កម្មករតវ៉ា ដុតសំបកកង់ឡាននៅមុខរោងចក្រ D&L Ultimate កាលពីម្សិលមិញ
កម្មករកាត់ដេរជាង ៣០០ នាក់ បានធ្វើការតវ៉ាកាលពីម្សិលមិញ នៅក្រៅរោងចក្រ D&L Ultimate ក្នុងខណ្ឌដង្កោដើម្បីទាមទារឲ្យរោងចក្រ ទទួលយកកម្មករឲ្យចូលធ្វើការវិញ ដែលពួកគេថា ត្រូវបានបញ្ឈប់ពីការងារ បន្ទាប់ពីរោងចក្រដឹងថាកម្មកររូបនោះ បានជាប់ឆ្នោតជាប្រធានសហជីពបង្កើតថ្មីនៅក្នុងរោងចក្រ។
លោក ស៊ុត សៀម មន្រ្តីដោះស្រាយវិវាទការងារមកពីស៊ីខៅឌូ បានថ្លែងថា កម្មករបានដុតកង់ឡាន និងចាក់តន្រ្តីខ្លាំងៗពីឧបករណ៍បំពងសំឡេង ខណៈពេលពួកគេរាំ និងច្រៀងនៅក្រៅរោងចក្រក្នុងខណ្ឌដង្កោ។
លោក ប៉ែន សុផល ប្រធានសហជីព ដែលត្រូវបានបញ្ឈប់ពីការងារបានប្រាប់ភ្នំពេញ ប៉ុស្តិ៍ កាលពីម្សិលមិញថា៖ «ខ្ញុំមិនបានធ្វើខុសទេ។ ខ្ញុំបានបង្កើតសហជីព បន្ទាប់ពីកម្មកររាប់រយនាក់បានបោះឆ្នោតឲ្យខ្ញុំធ្វើជាមេដឹកនាំពួកគេ»។ លោក សុផល បានបន្តថា រោងចក្របានចោទប្រកាន់លោកថា បានញុះញង់កម្មករឲ្យធ្វើបាតុកម្មប៉ុន្តែលោកបានបញ្ជាក់ថា លោកគ្រោងបង្ហាញឯកសារ ១៨ ចំណុចដល់ថ្នាក់គ្រប់គ្រងរបស់រោងចក្រ ដែលទាមទារសិទិ្ធឲ្យកម្មករ រាប់ទាំងថ្លៃអាហារនៅថ្ងៃសៅរ៍ និងការឈប់សម្រាកនៅពេលឈឺដោយមានប្រាក់ឈ្នួល។
លោកបានបញ្ជាក់ថា៖ «ខ្ញុំមិនបានធ្វើការញុះញង់កម្មករឲ្យធ្វើកូដកម្មទេ»។
លោក សុផល បានបន្ថែមថា ទោះជាយ៉ាងណាឥឡូវនេះ កម្មករនឹងធ្វើកូដកម្មរហូតដល់រោងចក្រអនុញ្ញាតឲ្យរូបលោកចូលធ្វើការវិញ និងយល់ព្រមតាមការទាមទារអត្ថប្រយោជន៍កាន់តែល្អប្រសើរឡើង។
លោក ង៉ែត ចំរើន មន្រ្តីរោងចក្រ D&L Ultimate បានបដិសេធមិនផ្តល់ការអត្ថាធិប្បាយទេកាលពីម្សិលមិញ៕
No comments:
Post a Comment
yes