គណៈកម្មាធិការជាតិរៀបចំការបោះឆ្នោត គ.ជ.ប បានទទួលទីប្រឹក្សាចំនួនពីររូប គឺលោកស្រី MARIA ROSARIA ទទួលបន្ទុកផ្នែកបណ្តុះបណ្តាល និងអប់រំសាធារណជន និងលោក ARNAUD ROUX ទទួលបន្ទុកផ្នែកព័ត៌មានសាធារណៈ មកពីសហភាពអឺរ៉ុប កាលពីថ្ងៃទី២៩ ខែមេសា ឆ្នាំ២០១៣ នៅទីស្តីការ គ.ជ.ប.។ នេះបើតាមសេចក្តីប្រកាសព័ត៌មាន របស់ គ.ជ.ប ដែលបានផ្សព្វផ្សាយ កាលពីថ្ងៃទី៣០ ខែមេសា ឆ្នាំ២០១៣។
អគ្គទីប្រឹក្សាទទួលបន្ទុកកិច្ចការនយោបាយ និងជាប្រតិភូតំណាងសហភាពអឺរ៉ុបប្រចាំកម្ពុជា លោក អាឡាំង វ៉ាន់ដឺស្មីសសិន បានមានប្រសាសន៍ ជម្រាបជូនលោក អ៊ឹម សួស្តី ប្រធាន គ.ជ.ប នៅក្នុងពេលបង្ហាញវត្តមានទីប្រឹក្សាទាំងពីររូប នៅទីស្តីការ គ.ជ.ប ថា សហភាពអឺរ៉ុប បានបញ្ជូនទីប្រឹក្សា២រូបមកជួយ គ.ជ.ប ទៅតាមអ្វីដែលសហភាពអឺរ៉ុប និង គ.ជ.ប បានពិភាក្សាគ្នាអស់រយៈពេលជាង ៦ខែ កន្លងមកនេះ។
តាមសេចក្តីប្រកាស ទីប្រឹក្សារបស់សហភាពអឺរ៉ុបទាំងពីររូបនេះ សុទ្ធតែធ្លាប់បានធ្វើការងារ នៅក្នុងព្រះរាជាណាចក្រកម្ពុជា ទាក់ទងទៅនឹងការងារបោះឆ្នោត។
ចំណែកលោក អ៊ឹម សួស្តី ប្រធាន គ.ជ.ប បានមានប្រសាសន៍ថា គ.ជ.ប សូមថ្លែងអំណរគុណសហភាពអឺរ៉ុប ដែលបានបញ្ជូនទីប្រឹក្សា ២រូប មកជួយគ.ជ.ប ក្នុងការរៀបចំការបោះឆ្នោតសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៥។
ប្រធាន គ.ជ.ប បានមានប្រសាសន៍បន្តថា ទីប្រឹក្សាមានការងារច្រើន ដែលត្រូវធ្វើ ដូចជា ត្រូវពិនិត្យលើសៀវភៅណែនាំគណៈកម្មការរាជធានី ខេត្តរៀបចំការបោះឆ្នោត(គធ/ខប) សៀវភៅណែនាំគណៈកម្មការឃុំសង្កាត់ រៀបចំការបោះឆ្នោត(គឃ/សប) និងសៀវភៅណែនាំគណៈកម្មការការិយាល័យបោះឆ្នោត និងរាប់សន្លឹកឆ្នោត (គកប/គករ)។
សេចក្តីប្រកាសលើកឡើងថា នៅថ្ងៃទី០៦-០៧ ខែឧសភា គ.ជ.ប ត្រូវបើកវគ្គបណ្តុះបណ្តាលដល់មន្ត្រីគណៈកម្មការរាជធានី ខេត្តរៀបចំការបោះឆ្នោត(គធ/ខប) និងស្ថាប័នពាក់ព័ន្ធ ស្តីពី ការឃោសនា និងការសុំចុះឈ្មោះ ជាតំណាងគណបក្សនយោបាយ។
លោក អ៊ឹម សួស្តី បានឲ្យដឹងទៀតថា នៅដើមខែកក្កដា គ.ជ.ប. នឹងត្រៀមបើកវគ្គបណ្តុះបណ្តាល ដល់មន្ត្រីគណៈកម្មការរាជធានី ខេត្តរៀបចំការបោះឆ្នោត(គធ/ខប) និងស្ថាប័នពាក់ព័ន្ធ ស្តីពី ការបោះឆ្នោត និងរាប់សន្លឹកឆ្នោត។
លោកបានបន្ថែមថា ថ្ងៃបោះឆ្នោត កាន់តែខិតជិតមកដល់ហើយ គ.ជ.ប មានការងារច្រើន ដែលត្រូវធ្វើ។ ដូច្នេះទីប្រឹក្សាទាំងពីររូប ត្រូវក្តាប់ការងារឲ្យបាន ពីព្រោះការងារ ដែល គ.ជ.ប ធ្វើ គឺមានប្រតិទិន ដែលមានពេលវេលាកំណត់ច្បាស់លាស់។
សូមជម្រាបថា ការបោះឆ្នោតជ្រើសតាំងតំណាងរាស្ត្រ នីតិកាលទី៥ នឹងប្រព្រឹត្តទៅ នាថ្ងៃទី២៨ ខែកក្កដា ឆ្នាំ២០១៣៕
No comments:
Post a Comment
yes