនោះ ។

គួរជំរាបជូនផងដែរថា នៅថ្ងៃទី១៨ ខែមីនា ឆ្នាំ២០១៣ ថ្នាក់ដឹកនាំចលនាប្រជាធិបតេយ្យ​សង្គ្រោះជាតិ ខេត្តកំពង់ឆ្នាំចំនួន៣ក្រុម ក៏បានធ្វើយុទ្ធនាការក្នុងការចុះជួបសំណេះសំណាល​ជាមួយប្រជាពលរដ្ឋចំនួន៦កន្លែងស្ថិតនៅក្នុងស្រុកកំពង់ត្រឡាចផងដែរ  ដែលក្នុង​នោះក្រុម​ទី១​ដឹកនាំដោយលោក ហែម សម្ផស្ស ពេលព្រឹកបានចុះជួបពលរដ្ឋនៅភូមិបឹងកក់ ឃុំលង្វែក ពេល​រសៀលជួបពលរដ្ឋនៅភូមិស្រែព្រៃ ឃុំឬស្សី ។ ចំណែកឯក្រុមទី២ដឹកនាំដោយលោក ប៉ុល សិដ្ឋធានី ពេលព្រឹកចុះជួបពលរដ្ឋនៅភូមិស្តីបន្លិច ឃុំអំពិលទឹក និងនៅពេលរសៀល​ចុះ​ជួប​ពលរដ្ឋនៅភូមិកំពង់ត្រឡាចក្រោម ឃុំកំពង់ត្រឡាច ។ 

រីឯក្រុមទី៣ដឹកនាំដោយលោក កែវ ថៃ ពេលព្រឹកចុះជួបពលរដ្ឋនៅភូមិសូរវង្ស ឃុំតាជិះ និងពេលរសៀលលោក កែវ ថៃ ព្រម​ទាំង​ក្រុមការងារបានចុះទៅជួបសួរសុខទុក និងសំណេះសំណាល ព្រមទាំងធ្វើការផ្សព្វផ្សាយ​គោល​នយោបាយរបស់គណបក្ស សង្គ្រោះជាតិ ដល់ពលរដ្ឋនៅភូមិក្បាល​ថ្នល់ ឃុំសែប ស្រុកកំពង់ត្រឡាច ៕