លោក កឹម សុខា អនុប្រធានគណបក្សសង្គ្រោះជាតិ
ថ្នាក់ដឹកនាំគណបក្សសង្គ្រោះជាតិ អំពាវនាវដល់សប្បុរសជនទាំងក្នុង និងក្រៅប្រទេស ជួយឧបត្ថម្ភជាថវិកា និងសម្ភារៈប្រើប្រាស់ ដល់ប្រជាពលរដ្ឋរងគ្រោះដោយសារទឹកជំនន់ ខណៈកម្ពុជាកំពុងរងការគំរាមកំហែងខ្លាំង។
អនុប្រធានគណបក្សសង្គ្រោះជាតិ លោក កឹម សុខា មានប្រសាសន៍ថា លោកបានកោះប្រជុំតំណាងរាស្ត្រគណបក្សសង្គ្រោះជាតិជាបន្ទាន់ ដើម្បីឲ្យអ្នកតំណាងរាស្ត្រចុះជួយប្រជាពលរដ្ឋរងគ្រោះដោយទឹកជំនន់តាមមណ្ឌលរបស់ពួកគេ។ លោកបន្តថា លោកក៏កំពុងស្វះស្វែងរកជំនួយក្នុងស្រុក និងក្រៅស្រុក ជួយអ្នករងគ្រោះទឹកជំនន់ផងដែរ។
សម្រាប់នីតិកាលទី៥នេះ គណបបក្សសង្គ្រោះជាតិ ទទួលបានអាសនៈសរុបទៅដល់៥៥ ក្នុងសំឡេងគាំទ្រពីប្រជាពលរដ្ឋដល់ទៅជាង២លាន៩សែននាក់នៅទូទាំងប្រទេស។
មន្ត្រីជំនាញ កាលពីថ្ងៃចន្ទ ឲ្យដឹងថា យ៉ាងហោចណាស់មនុស្ស៣០នាក់ បានស្លាប់ដោយសារមហន្តរាយទឹកជំនន់ក្នុងខេត្តមួយចំនួន ចាប់ពីថ្ងៃទី១៦ដល់ថ្ងៃទី ៣០ ខែកញ្ញា ឆ្នាំ២០១៣នេះ ខណៈផ្ទះជាង៦ម៉ឺនខ្នង រងការខូចខាត។
ខេត្តមួយចំនួន ដែលកំពុងស្ថិតក្នុងការគំរាមកំហែងធ្ងន់ធ្ងរពីទឹកជំនន់ រួមមាន ខេត្តកំពង់ចាម ខេត្តក្រចេះ ខេត្តស្ទឹងត្រែង ឧត្តរមានជ័យ រតនគិរី និងខេត្តពោធិ៍សាត់។ ក្នុងខេត្តកំពង់ចាម មនុស្ស៦នាក់ ស្លាប់ ឧត្តរមានជ័យ២នាក់ ក្រចេះ២នាក់ ស្ទឹងត្រែង១នាក់ រតនគីរី ១នាក់ និងនៅតាមបណ្ដាខេត្តមួយចំនួនទៀត។
នាយខុទ្ទកាល័យ និងជាអនុប្រធាននាយកដ្ឋានព័ត៌មាននៃគណៈកម្មាធិការជាតិគ្រប់គ្រង គ្រោះមហន្ដរាយ លោកកែវ វី ប្រាប់ VODថា ប្រជាជន ដែលត្រូវបានជម្លៀសរកទីសុវត្ថិភាព មានចំនួន ៩៥០៩គ្រួសារ ផ្ទះដែលត្រូវលិចខូចខាត មានចំនួន ៦៧៥៥១ខ្នង ដែលក្នុងនោះផ្ទះ ២៥ខ្នង រងការខូចខាតទាំងស្រុង។ ចំណែកសាលារៀន ត្រូវបានទឹកលិច មានចំនួន ៥១៣ វត្តអារាម មានចំនួន ២៨៣ មណ្ឌលសុខភាព ត្រូវបានទឹកលិចមានចំនួន ២៥កន្លែង។ ចំណែកដំណាំស្រូវដែលខូចខាត និងលិចទឹកមានចំនួន ៩៣១០៤ ហិកតា និងដំណាំបន្ទាប់បន្សំ ដែលត្រូវលិចលង់ មានចំនួន៣៩៤៤ហិកតា។
កាលពីថ្ងៃទី២៥ ខែកញ្ញា លោកនាយករដ្ឋមន្ត្រី ហ៊ុន សែន អំពាវនាវឲ្យអាជ្ញាធរជាតិ និងក្រោមជាតិ បង្កើនការប្រុងប្រយ័ត្នជួយប្រជាពលរដ្ឋ ខណៈទឹកជំនន់ កំពុងក្លាយជាបញ្ហាព្រួយបារម្ភ និងយកចិត្តទុកដាក់ក្នុងការជម្លៀស ការផ្តល់ស្បៀងអាហារ និងការថែទាំងសុខភាពជាដើម និងពលរដ្ឋ ត្រូវប្រុងប្រយ័ត្នសម្រាប់សុវត្ថិភាពក្រុមគ្រួសារ ជាពិសេសផ្ទះដែលងាយរងគ្រោះ៕
No comments:
Post a Comment
yes