សមត្ថកិច្ច ស្រុកកណ្តាលស្ទឹង ខេត្តកណ្តាល ដាក់របាំងបិទផ្លូវជាតិលេខ២ រារាំងប្រជាពលរដ្ឋ ដែលធ្វើដំណើរតាមរថយន្ត ម៉ូតូកង់បី និង ម៉ូតូជាច្រើនគ្រឿង មកកាន់រាជធានីភ្នំពេញ នៅព្រឹកថ្ងៃអាទិត្យនេះ ដោយបារម្ភខ្លាចអ្នកទាំងនោះធ្វើបាតុកម្ម។
ប្រជាពលរដ្ឋពលរដ្ឋនៅស្រុកកណ្ដាលស្ទឹងម្នាក់ ដែលធ្វើដំណើរមកកាន់រាជធានីភ្នំពេញ កញ្ញា អឿង ចន្ទរី អះអាងថា សមត្ថកិច្ចនៅស្រុកកណ្ដាលស្ទឹង បានឃាត់ឡានរបស់ពួកគាត់ ដោយដាក់របាំងបិទផ្លូវ និងអះអាងថា ការពារកុំឲ្យប្រជាពលរដ្ឋធ្វើបាតុកម្មនៅភ្នំពេញ។ កញ្ញា អឿង ចន្ទរី បន្តថា បើទោះបីជាអ្នកបើកបរយកប័ណ្ណបើកបរបង្ហាញ ក៏សមត្ថកិច្ចមិនអនុញ្ញាតិឲ្យទៅនោះឡើយ។
VODមិនអាចសុំការពន្យល់ពីអធិការស្រុកកណ្តាលស្ទឹង ជុំវិញការដាក់កម្លាំងបិទផ្លូវនេះនៅឡើយទេ។ តែសមត្ថកិច្ចស្រុកកណ្ដាលស្ទឹងម្នាក់ សុំមិនបញ្ចេញឈ្មោះ អះអាងថា ការកកស្ទះនោះ មិនមែនដោយសារសមត្ថកិច្ចបិទផ្លូវនោះទេ តែដោយសារប្រជាពលរដ្ឋច្រើន ធ្វើដំណើរដែលបណ្តាល ឲ្យមានការកកស្ទះដោយខ្លួនឯង។
បន្ទាប់ពីមានការកកស្ទះ អស់រាប់ម៉ោងទើបអភិបាលស្រុកកណ្តាលស្ទឹង លោក ចយ សុបិន្ត បានចុះទៅសម្របសម្រួលឲ្យ ប្រជាពលរដ្ឋអាចធ្វើចរាចរណ៍បានធម្មតាវិញ។
ចាប់ពីក្រោយការបោះឆ្នោតមក សមត្ថកិច្ចនៅរាជធានីភ្នំពេញ ក៏ដូចជា នៅតាមបណ្តាខេត្ត មួយចំនួនរឹតបន្តឹងសន្តិសុខ ចំពោះប្រជាពលរដ្ឋដែលធ្វើដំណើរពី តាមដងផ្លូវ មកចូលរួមរាជធានីភ្នំពេញដូចជា ផ្លូវជាតិលេខ៥ ផ្លូវជាតិលេខ២ និង ផ្លូវជាតិលេខ១ ជាដើម៕
ប្រភពពី VOD
No comments:
Post a Comment
yes