លោក នាង សុឃុន យុវជនម្នាក់មកពីសម្ព័ន្ធកូនខ្មែរអ្នកស្នេហាជាតិ
(រូបថត តាំង វីដា)
ការិយាល័យឧត្តមស្នងការអង្គការសហប្រជាជាតិប្រចាំកម្ពុជា(UN) នៅម៉ោង១០ព្រឹកថ្ងៃចន្ទនេះ បានទទួលបណ្តឹង ស្នើអន្តរាគមន៍របស់យុវជនរងគ្រោះម្នាក់ ក្នុងហេតុការណ៍ប៉ះទង្គិចនៅក្បែរស្ពានស្ទឹងមានជ័យ ដែលប្តឹងស្នងការនគរបាល និងមេបញ្ជាការកងរាជអាវុធហត្ថរាជធានីភ្នំពេញ ពីបទឃាតកម្មប្រព្រឹត្តដោយរាជការសាធារណៈ។
យុវជនម្នាក់មកពីសម្ព័ន្ធកូនខ្មែរអ្នកស្នេហាជាតិ លោក នាង សុឃុន អាយុ២៥ឆ្នាំ ឲ្យដឹងក្រោយពីដាក់ពាក្យបណ្តឹងនេះរួច ដោយជឿជាក់ថា អង្គការសហប្រជាជាតិ នឹងអន្តរាគមន៍ចាត់វិធានការ ជំរុញឲ្យតុលាការពន្លឿន ដោះស្រាយបណ្តឹងនេះ។ លោករិះគន់ថា ប្រព័ន្ធតុលាការនៅកម្ពុជា មិនឯករាជ្យ និងមិនអាចផ្តល់យុត្តិធម៌ដល់ជនរងគ្រោះនោះទេ ប្រសិនបើមិនមានការជំរុញខ្លាំងពីភាគីពាក់ព័ន្ធ ៖ "ខ្ញុំសប្បាយចិត្តនៅពេលដែលខ្ញុំយកពាក្យបណ្តឹងមកដាក់នៅឧត្តមស្នងការអង្គការសហប្រជាជាតិ ហើយឧត្តមស្នងការអង្គការសហប្រជាជាតិ គាត់មិនបានរេរា ហើយក៏មិនរុញដាក់គ្នា ដូចជាតុលាការខ្មែរទេ។ តុលាការស្រុកខ្មែរគឺមិនមានវិធានការ មិនមានចំណាត់ការទៅលើពាក្យបណ្តឹងរបស់ខ្ញុំទេ ដោយសារតុលាការស្រុកខ្មែរ ដូចដឹងស្រាប់ហើយថាតុលាការស្រុកខ្មែរ នៅក្រោមបញ្ជា នៅក្រោមសម្ពាធរបស់រាជរដ្ឋាភិបាលរបស់លោកហ៊ុន សែន នោះ"។
លោក នាង សុឃុន ឲ្យដឹងថា កាលពីថ្ងៃទី១៤ ខែវិច្ឆិកា លោកបានដាក់ពាក្យបណ្តឹងដូចគ្នានេះ ទៅអយ្យការអមសាលាដំបូងរាជធានីភ្នំពេញ ដោយអះអាងថា លោក ជួន សុវណ្ណ និង លោក រ័ត្ន ស្រ៊ាង បានបញ្ជាឲ្យកម្លាំងសមត្ថកិច្ច បាញ់សម្លាប់កម្មករ និងពលរដ្ឋស្លូតត្រង់ ដែលធ្វើឲ្យរូបលោករងរបួស ស្ត្រីម្នាក់ឈ្មោះ អេង សុខុម ស្លាប់ ព្រមទាំងព្រះសង្ឃ និងយុវជននៅមុខវត្តស្ទឹងមានជ័យ រងរបួសជាច្រើននាក់ទៀត។ កាលពីថ្ងៃទី២៦ ខែវិច្ឆិកា លោកបានចូលជួបជាមួយមន្ត្រីសាលាដំបូងរាជធានីភ្នំពេញសួរនាំ តែតុលាការ ហាក់ព្យាយាមលាក់បាំងព័ត៌មាន មិនចាត់ការរឿងនេះ។
ព្រះរាជអាជ្ញារងសាលាដំបូងរាជធានីភ្នំពេញ លោក សុខ រឿន បដិសេធឆ្លើយតបសំណួររបស់VOD ដោយលោកថា មិនមានអ្វីតបឡើយ។
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្សនៃអង្គការ លីកាដូ លោក អំ សំអាត យល់ថា ពាក្យបណ្តឹងនេះ គ្រាន់តែសញ្ញាណមួយទៅកាន់អង្គការសហប្រជាជាតិ ពីភាពមិនឯករាជ្យ របស់តុលាការកម្ពុជា ពាក់ព័ន្ធនឹងបទល្មើសដែលកើតឡើងដោយមន្ត្រីមានអំណាច ហើយមិនត្រូវបានចាត់ការ។ លោកថា ករណីប៉ះទង្គិចនៅស្ពានស្ទឹងមានជ័យនោះ រហូតមកទល់ពេលនេះ គឺជនបង្កហេតុ មិនត្រូវបានផ្តន្ទាទោសឡើយ ដោយសារអាជ្ញាធរ មានចេតនាទម្លាក់សមត្ថកិច្ចទៅវិញទៅមក មិនចាត់ការរឿងនេះ ៖ "សមត្ថកិច្ចគាត់បានដោះដៃតាំងពីដំបូងថាជនទីបី ហើយយើងគិតមើលបើគាត់ដឹងថាជនទីបី នៅថ្ងៃនោះ សមត្ថកិច្ចរាប់រយរាប់ពាន់នាក់ គាត់ចាប់អស់ហើយ គាត់មិនមែនទុកដល់ឥឡូវទេ អញ្ចឹងវាគ្រាន់តែជាការមួយដែលឆ្លើយដោះសារដើម្បីគេចពីការទទួលខុសត្រូវ អញ្ចឹងខ្ញុំគ្មានសង្ឃឹមទេក្នុងការផ្តល់យុត្តិធម៌សម្រាប់ជនរងគ្រោះនោះ"។
ក្នុងហេតុការណ៍ផ្ទុះហិង្សានៅក្បែរស្ពានស្ទឹងមានជ័យ កាលពីថ្ងៃទី១២ខែវិច្ឆិកា ជនសង្ស័យពីរនាក់ ត្រូវបានតំណាងអយ្យការអមសាលាដំបូងរាជធានីភ្នំពេញ សម្រេចចោទប្រកាន់ជាផ្លូវការ ចំនួន៤ករណី ដែលក្នុងនោះរួមមាន បទបង្កការខូចខាតដោយចេតនា ដោយមានស្ថានទម្ងន់ទោស បទជេរប្រមាថតាមមាត្រា៥០២ បទប្រឆាំងនឹងអ្នករាជការសាធារណៈ តាមមាត្រា ៥០៣ និងបទស្ថានទម្ងន់ទោសនៃប្រឆាំងនិងរាជការ តាមមាត្រា៥០៤ នៃក្រមព្រហ្មទណ្ឌ។ ដោយឡែក ជនបាញ់សម្លាប់ស្ត្រីលក់បាយម្នាក់ឲ្យស្លាប់នោះ សមត្ថកិច្ច នៅមិនទាន់បានរកឃើញនៅឡើយទេ៕
No comments:
Post a Comment
yes