អាជ្ញាធររដ្ឋាភិបាលដែលពាក់ព័ន្ធនឹងកិច្ចការពារព្រៃឈើ ហាក់ដូចជាបានចាត់វិធានការតិចតួចក្នុងការបង្ក្រាបការកាប់ឈើខុសច្បាប់ជាច្រើនកន្លែង ដែលកំពុងកើតឡើងនោះ។
ប្រភពពីប្រជាពលរដ្ឋនៅឃុំខ្នារសណ្ដាយ ស្រុកបន្ទាយស្រី បានឱ្យដឹងថា បច្ចុប្បន្នសកម្មភាពកាប់ឈើធ្វើអាជីវកម្មខុសច្បាប់ កំពុងកើតមានជាបន្តបន្ទាប់នៅលើខ្នងភ្នំគូលែន ដែលជាតំបន់ឧទ្យានជាតិ ដែលការពារដោយព្រះរាជក្រឹត្យ។
ស្ត្រីម្នាក់ គឺជាអ្នកភូមិបន្ទាយស្រី ដែលសុំមិនបញ្ចេញឈ្មោះ គាត់បានអះអាងកាលពីរសៀលថ្ងៃច័ន្ទ ទី២៩ ខែមេសា ថា ឈ្មួញមួយក្រុមកំពុងធ្វើសកម្មភាពកាប់ឈើខុសច្បាប់យ៉ាងខ្លាំងនៅតំបន់ភ្នំគូលែន។
ស្ត្រីដដែលបានបញ្ជាក់ថា អ្នកភូមិរបស់គាត់ខ្លះត្រូវបានឈ្មួញជួលឱ្យបររទេះទៅដឹកជញ្ជូនឈើដែលគេកាប់ចេញពីព្រៃជាបន្តបន្ទាប់៖ «ខ្ញុំឆ្ងល់ថា ផ្សាយម្នាក់ៗសុទ្ធតែទប់ស្កាត់ការកាប់បំផ្លាញព្រៃឈើ តាមការពិត បង្ក្រាបមិនបានអី បើរទេះនៅស្រុកបន្ទាយស្រី ឡើងទៅដឹកឈើនៅទីនោះរាប់រទេះ។ ចុះច្បាប់ហ្នឹង គេធ្វើមកធ្វើអី បើសិនជាអ្នកហ្នឹងប្រព្រឹត្តបទល្មើសហើយ ច្បាប់មិនអាចបង្ក្រាបបទល្មើសបាននោះ សុខចិត្តឱ្យបទល្មើសធំជាងច្បាប់វិញទៅមិនអីចឹង?»។
បុរសម្នាក់ទៀតនៅស្រុកបន្ទាយស្រី ដែរ បានមានប្រសាសន៍ថា ពួកឈ្មួញធ្លាប់មកជួលគាត់ឱ្យបររទេះគោទៅដឹកជញ្ជូនឈើចុះពីលើភ្នំ។ គាត់បញ្ជាក់ថា ចាប់តាំងពី ២ខែមុន គឺក្រុមអ្នករកស៊ីឈើខុសច្បាប់បានបញ្ជូនម៉ាស៊ីនជាច្រើនគ្រឿង ទៅកាប់ឈើនៅកំពូលភ្នំគូលែន ម្ដុំភូមិសាស្ត្រថ្មអារ ព្រៃបេង និងវាលទទឹងថ្ងៃ ជាប់គ្នានឹងព្រំប្រទល់ភ្នំហប់ នៃស្រុកបន្ទាយស្រី៖ «អូ! ច្រើនម៉ាស៊ីនណាស់ ដែលខ្ញុំឃើញត្រួសៗជាង ១០ម៉ាស៊ីន។ គេអារតែពេលថ្ងៃ វាស់ៗល្ងាច។ ភាគច្រើនគេចូលចិត្តអារគគីរ និងឈើទាល មុខប្រហែលជា ០,៧០ ទៅ ០,៨០ម៉ែត្រ។ គេជួលទៅដឹកឈើជាង ១០រទេះ គេគិតគូបតាមជិតតាមឆ្ងាយ បើជិតថ្លៃ ២៧ម៉ឺន ឆ្ងាយ ៣៣ម៉ឺនរៀល។ ភាគច្រើនថៅកែជាទាហាន»។
ទោះយ៉ាងណា នៅថ្ងៃច័ន្ទ វិទ្យុអាស៊ីសេរី មិនអាចទាក់ទងលោក ហុង តារាវុធ ជាប្រធានកម្រងបរិស្ថាននៃឧទ្យានជាតិភ្នំគូលែន ដើម្បីប្រតិកម្មព័ត៌មាននេះបាននៅឡើយទេ ដោយជំនួយការបានប្រាប់ថា លោកកំពុងជាប់រវល់។
ភ្នំគូលែន គឺជាអតីតរាជធានីបុរាណរបស់អាណាចក្រខ្មែរ ឈ្មោះ "មហិន្ទ្របព៌ត" ដែលមានអាយុកាលជាង ១.០០០ឆ្នាំមកហើយ។
បច្ចុប្បន្ន លើកំពូលភ្នំនោះនៅមានសេសសល់ប្រាសាទបុរាណជាង ៥០ផ្ទាំងថ្មចម្លាក់ និងកន្លែងសម្រាប់សក្ការបូជាព្រហ្មញ្ញជាច្រើនទៀត ព្រមទាំងព្រៃឈើគ្របដណ្ដប់ ដែលរដ្ឋាភិបាលបានរក្សាទុកជាឧទ្យានជាតិ។
ក៏ប៉ុន្តែ ការកាប់ឈើខុសច្បាប់ និងការកាប់រានព្រៃដើម្បីយកដីធ្វើកសិកម្មនៅលើកំពូលភ្នំ កំពុងគំរាមកំហែងយ៉ាងខ្លាំងដល់កិច្ចការពារបរិស្ថាន និងវត្ថុបុរាណនៅទីនោះ ដែលកាលពីពេលថ្មីៗ រដ្ឋាភិបាល និងក្រុមអ្នកជំនាញអន្តរជាតិ (ICC) បានយល់ឃើញស្របគ្នាថា គឺត្រូវតែការពារភ្នំគូលែនឱ្យគេចផុតការបំផ្លិចបំផ្លាញជាបន្ទាន់៕
No comments:
Post a Comment
yes