ក្រុមអ្នកកាសែតចំនួន៣នាក់ដែលមានអ្នកស្គាល់តិចតួចបំផុត ក្នុងខេត្តបាត់ដំបង បានត្រូវកម្លាំងប៉េអឹមស្រុកសង្កែ ចាប់ឃាត់ខ្លួនកាលពីវេលាម៉ោង៧និង២០នាទីយប់ ថ្ងៃទី២៨ កញ្ញា ក្រោមបទចោទប្រកាន់ថា បានទូរស័ព្ទជំរិតទារប្រាក់ពីមន្ត្រីយោធាម្នាក់ចំនួន២០ដុល្លារ ដោយចោទមន្ត្រីយោធានោះថា រកស៊ីល្មើសច្បាប់ ។
លោកអិុន តាំ មេបញ្ជាការរងមូលដ្ឋានកងរាជអាវុធហត្ថស្រុកសង្កែ បានប្រាប់កោះសន្តិភាពថា ក្រុមអ្នកកាសែតទាំង៣នាក់ ដែលត្រូវចាប់ខ្លួននោះរួមមាន១-ឈ្មោះសឹុម សារឿន ភេទប្រុស អាយុ៥១ឆ្នាំ ជាសមាជិកសម្ព័ន្ធអ្នកសារព័ត៌មានសាខាខេត្តបាត់ដំបង និងជាអ្នកយកព័ត៌មានឱ្យកាសែត «សំដីរាស្ត្រ» ២-ឈ្មោះទា រើន ភេទប្រុស អាយុ៤៨ឆ្នាំ ជាជនពិការជើងឆ្វេងកាន់កាតកាសែត «សំដីរាស្ត្រ» ផុតកំណត់ និង៣-ឈ្មោះជុំ សុភារុន ភេទប្រុស អាយុ៤២ឆ្នាំ កាន់កាតកាសែត «កម្ពុជាថ្ងៃថ្មី» ។ លោកអិុន តាំ បានបញ្ជាក់ថា ក្រុមអ្នកកាសែតទាំង៣នាក់នេះ ត្រូវបានមន្ត្រីយោធាមួយរូបឈ្មោះទៀង ប៊ុនទិត្យ អាយុ៣៨ឆ្នាំ នៅការិយាល័យទី២ នៃមេបញ្ជាការដ្ឋានជើងគោកប្រចាំការយោធភូមិភាគទី៥ ប្តឹងចោទពីបទទូរស័ព្ទជំរិតទារប្រាក់២០ដុល្លារ ។
លោកទៀង ប៊ុនទិត្យ បានប្រាប់ពីដំណើររឿងនេះតាមទូរស័ព្ទថា ក្រុមអ្នកកាសែតទាំង៣នាក់ នេះដឹកនាំដោយឈ្មោះស៊ឹម សារឿន បានទូរស័ព្ទទៅសុំប្រាក់ពីលោកចំនួន២០ដុល្លារ ហើយលោកប្រាប់ថា គ្មានប្រាក់ទេ តែអ្នកកាសែតរូបនោះបែរជាចោទប្រកាន់រូបលោកថា ជាអ្នករកស៊ីបទល្មើស ហើយមិនព្រមប្រាប់ពីបទល្មើសនោះទេ ទើបលោកក្តៅក្រហាយប្តឹងសមត្ថកិច្ចតែម្តងទៅ ។
ចំណែកលោកស៊ីម សារឿន ដែលត្រូវចោទបាននិយាយថា លោកពិតជាបានទូរស័ព្ទទៅសុំលុយពីមន្ត្រីយោធានោះមែន គឺ សុំតែ៥ដុល្លារប៉ុណ្ណោះ មិនបានសុំ២០ដុល្លារទេ ហើយនិយាយថា ការសុំលុយនេះដោយសារតែរូបលោកស្គាល់គ្នាជាមួយមន្ត្រីយោធារូបនេះ តែបានបដិសេធថា ពួកគេមិនបានចោទមន្ត្រីយោធារូបនេះពីរឿងរកស៊ីបទល្មើសទេ។ លោកសារឿន បាននិយាយថា ក្រោយពីចរចាសុំលុយ៥ដុល្លារមិនបាន បន្តិចក្រោយមកមន្ត្រីយោធានោះបានទូរស័ព្ទឱ្យពួកខ្លួនមកយកលុយ៥០ដុល្លារដោយណាត់ជួបគ្នាទទួលប្រាក់នៅខាងមុខវត្តអន្លង់វិល ឃុំអន្លង់វិល ស្រុកសង្កែ តែពេលមកជួបស្រាប់តែមន្ត្រីយោធានោះប្រាប់ថា ទៅយកនៅហាងកាហ្វេ លុះជិះចេញមកស្រាប់តែនាំពួកគេចូលទីបញ្ជាការប៉េអឹមស្រុកសង្កែ ហើយត្រូវប៉េអឹមឃាត់ខ្លួនតែម្តងទៅ ។
ទោះបីជាបែបណា មន្ត្រីយោធាឈ្មោះទៀង ប៊ុនទិត្យ និយាយថា លោកប្តឹងចោទប្រកាន់នេះដោយសារតែក្តៅក្រហាយនឹងអ្នកកាសែតនោះទូរស័ព្ទសុំលុយលោកមិនបានហើយបែរជាចោទថា រូបលោករកសីុតែបទល្មើស និងមិនប្រាប់ពីបទល្មើសនោះទៀត ។ លោកអិុន តាំ មេបញ្ជាការរងមូលដ្ឋានកងរាជអាវុធហត្ថស្រុកសង្កែ បញ្ជាក់ថា ដោយយោងតាមបញ្ជារបស់លោកមេបញ្ជាការកងរាជ អាវុធហត្ថខេត្ត និងលោកព្រះរាជអាជ្ញាអមសាលាដំបូងខេត្ត លោកបានកសាងសំណុំរឿងបញ្ជូនក្រុមអ្នកកាសែតទាំង៣នាក់នេះទៅកាន់សាលាដំបូងនៅព្រឹកថ្ងៃទី៣០ កញ្ញា ៕
ពីគេហទំព័រ៖ កោះសន្តិភាព
No comments:
Post a Comment
yes