លោកឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា លោក ហោ ណាំងហុង ជួបជាមួយឯកអគ្គរាជទូតប្រទេសស៊ុយអែត (Sweden) និងឯកអគ្គរដ្ឋទូតប្រទេសប៉ាគីស្ថាន (Pakistan) ប្រចាំនៅកម្ពុជា ពិភាក្សាពីដំណើរការនៃការបោះឆ្នោតនិងការអភិវឌ្ឍនៅកម្ពុជា។
មន្ត្រីទូតប្រទេសស៊ុយអែត បានអះអាងថា ប្រទេសស៊ុយអែត កំពុងតែធ្វើការតាមដានយ៉ាងដិតដល់ ចំពោះដំណើរការបោះឆ្នោតនៅកម្ពុជា។ រីឯរដ្ឋាភិបាលប្រទេសប៉ាគីស្ថាន គ្រោងនឹងបញ្ជូនអ្នកសង្កេតការណ៍របស់ខ្លួនចូលប្រទេសកម្ពុជា នៅពេលបោះឆ្នោតនៅខែកក្កដា ខាងមុខនេះ។
នៅទីស្ដីការក្រសួងការបរទេស និងសហប្រតិបត្តិការអន្តរជាតិនៃក្រសួងការបរទេសកម្ពុជា នៅថ្ងៃទី១៥ កក្កដា លោក ហោ ណាំហុង ជួបជាមួយឯកអគ្គរាជទូតផុតអាណត្តិរបស់ប្រទេសស៊ុយអែត និងឯកអគ្គរដ្ឋទូតថ្មីរបស់ប្រទេសប៉ាគីស្ថាន នៅកម្ពុជា។
ក្នុងជំនួបដោយឡែកពីគ្នានោះ លោក ហោ ណាំហុង បានជួបជាមួយឯកអគ្គរាជទូតរបស់ប្រទេសស៊ុយអែត អ្នកស្រី អាន់ ហុកលែន (Anne Hoglund) ប្រចាំនៅកម្ពុជា។ អ្នកនាំពាក្យក្រសួងការបរទេស លោក កុយ គួង បានបញ្ជាក់ថា នេះគឺជាជំនួបដើម្បីសម្ដែងនូវការគួរសម និងជាការគោរពលារបស់លោកជំទាវ អាន់ ហុកលែន ក្នុងការបំពេញបេសកកម្មនៅកម្ពុជា។
លោកបានបន្តទៀតថា រដ្ឋាភិបាលប្រទេសស៊ុយអែត កំពុងតែធ្វើការតាមដានយ៉ាងដិតដល់ចំពោះដំណើរការបោះឆ្នោតនៅកម្ពុជា៖ «ក្នុងហ្នឹងដែរ លោកជំទាវក៏បានបញ្ជាក់ថា រដ្ឋាភិបាលប្រទេសស៊ុយអែត ក៏បានតាមដានដោយដិតដល់ក្នុងដំណើរនៃការបោះឆ្នោតនៅកម្ពុជា ជាពិសេសនៅក្នុងដំណើរការនៃការឃោសនានេះ។ លោកជំទាវបានពិនិត្យឃើញថា ដំណើរការនៃការឃោសនានេះ គឺថាមិនមានអំពើហិង្សាអ្វីទេ គឺឃើញថា ការឃោសនានេះប្រព្រឹត្តទៅប្រកបដោយសន្តិភាព»។
រីឯជំនួបរបស់លោក ហោ ណាំហុង ជាមួយលោក អាំចាត អាលីហ្សែ (Amjad Ali Sher) ជាឯកអគ្គរដ្ឋទូតថ្មីរបស់ប្រទេសប៉ាគីស្ថាន ដែលត្រូវបំពេញបេសកកម្មនៅកម្ពុជា ពេលនេះ លោក កុយ គួង បានបញ្ជាក់ថា ក្នុងជំនួបនេះ លោក ហោ ណាំហុង បានសម្ដែងនូវការស្វាគមន៍សម្រាប់ឯកអគ្គរដ្ឋទូតប៉ាគីស្ថានថ្មីក្នុងការបំពេញបេសកកម្មនៅកម្ពុជា។
លោក កុយ គួង ក៏បានបញ្ជាក់ទៀតថា រដ្ឋាភិបាលប្រទេសប៉ាគីស្ថាន កំពុងតែពិភាក្សាគ្នាក្នុងការបញ្ជូនអ្នកសង្កេតការណ៍របស់ខ្លួនឱ្យមកតាមដានដំណើរការបោះឆ្នោតនៅក្នុងប្រទេសកម្ពុជា។ ក្រៅពីប្រទេសប៉ាគីស្ថាន លោក កុយ គួង ក៏បានបញ្ជាក់ថា មានបណ្ដាប្រទេសជាច្រើនទៀតដែលត្រៀមខ្លួនក្នុងការបញ្ជូនអ្នកសង្កេតការណ៍របស់ខ្លួនមកកម្ពុជា ពិសេសប្រទេសជាសមាជិកអាស៊ាន។
លោក កុយ គួង៖ «ឯកឧត្ដមបានបញ្ជាក់ផងដែរថា រដ្ឋាភិបាលប៉ាគីស្ថាន បច្ចុប្បន្នកំពុងតែពិចារណានឹងបញ្ជូនអ្នកសង្កេតការណ៍មកកាន់ប្រទេសកម្ពុជា ដើម្បីមើលដំណើរការបោះឆ្នោតនេះ ហើយខ្ញុំសូមបញ្ជាក់ទាក់ទងនឹងដំណើរការបោះឆ្នោតនេះ គឺកន្លងមកប្រទេសអាស៊ាន ភាគច្រើនបំផុតបានបញ្ជាក់ថា ខ្លួននឹងបញ្ជូនអ្នកសង្កេតការណ៍មកកម្ពុជា។ រីឯប្រទេសមិនមែនអាស៊ាន មានដូចជា នូវែលហ្សេឡង់ ប្រទេសឥណ្ឌា ក៏បានបញ្ជាក់ថា នឹងបញ្ជូនអ្នកសង្កេតការណ៍មកកម្ពុជា និងប្រទេសមួយចំនួនទៀត»។
ការបញ្ជូនអ្នកសង្កេតការណ៍អន្តរជាតិឱ្យមកត្រួតពិនិត្យដំណើរការបោះឆ្នោតនៅកម្ពុជានេះ នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (Comfrel) លោក គល់ បញ្ញា បានលើកឡើងថា ការបញ្ជូនអ្នកសង្កេតការណ៍ឱ្យមកចូលនៅក្នុងការបោះឆ្នោតពេលនេះ ភាគច្រើនមិនមែនជាអ្នកជំនាញនោះទេ។ លោកបានបញ្ជាក់ទៀតថា ប្រសិនបើអ្នកដែលមានជំនាញ គឺគេមានក្រមសីលធម៌ ហើយមកត្រួតពិនិត្យមិនសម្រាប់តែថ្ងៃបោះឆ្នោតនោះទេ។
លោក គល់ បញ្ញា៖ «យើងមានអ្នកសង្កេតការណ៍បរទេសដែលជាអង្គការជាការអញ្ជើញរបស់គណបក្សនយោបាយ ជាអ្នកមុខអ្នកការអី ប្រទេសនានាមកសង្កេតអ៊ីចឹងណាស់ ប៉ុន្តែមិនមែនជាអ្នកដែលមានវិជ្ជាជីវៈអីទេ ព្រោះអ្នកដែលមានវិជ្ជាជីវៈជាអ្នកសង្កេតការណ៍អន្តរជាតិ គេមានក្រមសីលធម៌របស់គេ គេមានវិធីសាស្ត្រគេអង្កេត គេធ្វើការងារមិនមែនយកចិត្តទុកដាក់តែថ្ងៃបោះឆ្នោតទេ គេមើលតាំងពីពេលឃោសនាពេលអ៊ីចឹងទៅ គេមានការវាយតម្លៃអីត្រឹមត្រូវ គេមានវិធីសាស្ត្រ»។
ជំនួបរវាងឯកអគ្គរាជទូត និងឯកអគ្គរដ្ឋទូតទាំងពីរ ដែលបានធ្វើឡើងនៅព្រឹកថ្ងៃទី១៥ កក្កដា សម្រាប់ប្រទេសស៊ុយអែត បានផ្ដល់ជំនួយមកឱ្យសាលាក្ដីខ្មែរក្រហមប្រមាណជា ៤លានដុល្លារ ក្នុងឆ្នាំ២០១២-២០១៣។ ក្រៅពីនេះ ប្រទេសកម្ពុជា និងស៊ុយអែត បានចុះកិច្ចព្រមព្រៀងកិច្ចសហប្រតិបត្តិការនៃការអភិវឌ្ឍសម្រាប់ឆ្នាំ២០១២ ដល់ ២០១៣ នូវចំនួនទឹកប្រាក់ប្រមាណជា ៥៧លានដុល្លារសហរដ្ឋអាមេរិក។ សម្រាប់ប្រទេសកម្ពុជា និងប្រទេសប៉ាគីស្ថាន គ្រោងនឹងមានការដោះដូរនូវដំណើរទស្សនកិច្ចរវាងរដ្ឋាភិបាលកម្ពុជា ដែលជាប់ឆ្នោតអាណត្តិថ្មី និងរដ្ឋាភិបាលប៉ាគីស្ថាន នៅពេលខាងមុខ៕
No comments:
Post a Comment
yes