ពលករខ្មែរច្រើនម៉ឺននាក់ត្រូវបានរដ្ឋាភិបាលថៃចាប់បញ្ជូនមកកម្ពុជានិងមិនត្រូវបានយកចិត្តទុកដាក់ពីរដ្ឋាភិបាលខ្មែរនោះឡើយ

បើគិតមកដល់ពេលនេះ ពលករខ្មែរដែលចេញទៅធ្វើការនៅប្រទេសថៃ មានចំនួនជាង៣ម៉ឺន​នាក់ហើយ ដែលត្រូវបានរដ្ឋាភិបាលថៃចាប់បញ្ជូនមកកម្ពុជាវិញ ។

ការចាប់បញ្ជូនពលករខ្មែរ មកកាន់ប្រទេសកម្ពុជាវិញ នៅបន្ទាប់ពីប្រទេសមួយនេះ កើតមានវិបត្តិ​នយោ​បាយដ៏ធ្ងន់ធ្ងរ ហើយត្រូវបានគ្រប់គ្រងដោយយោធា ដែលមានលោក ចាន់ អូចា ជានា​យក​រដ្ឋមន្រ្តី ក្រោមលេះខ្លាចក្រែងពលរដ្ឋខ្មែរចូលរួមធ្វើចលនាជាមួយបណ្តាគណបក្សនានា ដើម្បី​បង្កើត​ភាពវឹកវរដល់ប្រទេសថៃ ។

ជាការឆ្លើយតប ថ្លែងនៅក្នុងសន្និសិទសារព័ត៌មាន ព្រឹកថ្ងៃទី១៣ មិថុនា លោកប្រធាន សម រង្ស៊ី បានស្នើកុំឲ្យរដ្ឋាភិបាលថៃ មើលពលរដ្ឋខ្មែរ ដែលជាពលករក្នុងផ្លូវមិនល្អ ព្រោះពលរដ្ឋខ្មែរ​ចេញ​ទៅធ្វើការនៅប្រទេសថៃ គឺដើម្បីរកប្រាក់សម្រាប់ផ្គត់ផ្គង់គ្រួសារតែ​ប៉ុណ្ណោះ ដោយហេតុ​មកពី​ឱ​កាសការងារនៅក្នុងស្រុក ត្រូវបានរដ្ឋាភិបាលលោក ហ៊ុន សែន មិនបានគិតគូរដល់ពលរដ្ឋ​ខ្លួន​ ក្រៅតែពីការបើកដៃឲ្យអន្តោប្រវេសន៏យួនហូរចូលខុសច្បាប់មក​កម្ពុជាកាន់តែច្រើនឡើងៗ ដណ្តើម​ការងារពលរដ្ឋខ្មែរ ។

លោកប្រធាន សម រង្ស៊ី បន្ថែមទៀតថា នៅថ្ងៃទី១៣ មិថុនា ២០១៤នេះ លោកប្រធាន និងសរ​សេរលិខិតទៅនាយករដ្ឋមន្រ្តីថៃ ចាន់ អូចា ដើម្បីស្នើឲ្យមានការយោគយល់ មានការអនុ​គ្រោះ ឲ្យសម្រួល ឲ្យអាណិតស្រលាញ់ មានធម្មមេត្តា ឲ្យគោរពគោលការណ៏មនុស្ស​ធម៌ និងឲ្យ​គោរ​ព​សិទ្ធិមនុស្ស ចំពោះបងប្អូនប្រជាពលករខ្មែរទាំងអស់ ព្រោះប្រ​ទេសថៃ និងប្រទេសកម្ពុជា គឺ ប្រ​ទេសជាមិត្តយូរអង្វែងមកហើយ ។

ក្នុងនោះ លោកប្រធាន សម រង្ស៊ី ក៏បានឲ្យដឹងទៀតថា ការសរសេរលិខិតទៅនាយករដ្ឋមន្រ្តីថៃ មិនមែនជាលើកទី១របស់លោកប្រធានទេ ព្រោះកាលពីលោកស្រី យីង ឡាក់ នៅជានាយក​រដ្ឋ​មន្រ្តី លោកប្រធានក៏ធ្លាប់សរសេរលិខិតទៅម្តងដែរ ដោយស្នើរសុំឲ្យរដ្ឋាភិបាលថៃ ចាត់វិធានការ ចំពោះការធ្វើបាបពលរដ្ឋខ្មែរដែលជាកម្មករនេសាទនៅដែនសមុទ្រយ៉ាងឃោសឃៅ ប្រៀបបីដូច

ជាឃាសករ កាលពី២ឆ្នាំមុន ។

ក្នុងនោះចំពោះការទទួលខុសត្រូវលើកពលករខ្មែរដែលត្រូវបានរដ្ឋាភិបាលថៃ ចាប់បញ្ជូនដោយ បង្ខំឲ្យវិលមកកម្ពុជាវិញលោកថា រដ្ឋាភិបាលលោក ហ៊ុន សែន គឺជាអ្នកទទួលខុសត្រូវ មិនត្រូវ​ធ្វើ​ព្រងើយកន្តើយ មិនដឹងមិនឭរបៀបនេះនោះទេ ហើយក៏មិនត្រូវចេះត្រឹមតែ ក្នុងការដឹកពួក​គាត់​វិល​ទៅកាន់លំនៅដ្ឋានវិញប៉ុណ្ណោះដែរ គឺត្រូវធ្វើយ៉ាងណារកការងារក្នុងស្រុកជូនពលរដ្ឋធ្វើ ពិ​សេសពេលនេះត្រូវតែផ្តល់ជំនួយឧបត្ថមមនុស្សធម៌ដល់ពលករទាំងនោះ ព្រោះពួកគាត់ភាគ​ច្រើន​មិនទាន់ទាំងបើកប្រាក់ឈ្នួលផង ត្រូវគេចាប់ទាំងបង្ខំឲ្យវិលមកកម្ពុជាវិញ ។

លោកថា ពេលនេះគណបក្សសង្គ្រោះជាតិ ធ្វើជាគំរូដោយគណបក្សសង្គ្រោះជាតិ បានផ្តល់ជាជំ នួយមនុស្សធម៌ ក្នុងចំណោមពលករចំនួន៥១នាក់ ដែលបានឡើងមកដល់គណបក្ស​សង្គ្រោះ​ជាតិ នៅថ្ងៃនេះ គណបក្សសង្គ្រោះជាតិ បានផ្តល់ថវិការដល់ពួកគាត់ក្នុងនាមមនុស្សធម៌ ម្នាក់​ទទួលបានចំនួន៦រយបាត ដែលស្មើរជាង៧ម៉ឺនរៀល ហើយគណបក្សនិងបង្កើតមូលនី​ធិមនុស្ស​ធម៌ ដើម្បីជួយដល់ពលករខ្មែរយើង ដែលត្រូវបានរដ្ឋាភិបាលថៃ​ចាប់បញ្ជូនមកកម្ពុជាវិញនា​ពេល​នេះ ។

ជាមួយគ្នានោះ តំណាងកម្មករ បានថ្លែងប្រាប់ឲ្យដឹងថា ពួកគាត់នៅពេលនេះគឺប្រៀបបីដូចជា មនុស្សដែលស្លាប់អញ្ចឹង ព្រោះពេលវិលមកដល់កម្ពុជា ពួកគាត់គ្មានមុខរបរការងារអ្វីធ្វើដើម្បី​ដោះ​បំណុលគេ និងសម្រាប់ចិញ្ចឹងជីវិតឡើយ ព្រោះតែការអសមត្ថភាពរបស់រដ្ឋាភិបាល ក្នុងការ​បង្កើតការងារក្នុងស្រុកដល់ប្រជាពលរដ្ឋ ដោយហេតុថានៅពេលដែលពួកគាត់ធ្វើការងារ​នៅ​ប្រ​ទេសថៃ គឺពួកគាត់ទទួលបានប្រាក់ខែរស់នៅសមរម្យ សម្រាប់ផ្គត់ផ្គង់ជីវភាព និងការដោះបំ​ណុល​ក្នុងស្រុក តែពេលនេះជីវិតរបស់ពួកគាត់គឺសូន្យ ។

សូមជំរាបថា ពលរដ្ឋខ្មែរចាប់តាំងពីថ្ងៃទី៩ មិថុនា ២០១៤មក ត្រូវបានរដ្ឋាភិបាលថ្ងៃ ចាប់បង្ខំ ដើម្បីឲ្យវិលមកកម្ពុជាវិញក្នុងមួយថ្ងៃៗរាប់សិបនាក់ ក្នុងន័យរៀបចំប្រទេស ដើម្បីកុំឲ្យមានភាព​ចលាចល និងនាំយកសុវត្ថិភាព របបលទ្ធិប្រជាធិបតេយ្យជូនប្រទេសនេះឡើងវិញ ។

ដូច្នេះ រដ្ឋាភិបាលរបស់លោក ហ៊ុន សែន ត្រូវតែមានដំណោះស្រាយ ដើម្បីសម្រួលដល់ពលរដ្ឋ រាប់ម៉ឺននាក់ដែលពេលនេះកំពុងតែត្រូវបានរដ្ឋាភិបាលថៃចាប់បញ្ជូនមកកម្ពុជាវិញ ដោយរដ្ឋាភិបាលរបស់លោក ហ៊ុន សែន មិនត្រូវមើល​ឃើញ ពលរដ្ឋខ្មែររបស់ខ្លួនក្នុងផ្លូវល្អ​និងសំខាន់បំផុត តែពេលត្រូវការសន្លឹកឆ្នោតពីពួកគាត់នោះឡើយ ៕