ថ្នាក់ដឹកនាំកំពូលទាំងពីររូបរបស់គណបក្សសង្គ្រោះជាតិ ដឹកនាំ សច្ចាប្រណិធាន
តំណាងរាស្រ្តនៃគណបក្សសង្គ្រោះជាតិចូលរួម ស្បថសច្ចា
ថ្នាក់ដឹកនាំគណបក្សសង្គ្រោះជាតិ នៅព្រឹកថ្ងៃអាទិត្យនេះ បានប្រកាសប្ដេជ្ញាជាថ្មីទៀតថា មិនចូលរួមប្រជុំសភាលើកដំបូង នៅថ្ងៃទី២៣ ខែកញ្ញា ឆ្នាំ២០១៣ នៅថ្ងៃស្អែកនេះទេ ដើម្បីបង្ហាញពីភាពស្មោះត្រង់ចំពោះម្ចាស់ឆ្នោត និងប្រទេសជាតិ។
ថ្លែងបន្ទាប់ពីធ្វើសច្ចាប្រណិធាន មិនចូលប្រជុំសភា នៅពីមុខប្រាសាទអង្គរវត្ដ និងពលរដ្ឋម្ចាស់ឆ្នោតរាប់រយនាក់ ប្រធានគណបក្សសង្គ្រោះជាតិ លោក សម រង្ស៊ី មានប្រសាសន៏ថា បេក្ខជនតំណាងរាស្ដ្រ មកពីគណបក្សប្រឆាំងចំនួន ៦៣រូប ព្រមព្រៀងគ្នាមិនចូលប្រជុំសភានៅថ្ងៃស្អែក ទៅតាមការកោះហៅរបស់ព្រះមហាក្សត្រនោះទេ។
លោកបញ្ជាក់ថា នៅថ្ងៃស្អែក ជាថ្ងៃប្រជុំសភាដំបូង ក្រុមតំណាងរាស្ត្រទាំង៦៣រូប នោះ នឹងនៅលើទឹកដីអង្គរជាមួយប្រជាពលរដ្ឋ ដើម្បីបង្ហាញពីភាពស្មោះត្រង់ ការស្រលាញ់យុត្តិធម៌ដល់ម្ចាស់ឆ្នោត និងប្រទេសជាតិ។
ដោយឡែក អនុប្រធានគណបក្ស លោក កឹម សុខា មានប្រសាសន៏ថា បេក្ខជនតំណាងរាស្ដ្រ ទាំង៦៣នាក់ បានស្បថសច្ចា នៅចំពោះបារមីវត្ថុសក្ដិសិទ្ធិថែរក្សាប្រាសាទអង្គរវត្ដថា ពូកគេនឹងមិនក្បត់ឆន្ទៈពលរដ្ឋ និងមិនក្បត់ជាតិនោះទេ ។ លោកបញ្ជាក់ថា ពួកគេនៅតែយកព្រះមហាក្សត្រជាទីគោរពដដែល ប៉ុន្ដែ អ្វីដែលសំខាន់ជាងនេះ គឺទឹកចិត្ត និងឆន្ទះពលរដ្ឋជាម្ចាស់ឆ្នោតទាំងអស់។ លោកបន្ថែមថា ថ្នាក់ដឹកនាំគណបក្សសង្គ្រោះជាតិ នឹងយកថ្ងៃប្រជុំសភាដំបូង ធ្វើពិធីកាន់បិណ្ឌរាប់បាត ប្រគេនព្រះសង្ឃ នៅខេត្ដសៀមរាប ជាមួយពលរដ្ឋ ព្រោះសាសនា ជារឿងសំខាន់បន្ទាប់ពីជាតិ។
កាលពីថ្ងៃទី០៩ ខែកញ្ញា ឆ្នាំ២០១៣នេះ ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានផ្ញើព្រះរាជសារ អញ្ជើញតំណាងរាស្ដ្រជាប់ឆ្នោតទាំងពីរគណបក្ស ចូលរួមប្រជុំនៅថ្ងៃទី២៣ខែកញ្ញា ស្អែកនេះ ដើម្បីបង្ហាញនូវការរួបរួម និងឯកភាពជាតិ។
កាលពីថ្ងៃទី១៩ ខែកញ្ញា ថ្នាក់ដឹកនាំគណបក្សសង្គ្រោះជាតិ បានដាក់លិខិតថ្វាយព្រះមហាក្សត្រជាថ្មី សុំការពន្យារពេលប្រជុំសភាលើកដំបូង ដោយលើកហេតុផលថ្វាយព្រះមហាក្សត្រថា ពុំទាន់មានដំណោះស្រាយពីភាពមិនប្រក្រតី នៅថ្ងៃបោះឆ្នោត ទី២៨ ខែកក្កដា ឆ្នាំ២០១៣នៅឡើយ៕
No comments:
Post a Comment
yes