.jpg)
ទីស្ដីការគណៈកម្មាធិការជាតិរៀបចំការបោះឆ្នោត (គ.ជ.ប)
មេដឹកនាំគណបក្សសង្គ្រោះជាតិ ព្រមានថា បើសិនជាគណបក្សប្រជាជនកម្ពុជា មិនធ្វើកំណែទម្រង់គណៈកម្មាធិការជាតិរៀបចំការបោះឆ្នោត (គ.ជ.ប) ឲ្យបានពិតប្រាកដទេ ការបោះឆ្នោតនៅឆ្នាំ២០១៨ ខាងមុខ នឹងទទួលរងសម្ពាធពីសហគមន៍អន្តរជាតិ។
ការលើកឡើងនេះ នៅបន្ទាប់ពីលោកនាយករដ្ឋមន្ត្រី ហ៊ុន សែន ថ្លែងថា ការបោះឆ្នោតនីតិកាលទី៦ ឆ្នាំ២០១៨ ខាងមុខ បើគណបក្សសង្គ្រោះជាតិ មិនចូលរួមទេ គឺគណបក្សប្រជាជនកម្ពុជា ក៏មានគូប្រកួតប្រជែងផ្សេងទៀតដែរ។
មន្ត្រីជាន់ខ្ពស់គណបក្សសង្គ្រោះជាតិ ថ្លែងថា គណបក្សប្រជាជនកម្ពុជា គ្មានចេតនាធ្វើកំណែទម្រង់គណៈកម្មាធិការជាតិរៀបចំការបោះឆ្នោតទេ ដោយសារគណបក្សនេះខ្លាចការបោះឆ្នោតត្រឹមត្រូវ ដែលនឹងធ្វើឲ្យបាត់បង់សំឡេងអ្នកគាំទ្ររបស់ខ្លួន។
ប្រធានស្ដីទីគណបក្សសង្គ្រោះជាតិ លោក កឹម សុខា ឲ្យដឹងនៅថ្ងៃទី២ កក្កដា ថា គណបក្សសង្គ្រោះជាតិ នឹងពិចារណាថា តើគួរចូលរួមបោះឆ្នោតឆ្នាំ២០១៨ ខាងមុខ ឬមិនចូល? លោក កឹម សុខា សង្កត់ធ្ងន់ថា បើសិនជាគណបក្សប្រជាជនកម្ពុជា មិនធ្វើកំណែទម្រង់ គ.ជ.ប ទេ ការបោះឆ្នោតនៅពេលខាងមុខនៅតែមិនទទួលបានយុត្តិធម៌ និងត្រឹមត្រូវ ហើយគណបក្សប្រជាជនកម្ពុជា នឹងទទួលសម្ពាធពីសហគមន៍អន្តរជាតិ៖ «បោះឆ្នោតអត់ត្រឹមត្រូវ សហគមន៍ជាតិ និងអន្តរជាតិ នឹងមិនទទួលយកបានទេ ម្ដងនេះ ដូច្នេះហើយយើងនឹងពិចារណា ថាតើយើងចូលរួម ឬមិនចូលរួម? ហើយមិនមែនគាត់ថា ហេចេះបង្កើតបក្សពីរបីទៀតបានទេ គេដឹងហើយថា ប្រជារាស្ត្រគាំទ្របក្សណា? គឺមានតែសង្គ្រោះជាតិ និងប្រជាជនទេ ដូច្នេះអត់មានន័យទេ ទោះបីមានបក្សផ្សេងក៏ដោយ»។
ការថ្លែងដូច្នេះ នៅបន្ទាប់ពីលោកនាយករដ្ឋមន្ត្រី ហ៊ុន សែន ថ្លែងនៅក្នុងពិធីលែងកូនត្រី ទិវាមច្ឆជាតិ ១ កក្កដា នៅខេត្តកំពង់ឆ្នាំង ដោយអះអាងថា លោកមិនខ្វល់ពីគណបក្សសង្គ្រោះជាតិ ចូលរួម ឬមិនចូលរួមបោះឆ្នោតជ្រើសតាំងតំណាងរាស្ត្រនៅឆ្នាំ២០១៨ ខាងមុខនោះទេ ពីព្រោះនៅមានគណបក្សជាច្រើនទៀតនឹងចូលរួមប្រកួតប្រជែងក្នុងការបោះឆ្នោតនេះ៖ «ហើយគណៈកម្មាធិការជាតិរៀបចំការបោះឆ្នោត រាល់ថ្ងៃហ្នឹង ចុះបើអត់បានកែផង? តើអាថ្មីមិនមានច្បាប់ថ្មីមិនមកច្បាប់ច្បាស់នៅតែមានជាធរមាន លោកឯងចង់ឲ្យអាថ្មីមក តែលោកឯងមិនព្រមចូល? នៅកិកកុក ហើយអាងអីអាងសង្កត់គេ ហេធ្វើដូចជាមេម៉ាហ្វយ៉ា ម៉េចហ្នឹង? ហេងទាល់តែតាមអញទើបអញឲ្យថ្នាំញៀន»។
ការថ្លែងសារនយោបាយព្រមានគ្នាដូច្នេះរបស់មេដឹកនាំជាន់ខ្ពស់គណបក្សជាប់ឆ្នោតទាំងពីរ នៅខណៈដែលការចរចាស្ថិតនៅទ្រឹងនៅឡើយ ដែលតំណាងគណបក្សទាំងពីរបានខ្វែងគំនិតគ្នាលើការកែទម្រង់ គ.ជ.ប ដោយខាងគណបក្សសង្គ្រោះជាតិ ទាមទារឲ្យមានការជ្រើសរើសសមាជិក គ.ជ.ប ដោយសំឡេងអនុម័តក្នុងសភា២ភាគ៣។ ដោយឡែកខាងគណបក្សប្រជាជនកម្ពុជា វិញចង់បានការបោះឆ្នោតជ្រើសរើសសមាជិក គ.ជ.ប នោះ ដោយសំឡេង៥០ភាគរយបូក១ ឬសំឡេងភាគច្រើនដាច់ខាតនៃសមាជិកសភាទាំងមូល។
អ្នកឃ្លាំមើលផ្នែកអភិវឌ្ឍន៍សង្គម លោក កែម ឡី មានប្រសាសន៍ថា ប្រសិនការបោះឆ្នោតជ្រើសតាំងតំណាងរាស្ត្រឆ្នាំ២០១៨ ខាងមុខ ពុំបានកែទម្រង់ គ.ជ.ប ទេនោះ ការបោះឆ្នោតនេះ លោកអះអាងថា គ្រាន់តែជាការបោះឆ្នោតបន្លំភ្នែកសហគមន៍អន្តរជាតិទេ ដោយហេតុថា ការបោះឆ្នោតនេះពុំបានឆ្លុះបញ្ចាំងពីសង្គមប្រជាធិបតេយ្យនោះឡើយ៖ «ហើយអ្វីដែលគាត់ថា ការសម្រេច២ភាគ៣បំផ្លាញប្រជាធិបតេយ្យហ្នឹង ខ្ញុំគិតថា ត្រឹមត្រូវហើយ បំផ្លាញប្រជាធិបតេយ្យ ក្លែងក្លាយឲ្យទៅជាប្រជាធិបតេយ្យពិតប្រាកដ កន្លែងយើងនេះយើងក៏ដឹងដែរថា គណបក្សដែលចូលរួមការបោះឆ្នោតហ្នឹងគ្រាន់តែជាការនិពន្ធ ជួនកាលគាត់ឲ្យអ្នកនេះ អ្នកនោះបង្កើតគណបក្សទៅ នឹងទៅចូលរួម កន្លងមកគឺមានអ៊ីចឹង?»។
ការជាប់គាំងនយោបាយក្រោយពីបោះឆ្នោតជ្រើសតាំងតំណាងរាស្ត្រថ្ងៃទី២៨ ខែកក្កដា ឆ្នាំ២០១៣ មកទល់ពេលនេះ មានរយៈពេលជាង ១១ខែហើយ ដែលតំណាងគណបក្សទាំងពីរបានជួបចរចាគ្នាជាច្រើនលើក មិនទាន់ត្រូវរ៉ូវគ្នានៅឡើយ ដោយនៅទ្រឹងនៅត្រង់ការបោះឆ្នោតជ្រើសរើសសមាជិក គ.ជ.ប នេះ។ មកទល់ពេលនេះ តំណាងគណបក្សទាំងពីរមិនទាន់កំណត់ពេលជួបគ្នាជាថ្មីនៅឡើយ៕
No comments:
Post a Comment
yes