លោក ហ៊ុន សែន ៖ "គ្មានអន្តរាគមន៍សម្រាប់ជនជាតិថៃ
២នាក់ជាប់ទោសនោះទេ"
តុលាការកម្ពុជាបានកាត់ទោសជនជាតិថៃ២នាក់ពីបទឆ្លងដែនខុសច្បាប់ និងបទចារកម្ម។ នៅថ្ងៃនេះលោកនាយករដ្ឋមន្ត្រី ហ៊ុន សែនបានប្រកាសហើយថា លោកនឹងមិនធ្វើអន្តរាគមក្នុងសំណុំរឿងនេះទេ មុនជនជាប់ចោទទាំងពីរនាក់ជាប់ទោស២ភាគ៣សិន។ រហូតដល់ពេល
នេះ ជនជាតិថៃទាំងពីរនាក់នោះនៅមិនទាន់ប្តឹងឧទ្ធរណ៍នៅឡើយទេ។
ដោយ លាង ដឺលុច
បើស្តាប់ប្រសាសន៍លោកនាយករដ្ឋមន្ត្រីខ្មែរ ហ៊ុន សែន នៅថ្ងៃនេះ ក្តីសង្ឃឹមសម្រាប់ជនជាតិថៃពីរនាក់ដែលកំពុងជាប់ឃុំនៅក្នុងមន្ទីរ ឃុំឃាំងព្រៃសនោះ ថានឹងអាចមានការសម្របសម្រួលផ្នែកការទូត ឬនយោបាយ ដើម្បីពួកគេអាចមានសេរីភាពក្នុងពេលឆាប់ៗនោះ ទំនងជាមិនមាននោះឡើយ។ នៅក្នុងសន្និសីទកាសែតដ៏កម្រមួយដែលធ្វើដោយលោកនាយករដ្ឋមន្ត្រី ផ្ទាល់ នៅព្រឹកថ្ងៃព្រហស្បតិ៍១៧កុម្ភៈនេះ ប្រមុខរដ្ឋាភិបាលកម្ពុជាបានរម្លឹកអំពីករណីជនជាតិថៃ២នាក់ដែលបាន ជាប់ក្នុងពន្ធនាគារព្រៃស ដោយអំណាចសាលក្រមសាលាដំបូងរាជធានីភ្នំពេញម្នាក់៨ឆ្នាំ និងម្នាក់ទៀត៦ឆ្នាំនោះ ថាលោកនឹងមិនទទួលយកការបញ្ចុះបញ្ចូលសុំព្រះរាជលើកលែងទោសសម្រាប់ ជនជាតិថៃទាំងពីរនាក់នេះទេ។ លោក ហ៊ុន សែន បានបញ្ជាក់ថា ម្តងនេះត្រូវអនុវត្តច្បាប់ត្រឹមត្រូវ។ ការពិចារណាអំពីការលើកលែងទោសណាមួយអាចធ្វើទៅបាននោះ សម្រាប់លោកនាយករដ្ឋមន្ត្រី ជនជាតិថៃទាំងពីរនាក់ត្រូវអនុវត្តទោស២ភាគបីសិនតាមច្បាប់សិន។ កាលពីថ្ងៃទី១កុម្ភៈ សាលាដំបូងរាជធានីភ្នំពេញបានកាត់ទោសឈ្មោះ វេរ៉ា ស៊ុមខ្វាមឃីត ជាអគ្គលេខាធិការនៃបណ្តាញប្រជាជនប្រឆាំងអំពើពុករលួយ ដែលជាសកម្មជនក្រុមថៃអាវលឿងម្នាក់ដែរនោះ អោយជាប់ពន្ធនាគារចំនួន៨ឆ្នាំ និងពិន័យជាប្រាក់១លាន៨សែនរៀល និងស្ត្រីជនជាតិថៃម្នាក់ទៀតជាអ្នកកាសែតឈ្មោះ រ៉ាត់ទ្រី ប៉ៃម៉ូតាណា ប៉ៃប៊ូន អោយជាប់ពន្ធនាគារ៦ឆ្នាំ និងពិន័យប្រាក់១លាន២សែនរៀល។ អ្នកទាំងពីរត្រូវបានកាត់ទោសពីបទឆ្លងដែនខុសច្បាប់ចូលទឹកដី កម្ពុជាកាលពីថ្ងៃទី២៩ធ្នូ ចូលក្នុងទីលានយោធាក្នុងបំណងទុច្ចរិត និងបទធ្វើចារកម្ម។ យោងតាមការអះអាងរបស់លោក ប៉ិច វិច្ឆិកា ដែលជាមេធាវីរបស់ជនជាតិថៃទាំងពីរនេះ រហូតដល់ពេលនេះ កូនក្តីរបស់លោកនៅមិនទាន់សម្រេចដាក់បណ្តឹងឧទ្ធរណ៍ជំទាស់សាលក្រម សាលាដំបូងរាជធានីភ្នំពេញនៅឡើយទេ៕ ប្រភពពីវិទ្យុ បារាំង អន្តរជាតិ RFI អន្តរជាតិ
No comments:
Post a Comment
yes