ទីតាំងអារឈើរបស់ក្រុមហ៊ុនវៀតណាម នៅក្នុងដែនជម្រកសត្វព្រៃលំផាត់
ខេត្តរតនគិរី
តំណាងក្រុមហ៊ុនចម្ការកៅស៊ូវៀតណាមបានបដិសេធថា ក្រុមហ៊ុនរបស់គាត់មិនមានពាក់ព័ន្ធទៅនឹងការកាប់បំផ្លាញព្រៃឈើនៅក្នុងដែនជម្រកសត្វព្រៃលំផាត់ក្នុងខេត្តរតនគិរីនោះទេ ប៉ុន្តែបានទម្លាក់កំហុសរឿងកាប់ឈើនេះទៅលើក្រុមហ៊ុនមួយទៀត ដែលមានថៅកែដូចគ្នាទៅនឹងក្រុមហ៊ុនលោក។
កាលពីសប្តាហ៍មុនកាសែតភ្នំពេញ ប៉ុស្តិ៍ បានចេញផ្សាយពីការកាប់បំផ្លាញព្រៃឈើនៅក្នុងដែនជម្រកសត្វព្រៃ លំផាត់។ មន្ត្រីអាដហុកបានធ្វើការសន្និដ្ឋានថា ឈើប្រណីតប្រមាណជា១ម៉ឺន៦ពាន់ដើមត្រូវបានគេកាប់លើផ្ទៃដីទំហំ១៥គីឡូម៉ែត្របួនជ្រុង ហើយឈើដែលគេកាប់ទាំងនេះអាចលក់ចេញក្នុងតម្លៃ១០០លានដុល្លារអាមេរិក។
លោក សេង មុន្នី តំណាងក្រុមហ៊ុនចម្ការកៅស៊ូវៀតណាម ហ័ងអាញអណ្តូងមាសបានអះអាងថា ក្រុមហ៊ុនលោកមិនបានកាប់ឈើខុសច្បាប់នៅក្នុងដែនជម្រកសត្វលំផាត់នោះទេ។
លោក សេង មុន្នី បានបញ្ជាក់ថា៖«ក្រុមហ៊ុនយើងមិនដែលកាប់ឈើក្នុងដែនជម្រកសត្វព្រៃ នោះទេសូម្បីតែឈើមួយកន្ទុយ។ យើងអត់ចង់បានទេ កាប់តែឈើក្នុងក្រុមហ៊ុនខ្ញុំយកមិនអស់ផង»។
ទោះយ៉ាងណា លោក សេង មុន្នី អះអាងថា ក្រុមហ៊ុនវៀតណាមមួយទៀត គឺក្រុមហ៊ុនហ័ងអាញលំផាត់ ដែលជាក្រុមហ៊ុនសម្បទានសេដ្ឋកិច្ចមួយមានថៅកែរួមគ្នានឹងក្រុមហ៊ុនហ័ងអាញអណ្តូងមាសដែរនោះ ជាអ្នកកាប់ឈើនៅក្នុងដែនជម្រកសត្វលំផាត់នេះទៅវិញ។
លោក សេង មុន្នី បានថ្លែងដូច្នេះថា ៖ «ខ្ញុំដឹងក្រុមហ៊ុនហ័ងអាញលំផាត់ជាអ្នកកាប់ឈើក្នុងដែនជម្រកសត្វព្រៃខាងក្រៅដីក្រុមហ៊ុន។ ប៉ុន្តែខ្ញុំមិនខ្វល់ទេ វាមិនមែនជារឿងរបស់ខ្ញុំ ហើយក្រុមហ៊ុនហ័ងអាញលំផាត់នេះតឹងតែងណាស់សូម្បីតែខ្ញុំបើកឡានកាត់ដីក្រុមហ៊ុនក៏គេមិនឲ្យ ដែរ បើទោះជាស្ថិតក្រោមក្រុមហ៊ុនធំតែមួយក៏ដោយ»។
លោក ឈឹម សុឃឹម មេឃុំស្រែអង្គ្រង ក្នុងស្រុកកូនមុំ ខេត្តរតនគិរី បាននាំផ្លូវមន្រ្តីពីក្រសួងកសិកម្មទៅពិនិត្យដែនជម្រកសត្វព្រៃលំផាត់ កាលពីថ្ងៃទី២១ ខែមេសានេះ។ លោកបានឃើញជនជាតិវៀតណាមបួននាក់ដឹកឈើចូល ក្រុមហ៊ុន ហ័ងអាញ អណ្តូងមាស នោះ។ លោក ឈឹម សុឃឹម បានបញ្ជាក់ថា ៖ «ហ័ងអាញលំផាត់ នៅជាប់ដែនជម្រកសត្វព្រៃ ហើយក្រុមហ៊ុនហ័ងអាញអណ្តូងមាស មិននៅជាប់ទេ គឺនៅរំលងហ័ងអាញលំផាត់តែខ្ញុំឃើញជនជាតិវៀតណាមដឹកឈើចូលហ័ងអាញអណ្តូងមាស តាមផ្លូវមិនមែនដឹកកាត់ហ័ងអាញលំផាត់ទេ»។
យោងតាមគេហទំព័ររបស់ក្រសួងពាណិជ្ជកម្មឲ្យដឹងថា ក្រុមហ៊ុនហ័ងអាញលំផាត់ និងហ័ងអាញអណ្តូងមាស គឺមានថៅកែរួមតែមួយ គឺលោក Nguyen Van Thu ជាជនជាតិវៀតណាម។
លោក Nguyen Van Thu បានបដិសេធមិនធ្វើការអត្ថាធិប្បាយទេពាក់ព័ន្ធទៅនឹងបញ្ហានេះ។ លោកបានឲ្យទូរស័ព្ទទៅជំនួយការរបស់លោកនិយាយ ហើយជំនួយការរូបនេះបានឲ្យទាក់ទងទៅអ្នកគ្រប់គ្រងក្រុមហ៊ុនហ័ងអាញអណ្តូងមាស គឺលោក យ៉ុង (Yung) ដែលជាជនជាតិវៀតណាមដែរ។
លោក យ៉ុង បានបញ្ជាក់ថាគាត់គឺជាអ្នកគ្រប់គ្រងក្រុមហ៊ុនហ័ងអាញអណ្តូងមាស។ លោកបានបដិសេធមិនធ្វើការអត្ថាធិប្បាយទេនៅពេលសួរអំពីរឿងកាប់ឈើ។
No comments:
Post a Comment
yes