សកម្មភាពចុះជួបពលរដ្ឋនិងលើកស្លាកគណបក្សសង្រ្គោះជាតិនៅខេត្តបន្ទាយមានជ័យ របស់ថ្នាក់ដឹកនាំចលនាប្រជាធិបតេយ្យសង្គ្រោះជាតិ បាននិងកំពុងតែធ្វើយ៉ាងផុសផុលបំផុត

សម្រាប់ខែមីនាដែលជាខែថ្មីនេះ ថ្នាក់ដឹកនាំចលនាប្រជាធិបតេយ្យសង្គ្រោះជាតិ ខេត្ត​បន្ទាយ​មានជ័យ បានធ្វើយុទ្ធនាការរបស់ខ្លួនក្នុងការចុះជួបពលរដ្ឋនៅតាមមូលដ្ឋាន ក៏ដូចជា​ប្រជុំ​ដាក់​ផែនការថ្មីៗបន្ត​បន្ទាប់ និងការលើកស្លាកគណបក្ស សង្គ្រោះជាតិ បាននិងកំពុងតែធ្វើ​យ៉ាង​ផុស​ផុលបំផុតជារៀងរាល់ថ្ងៃ លើសពីសកម្មភាពរបស់ខ្លួនដែលបានធ្វើកាលពីខែកន្លង​ទៅ ទៅទៀត ។

ដូចជានៅថ្ងៃទី០៧ ខែមីនា ឆ្នាំ២០១៣លោក អ៊ូ ច័ន្ទរ័ត្ន អនុប្រធានចលនាប្រជាធិបតេយ្យ​សង្គ្រោះជាតិខេត្ត​ បាន​ដឹក​នាំក្រុមការងារខេត្ត ហើយនិងស្រុក ធ្វើតំណើរចុះទៅជួបជា​មួយ​ប្រ​ជាពលរដ្ឋពេលព្រឹកកម្មវិធីបានប្រារព្វធ្វើឡើងនៅភូមិគុត្តសត ឃុំគុត្តសត ស្រុកអូជ្រៅ និង​នៅ​ពេលរសៀលនៅភូមិសូភីត្បូង ឃុំសូភី ក្នុងស្រុកអូរជ្រៅដដែល ដើម្បីធ្វើការផ្សព្វផ្សាយ​គោល​នយោបាយរបស់គណបក្ស និងបង្ហាញស្លាកសញ្ញាគណបក្ស សង្គ្រោះជាតិ ឲ្យប្រជាពល​រដ្ឋ​បាន​ដឹងនិងស្គាល់ ។

ព្រមជាមួយគ្នានេះ គណបក្ស សង្គ្រោះជាតិ ខេត្តបន្ទាយមានជ័យ ចាប់ពីថ្ងៃទី១ ខែមីនា រហូត​ដល់ថ្ងៃទី០៧ ខែមីនា ឆ្នាំ២០១៣ បានធ្វើពិធីលើកស្លាក និងជួសជុលស្លាកថ្មីបានចំនួន១៥​ស្លាក​ហើយ ដែលក្នុងនោះនៅក្រុងសេរីសោភ័ណ្ឌបានចំនួន៣ស្លាក គឺនៅភូមិកន្ទួត ​សង្កាត់​ភ្នាតចំនួមួយស្លាក នៅភូមិកុំព្រីង និងភូមិភ្នាត ស្ថិតនៅក្នុងសង្កាតភ្នាត ក្រុងសេរីសោ​ភ័ណ្ឌ​បានចំនួន២ស្លាក លើចំនួនស្លាកចាស់ដែលបានលើករួចរាល់កាលពីពេលកន្លងមក និងបន្ត​លើក​ជាបន្តបន្ទាប់ទៀត ។

ជាមួយគ្នានោះផងដែរ បើតាមការឲ្យដឹងពីលោក សារ៉ូ សុវុទ្ធិ លេខាគណបក្សក្រុងប៉ោយប៉ែត បានប្រាប់ថា នៅក្រុងប៉ោយប៉ែត ចាប់ពីថ្ងៃទី១ខែមីនា រហូតមកដល់ថ្ងៃទី០៧ ខែមីនា ឆ្នាំ២០​១៣នេះ បានធ្វើពិធីលើកស្លាក និងជួសជុលស្លាកគណបក្ស សង្គ្រោះជាតិ បានចំនួន​១២​ស្លាក​ ដែលក្នុងនោះនៅសង្កាត់និមិត្តបានចំនួន៤ស្លាក នៅសង្កាត់ផ្សារកណ្តាលបានចំនួន៥ស្លាក និងនៅសង្កាត់ប៉ោយប៉ែតបានចំនូន៣ស្លាក បន្ថែមលើស្លាកដែលបានលើករួចនាពេលកន្លង​មក។

លោក សារ៉ូ សុវុទ្ធិ បានប្រាប់ឲ្យដឹងទៀតថា ព្រមជាមួយនិងការលើកស្លាកបន្ថែមចំនួន១២​ស្លាកនៅក្រុងប៉ោយប៉ែតនេះ គឺនៅតាមបណ្តោយផ្លូវជាតិក្រុងប៉ោយប៉ែតស្លាកគណបក្ស សង្គ្រោះ បាន​លើករួចរាល់អស់ជាស្ថាពរទៅតាមផែនការណ៏ហើយ តែលោកថា​ទោះជា​យ៉ា​ង​នេះក្តី ក៏ថ្នាក់​ដឹកនាំខេត្តនិងនៅតែបន្តលើកស្លាកថ្មីបន្ថែមទៀតផងដែរ តាមផ្លូវជាតិខេត្ត៥​ ដោយ​មិនបញ្ចប់តែត្រឹមនេះទេ ។

សូមជំរាបជូនថា ក្នុងរយៈពេលនេះថ្នាក់ដឹកនាំក្រុងប៉ោយប៉ែត ក៏និងបន្តចុះទៅលើកស្លាកនៅ តាមភូមិទាំង៣៨របស់ក្រុងឲ្យបានគ្រប់ផងដែរ ព្រមជាមួយគ្នានេះក៏រៀបចំកម្មវិធីក្នុងការចុះជួប ជាមួយពលរដ្ឋដើម្បីធ្វើការផ្សព្វផ្សាយគោលនយោបាយរបស់គណបក្ស សង្គ្រោះជាតិ ដល់ ពួកគាត់បន្ថែមលើអ្វីដែលពួកគាត់ធ្លាប់បានទទួលនាពេលកន្លងមក ដោយហេតុថាការបោះ​ឆ្នោតក៏កាន់តែខិតជិតចូលមកដល់ហើយ ៕