មន្ត្រីបក្សហ៊្វុនស៊ិនប៉ិចឯកភាពគ្នាលើកពេលធ្វើសមាជ
ដោយ ទីន ហ្សាការីយ៉ា
មន្ត្រីជាន់ខ្ពស់នៃគណបក្សហ៊្វុនស៊ិនប៉ិច បានថ្លែងឲ្យដឹងនៅថ្ងៃទី២៦ ខែកុម្ភៈថា គណៈ កម្មាធិការអចិន្ត្រៃយ៍នៃគណបក្សហ៊្វុនស៊ិនប៉ិច បានប្រជុំសម្រុះសម្រួលគ្នាពន្យារពេលធ្វើសមាជនៃគណបក្ស ហ៊្វុនស៊ិនប៉ិច ដោយលើកពីថ្ងៃទី២១ មីនា ទៅធ្វើនៅថ្ងៃទី២ ខែមេសា ឆ្នាំ២០១១ វិញហើយ បន្ទាប់ពីមេដឹកនាំគណបក្សនេះ បានខ្វែងគំនិតគ្នាអំពីកាលបរិច្ឆេទនៃថ្ងៃធ្វើសមាជនេះ។
RFA File Photoប្រធានគណបក្សហ៊្វុនស៊ិនប៉ិច លោក កែវ ពុទ្ធរស្មី ។
លោក លឺ ឡាយស្រេង អនុប្រធានទី១នៃគណបក្សហ៊្វុនស៊ិនប៉ិច បានមានប្រសាសន៍ថា គណៈ កម្មាធិការអចិន្ត្រៃយ៍ នៅព្រឹកថ្ងៃទី២៦ ខែកុម្ភៈនេះ បានកោះប្រជុំថ្នាក់ដឹកនាំកំពូលរបស់គណបក្ស ហើយបានឯកភាពគ្នា និងស្រុះស្រួលគ្នាវិញ បន្ទាប់ពីពួកគេបានប្រឈមមុខតឹងតែងដាក់គ្នាកន្លងមករវាងភាគីខាង ប្រធាន អនុប្រធានគណបក្ស និងភាគីខាងលោក ញឹក ប៊ុនឆៃ ជាអគ្គលេខាធិការបក្សនោះ។
លោក លឺ ឡាយស្រេង មានប្រសាសន៍បន្ថែមថា ៖ «ព្រោះស៊ីញេលើកមុនក៏ថា សុំលើកពេលសមាជពីថ្ងៃទី២១ ទៅថ្ងៃក្រោយដែរ ដូច្នេះវាសមស្របហើយ ប្រជុំគ្នាទៅវាស្រុះស្រួលគ្នា អត់មានអី ដូចថា បក្សប្រហារអត់មានស្អីទៀតទេ ទាំងអស់គ្នាបានមូលមតិគ្នាធ្វើអ៊ីចឹង»។
នៅក្នុងរយៈពេលចុងក្រោយនេះ គណបក្សហ៊្វុនស៊ិនប៉ិច ដែលជាគណបក្សដៃគូរបស់គណបក្សប្រជាជនកម្ពុជា ក្នុងការដឹកនាំរដ្ឋាភិបាល បានបែកបាក់ផ្ទៃក្នុងរបស់ខ្លួន ដោយមន្ត្រីជាន់ខ្ពស់នៃគណបក្សហ៊្វុនស៊ិនប៉ិច បានចោទប្រកាន់លោក ញឹក ប៊ុនឆៃ ថា លោកមានគម្រោងធ្វើសមាជនៅថ្ងៃទី២១ ខែមីនា ឆ្នាំ២០១១នោះ គឺជាសមាជធ្វើបក្សប្រហារចង់ទម្លាក់លោក កែវ ពុទ្ធរស្មី ពីប្រធានគណបក្ស។
ស្របគ្នានោះ មន្ត្រីជាន់ខ្ពស់គណបក្សហ៊្វុនស៊ិនប៉ិច ក៏បានបញ្ចេញឯកសារខ្ចីប្រាក់របស់លោក ញឹក ប៊ុនឆៃ អគ្គលេខាធិការគណបក្ស និងបានចោទប្រកាន់លោក ញឹក ប៊ុនឆៃ ថា បានខ្ចីប្រាក់ពីក្រុមហ៊ុនចិនមួយ ដោយមិនឲ្យគណៈដឹកនាំគណបក្សដឹង ប៉ុន្តែត្រូវបានលោក ញឹក ប៊ុនឆៃ បានបដិសេធចំពោះការចោទប្រកាន់នេះថា ជារឿងបរិហារកេរ្តិ៍រួបលោក ហើយលោក ញឹក ប៊ុនឆៃ គ្រោងនឹងប្តឹងមន្រ្តីជាន់ខ្ពស់គណបក្សរបស់ខ្លួនចំនួនបីរូបផង ដែរ។
ទោះជាយ៉ាងនេះក្តី ភាពចម្រូងចម្រាសផ្ទៃក្នុងនៃគណបក្សហ៊្វុនស៊ិនប៉ិច ដែលអ្នកវិភាគនយោបាយមើលឃើញថា គណបក្សនេះកំពុងតែឈានទៅរកការបែកបាក់គ្នាជាពីរក្រុមនោះ ត្រូវបានគេដោះស្រាយបញ្ចប់ជម្លោះ ហើយងាកមកសហការគ្នាឡើងវិញ។
លោក ញឹក ប៊ុនឆៃ បានបញ្ជាក់ថា ករណីដែលកើតឡើងកន្លងមក គឺជាការយល់ច្រឡំគ្នាទេ ហើយលោកបានបំភ្លឺថា លោកមិនមានគម្រោងប្ដឹងសមាជិកគណបក្សរបស់លោកទៀតទេ។ នៅក្នុងកាលៈទេសៈនេះ លោក ញឹក ប៊ុនឆៃ មិនបានបញ្ជាក់ទេថា តើលោកនឹងត្រូវឈរឈ្មោះជាបេក្ខភាពប្រធានគណបក្សទៀត ឬយ៉ាងណា នៅក្នុងពេលធ្វើសមាជនៅថ្ងៃទី២ ខែមេសា ឆ្នាំ២០១១ ខាងមុខនោះ។
លោកបញ្ជាក់ដូច្នេះ ៖ «រចនាសម្ព័ន្ធដែលត្រូវកែសម្រួល ដែលមាននីតិប្បញ្ញត្តិ នីតិប្រតិបត្តិអីអ៊ីចឹងទៅ ដល់អ៊ីចឹងហើយ យើងមិនទាន់កំណត់ថា អ្នកណាឈរ (ឈ្មោះ) ខាងណា អ្នកណាឈរខាងណា ប៉ុន្តែជាគោលការណ៍ យើងបានសម្របសម្រួលគ្នាឲ្យវាសមស្រប»។
គណបក្សហ៊្វុនស៊ិនប៉ិច ធ្លាប់បានបែកបាក់ផ្ទៃក្នុងបែងចែកគ្នាជាពីរក្រុមម្ដងរួចមកហើយ កាលពីឆ្នាំ២០០៦ ដែលគេបានធ្វើមហាសន្និបាតដកព្រះអង្គម្ចាស់ នរោត្តម រណឫទ្ធិ ចេញពីព្រះប្រធានគណបក្ស ក្រោមការដឹកនាំរបស់លោកអគ្គលេខាធិការបក្ស ញឹក ប៊ុនឆៃ ហើយសម្ដេចក្រុមព្រះក៏បានបង្កើតគណបក្សថ្មីមួយទៀត ដែលបច្ចុប្បន្នឈ្មោះថា គណបក្ស នរោត្តម រណឫទ្ធិ។
ទោះជាយ៉ាងណាក៏ដោយ អ្នកវិភាគឯករាជ្យ លោកស្រី ជា វណ្ណាត បានលើកឡើងថា ការបែក
បាក់ផ្ទៃក្នុងរបស់គណបក្សហ៊្វុនស៊ិនប៉ិចនេះ គឺបណ្ដាលមកពីការមិនទុកចិត្តគ្នារវាងមេដឹកនាំកំពូលនៃគណបក្ស ហ៊្វុនស៊ិនប៉ិច ដែលធ្វើឲ្យគណបក្សនេះមានភាពច្របូកច្របល់នោះ៕ ពីវិទ្យុ អាស៊ីសេរី
No comments:
Post a Comment
yes