លោកជាម យៀប (ជួរក្រោយស្តាំ) នៅក្នុងកិច្ចប្រជុំសភា កាលពីថ្ងៃទី២៤
ខែកញ្ញា។ រូបថត ស្រេង ម៉េងស្រ៊ុន
អាជ្ញាធរកម្ពុជាមិនគួរ អនុញ្ញាតឲ្យតំណាងរាស្រ្តគណបក្សកាន់អំណាចលោក ជាម យៀប គេចពី«ការស៊ើបអង្កេតពេញលេញ និងការកាត់ទោសដែលអាចមាន»ពាក់ព័ន្ធនឹងករណីគ្រោះថ្នាក់ចរាចរណ៍បុករួចរត់កាលពីថ្ងៃទី ២២ វិច្ឆិកា ដែលបានបណ្តាលឲ្យជនរងគ្រោះស្លាប់ នោះទេ។ នេះបើតាមអង្គការឃ្លាំមើលសិទ្ធិមនុស្ស HRW ដែលមានមូលដ្ឋាននៅទីក្រុងញូវយ៉ក ដែលបានថ្លែងកាលពីថ្ងៃអង្គារ។
នៅក្នុងសេចក្តីថ្លែងការណ៍ មួយ អង្គការឃ្លាំមើលសិទ្ធិមនុស្សអន្តរជាតិ បានថ្លែងថា បើទោះបីជាអ្នកបើកឡានរបស់លោក ជាម យៀប ជាអ្នកបើកឡានក៏ដោយ ក៏តំណាងរាស្រ្តរូបនេះ ស្ថិតនៅក្រោមកាតព្វកិច្ចផ្លូវច្បាប់ត្រូវបញ្ឈប់រថយន្តរបស់គាត់ នៅកន្លែងកើតហេតុ ហើយជម្រាបទៅអាជ្ញាធរមូលដ្ឋាន និងជួយយកជនរងគ្រោះទៅមន្ទីរពេទ្យ។
លោក Brad Adams នាយកអង្គការឃ្លាំមើលសិទ្ធិមនុស្សអន្តរជាតិ ប្រចាំអាស៊ី បានថ្លែងថា៖ «អាជ្ញាធរគួរអនុវត្តច្បាប់ ជាជាងការពារមន្រ្តីនយោបាយជាន់ខ្ពស់»។
អ្នកនាំពាក្យ គណបក្សប្រជាជនរូបនេះ បានធ្វើដំណើរក្នុងស្រុកកៀនស្វាយ ខេត្តកណ្តាល នៅពេលរថយន្តរបស់គាត់ បានបុកជាមួយម៉ូតូមួយដែលជិះដោយពីរនាក់ប្តីប្រពន្ធ ដែលប្រពន្ធឈ្មោះ ពិន សុភា និងប្តីឈ្មោះ ផឿន ថា ហើយបានបើករត់។ អ្នកស្រី ពិន សុភា ក្រោយមកបានស្លាប់នៅមន្ទីរពេទ្យ រីឯលោក ផឿន ថា បានរងរបួសធ្ងន់។
លោក ជាម យៀប មិនអាចទាក់ទងសុំអត្ថាធិប្បាយបានទេ កាលពីម្សិលមិញ ប៉ុន្តែបានថ្លែងកាលពីពេលមុនថា គ្រោះថ្នាក់ចរាចរណ៍នោះ មិនមែនជាការបុកហើយរត់ទេ ហើយលោកថា មេធាវីរបស់លោកបានទៅនិយាយជាមួយនគរបាលភ្លាមៗ បន្ទាប់ពីគ្រោះថ្នាក់នោះ។ លោកបានប្រាប់ភ្នំពេញប៉ុស្តិ៍ថា លោកបានរត់គេចពីកន្លែងកើតហេតុ ដោយសារភ័យខ្លាចការកើតមានអំពើហិង្សា ពីសំណាក់ហ្វូងមនុស្ស។
អង្គការឃ្លាំមើលសិទ្ធិមនុស្សបានថ្លែងថា៖ «តាមច្បាប់ចរាចរណ៍កម្ពុជា លោក ជាម យៀប អាចនឹងជាប់ពន្ធនាគាររហូតដល់ទៅ ៣ ឆ្នាំ»។
លោក ការ សាវុត្ថ មេធាវីរបស់លោក ជាម យៀប បានថ្លែងកាលពីថ្ងៃអង្គារថា ករណីនេះ បាន«បញ្ចប់»យូរហើយ ពីព្រោះជនរងគ្រោះបានទទួលយកសំណងពីលោក ជាម យៀប និងបានដកបណ្តឹងពីនគរបាល។ លោកថ្លែងថា៖ «វាមិនមានបណ្តឹងព្រហ្មទណ្ឌអ្វីទេ ទៅលើលោក ជាម យៀប ពីព្រោះលោកមិនមែនជាអ្នកបើករថយន្តនោះ»។
ប៉ុន្តែលោក វេន សូវីន ស្នងការរងនគរបាលខេត្តកណ្តាល បានថ្លែងថា ករណីនេះត្រូវបានបញ្ជូនទៅព្រះរាជអាជ្ញាខេត្តកាលពីចុងសប្តាហ៍មុន។ លោកបន្តថា៖ «ដោយសារមានការចាប់អារម្មណ៍ពីប្រព័ន្ធផ្សព្វផ្សាយ និងសាធារណជន នគរបាលខេត្តកណ្តាល បានប្រញាប់ប្រញាល់ដាក់រឿងនេះទៅកាន់ព្រះរាជអាជ្ញា»។
ព្រះ រាជអាជ្ញារង សាលាដំបូងខេត្តកណ្តាល លោក សំ រិទ្ធីវាសនា ដែលនឹងសម្រេចថា តើករណីនេះមានភ័ស្តុតាងគ្រប់គ្រាន់ដើម្បីបញ្ជូនទៅចៅក្រមស៊ើប អង្កេតឬអត់នោះ បានថ្លែងកាលពីថ្ងៃអង្គារថា លោកនៅកំពុងអាន និងសិក្សាអំពីករណីនេះនៅឡើយ ដោយមិនទាន់ធ្វើការសម្រេចបែបណាទេ៕
No comments:
Post a Comment
yes