
លោក កឹម សុខា អនុប្រធានគណបក្សសង្គ្រោះជាតិ
អនុប្រធានគណបក្សសង្គ្រោះជាតិ លោក កឹម សុខា ព្រមានថា មហាបាតុកម្មមួយអាចនឹងកើតមានឡើងនៅចុងខែក្រោយ ប្រសិនបើគណបក្សប្រជាជនកម្ពុជាមិនព្រមបង្កើតគណៈកម្មការឯករាជ្យមួយ ដោះស្រាយភាពមិនប្រក្រតី ហើយបង្កើតរដ្ឋាភិបាលដោយឯកបក្សនោះ។
ថ្លែងក្នុងវេទិកាផ្លាស់ប្តូរមតិយោបល់ ដើម្បីស្វែងរកយុត្តិធម៌ជូនម្ចាស់ឆ្នោតនៅរសៀល ថ្ងៃទី១៥ ខែសីហា លោក កឹម សុខា ថ្លែងថា ពេលនេះថ្នាក់ដឹកនាំ គណបក្សសង្គ្រោះជាតិ កំពុងចរចាបង្កើតគណៈកម្មការឯករាជ្យមួយ ដែលមានសមាសភាពគណបក្សសង្គ្រោះជាតិ គណបក្សប្រជាជនកម្ពុជា អង្គការសង្គមស៊ីវិល និងមានអង្គការសហប្រជាជាតិ ជាអ្នកអង្កេតការណ៍ ដើម្បីដោះស្រាយភាពមិនប្រក្រតីពេលបោះឆ្នោត រកយុត្តិធម៌ជូនម្ចាស់ឆ្នោត។ តែលោកបញ្ជាក់ថា រហូតដល់ថ្ងៃទី១៥ ខែសីហា ភាគីទាំងពីរនៅមិនទាន់ឯកភាពគ្នានៅឡើយ។
ភាពជាប់គាំងនេះ លោក កឹម សុខា ព្រមានថា មហាបាតុកម្មអាចនឹងកើតមាន ប្រសិនបើការប្រជុំសភាដំបូងចាប់ផ្តើមនៅចុងខែកញ្ញា ខណៈបញ្ហាមិនទាន់ដោះស្រាយ ហើយគណបក្សប្រជាជនកម្ពុជាយកអាសនៈរបស់គណបក្សប្រឆាំង ឬមានការស្នើពីប្រជាពលរដ្ឋឲ្យមានមហាតុកម្មនោះ ៖ "បើប្រជាពលរដ្ឋថា យី អត់បានទេ គេយកសិទ្ធិគាត់ហើយ គេប្លន់កៅអីតំណាងរាស្ដ្រគាត់ហើយ គាត់ត្រូវតែទៅយកមកវិញ បងប្អូនក្រោកឈរឡើង ធ្វើមហាបាតុកម្មយើងខ្ញុំជាអ្នកដឹកនាំគណបក្សសង្គ្រោះជាតិ ត្រូវតែគាំទ្រប្រជាពលរដ្ឋ" ។
កន្លងមក លោកនាយករដ្ឋមន្ត្រី ហ៊ុន សែន ធ្លាប់ព្រមានថា ប្រសិនបើមហាបាតុកម្ម របស់គណបក្សប្រឆាំងកើតឡើងនោះ អ្នកគាំទ្រលោកអាចនឹងធ្វើមហាបាតុកម្មទប់ទល់វិញ។
សម្រាប់ប្រធានផ្នែកស៊ើបអង្កេតសិទ្ធិមនុស្ស និងជាមេធាវីនៃសមាគមការពារសិទ្ធិមនុស្សអាដហុក លោក នី ចរិយា មានប្រសាសន៍ថា អាជ្ញាធរមានសមត្ថកិច្ចមានតួនាទីសម្របសម្រួលបាតុកម្មកុំឲ្យមានហិង្សា ពិសេសពេលមានបាតុកម្មពីរប្រឆាំងគ្នា ត្រូវបញ្ជៀសកុំឲ្យក្រុមទាំងពីរជួបគ្នា ៖ "រក្សាមិនឲ្យមាន អំពើហិង្សាកើតឡើង វាអាចកើតឡើងពី ភាពខាងក្រៅមក ដោយសារតែមានក្រុមបាតុករណាផ្សេង ដែលក្រុមបាតុកម្ម ពីផ្ទុយគ្នាហើយបង្កជាហិង្សាអញ្ចឹងអាជ្ញាធរត្រូវមានកាតព្វកិច្ចហ្នឹង បើសិនជាមានក្រុមបាតុកម្មណាទៀតកើតឡើងដើម្បីប្រឆាំង ត្រូវតែបញ្ជៀសចេញឲ្យឆ្ងាយពីគ្នា នេះតាមច្បាប់បាតុកម្ម" ។
មាត្រា១៧នៃច្បាប់ស្តីពីបាតុកម្មដោយសន្តិវិធី ចែងថា អាជ្ញាធរមានសមត្ថកិច្ច ចាត់វិធានការការពារដល់ក្បួនបាតុកម្មដោយសន្តិវិធី ដើម្បីធានារក្សាសន្តិសុខ សុវត្ថិភាព និងសណ្តាប់ធ្នាប់សាធារណៈ ឲ្យបានល្អប្រសើរ ហើយមិនត្រូវជ្រៀតជ្រែក ដល់ការប្រព្រឹត្តទៅនៃការធ្វើបាតុកម្មដោយសន្តិវិធីឡើយ។
ទោះយ៉ាងណា លោក កឹម សុខា បញ្ជាក់ថា រូបលោកក៏ដូចជាថ្នាក់ដឹកនាំគណបក្សសង្គ្រោះជាតិមិនចង់ឲ្យមានបាតុកម្មទេ ព្រោះអាចនាំកើតរឿងសោកនាដកម្មដល់សង្គម។ តែលោកថា ប្រសិនបើបញ្ហាភាពមិនប្រក្រតីនៃការបោះឆ្នោតមិនមានដំណោះស្រាយ ហើយពលរដ្ឋផ្ទុះបាតុកម្មឡើងនោះ លោកនឹងគាំទ្រពលរដ្ឋ។ លោកបន្តថា មហាតុកម្មដែលលោករៀបចំនឹងធ្វើឡើងសន្តិវិធីមិនឲ្យមានហិង្សាកើតឡើងទេ ៖ "យើងខ្ញុំនឹងសូមអំពាវនាវឲ្យប្រជាពលរដ្ឋទាំងអស់ ដែលធ្វើមហាបាតុកម្មនោះ ដោយអហិង្សា អហិង្សា អហិង្សាបាទ បើធ្វើបាតុកម្មក៏យើងធ្វើដោយអហិង្សាដែរបាទ ហើយយើងត្រូវតែធ្វើបើថា សម្រេចធ្វើហើយ ធ្វើរហូតដល់ជោគជ័យ"។
ដើម្បីជៀសវាងមហាវិនាសកម្ម ដែលបង្កការឈឺចាប់សម្រាប់មនុស្សជំនាន់នេះ និងមនុស្សជំនាន់ក្រោយនោះ លោក ឡៅ ម៉ុង ហៃ ជាអ្នកវិភាគបញ្ហាសង្គមមួយរូប អំពាវនាវឲ្យគណបក្សទាំងពីរបង្ហាញជំហរចរចាគ្នា ដោយតម្កល់ប្រយោជន៍ជាតិជាធំ។ លោក ឡៅ ម៉ុង ហៃ បញ្ជាក់ថា ប្រសិនបើ គណបក្សប្រជាជនកម្ពុជា បញ្ឈប់ការដាក់កម្លាំងទ័ពពង្រាយគំរាមបក្សប្រឆាំង ហើយចំណែកគណបក្សប្រឆាំងបញ្ឈប់ការគំរាមយកកម្លាំងមហាជនធ្វើបាតុកម្ម នោះដំណោះស្រាយសមស្របមួយនឹងកើតចេញពីការចរចា ជាមិនខាន៕
No comments:
Post a Comment
yes