ឈើអារប្រភេទគគី និងកូនខ្លុងត្បែងមិនគ្រប់អាយុ ដែលគេកាប់អាច្រៀក ដោយរណាយន្ដ កំពុងត្រូវបានដឹកយកមកលក់យ៉ាងគគ្រឹកគគ្រេង គ្មានការទប់ស្កាត់។ ឈើទាំងនោះ ត្រូវបានគេដឹកចេញពីជួរភ្នំប៉ែកខាងលើ ក្នុងភូមិសាស្ដ្រស្រុកទឹកផុស ស្រុកបរិបូរណ៍ ខេត្ដកំពង់ឆ្នាំង និងមួយចំនួនទៀត ត្រូវគេដឹកចេញភូមិសាស្ដ្រខេត្ដពោធិ៍សាត់ ដែលមានព្រំប្រទល់ ស្ថិតនៅជាប់គ្នានោះ។
ចំពោះសកម្មភាពដឹកជញ្ជូនឈើតាមផ្លូវដែកដោយឡូរី ក៏កំពុងមានសកម្មភាពយ៉ាងគគ្រឹកគគ្រេងដែរ។ ពួកគេដឹកចេញពីឃុំឈើតុំ ស្រុកក្រគរ ខេត្ដពោធិ៍សាត់ និងចេញពីភូមិពេជ្រជោ ភូមិក្ដុល ឃុំក្រាំងស្គារ ស្រុកទឹកផុស ខេត្ដកំពង់ឆ្នាំង ឆ្ពោះទៅកាន់ឃុំត្បែងខ្ពស់ ស្រុកសាមគ្គីមានជ័យ។
ពួកឈ្មួញឈើ ដែលរកស៊ីគ្មានការចាប់ចង និងមិនបានរំខានដល់មន្ដ្រីជំនាញរដ្ឋបាលព្រៃឈើ និងសមត្ថកិច្ចគ្រប់ប្រភេទនោះ ដោយសារតែពួកគេបង់លុយអោយក្រុមមន្ដ្រីទាំងនោះ អស់ហើយ។
ដោយឡែកនៅក្នុងឃុំត្រញំងចាន់ ស្រុកបរិបូរណ៍ គេឃើញមានម៉ាស៊ីនអាឈើជាច្រើនគ្រឿង កំពុងធ្វើសកម្មភាពយ៉ាងគគ្រឹកគគ្រេង ទាំងកណ្ដាលថ្ងៃ ដោយមិនមានក្រែងរអា ចំពោះមន្ដ្រីជំនាញ និងសមត្ថកិច្ចនៅទីនោះឡើយ ដោយសារតែពួកម្ចាស់ម៉ាស៊ីនអារឈើទាំងនោះ បានបង់លុយ និងត្រូវដង ត្រូវផ្លែគ្នា ជាមួយនិងមន្ដ្រីរដ្ឋបាលព្រៃឈើ និងសមត្ថកិច្ចនៅទីនោះ អស់ហើយដែរ។
ប្រភពបានអោយដឹងថា ពួករកស៊ីកាប់ឈើ ដឹកឈើ និងអារឈើទាំងនោះ គឺពួកគេរកស៊ីស្មោះត្រង់ជាមួយសមត្ថកិច្ច និងមន្ដ្រីរដ្ឋបាលព្រៃឈើណាស់ អត់មានអ្នកណាហ៊ានកុហក់ បោកប្រាស់ឡើយ។ មួយដឹងមួយ ពីរដឹងពីរ។ បើហ៊ានតែលួចអារ ឬដឹកចេញ មិនប្រាប់មុន ថ្ងៃក្រោយច្បាស់ជារកស៊ីលែង បានទៀតហើយ។
ករណីខាងលើនេះ សូមអាជ្ញាធរខេត្ដ និងមន្ដ្រីថ្នាក់ក្រសួងកសិកម្មមេត្ដាជួយទប់ស្កាត់ផង បើសិនមិនមានវិធានការទាន់ពេលវេលាទេ ព្រៃឈើពិតជារលាយអស់ហើយ ពីព្រោះសព្វថ្ងៃនេះ ពួកមន្ដ្រីទាំងនោះទៅទាំងប៉ី ទៅទាំងទ្រហើយ៕ - See more at: http://www.cen.com.kh/localnews/show_detail/22?token=ZjIxYjEwOT#sthash.aYf8xiUM.dpuf
No comments:
Post a Comment
yes