អ្នកភូមិដែលជម្លៀសចេញពីទឹកជំនន់នៅខេត្តកំពង់ធំ កំពុងប្រឈមនឹងបញ្ហាសុខភាព នៅមុនពេលកាកបាទក្រហមកម្ពុជា និងអង្គការដទៃទៀត គ្រោងចុះចែកជំនួយដល់គ្រួសារជាងបីពាន់គ្រួសារនៅសប្ដាហ៍នេះ។
លោក សេង សុផល អនុប្រធានមណ្ឌលសុខភាពសំបូរ បានអះអាងនៅថ្ងៃពុធនេះថា អ្នកភូមិ ៣៦នាក់ ក្នុងចំណោមអ្នកភៀសចេញពីទឹកជំនន់ចំនួន ៩៤នាក់ នៅស្រុកប្រាសាទសំបូរ កំពុងតែមានជំងឺរាក់រួស និងផ្ដាសាយ។ កង្វះអនាម័យ គឺជាមូលហេតុនាំឲ្យមានជំងឺនេះ។
លោក សេង សុផល មានប្រសាសន៍ថា៖ «អ្នកគេចចេញពីទឹកជំនន់ទាំងនោះ បានកាប់ឆ្ការព្រៃដើម្បីរស់នៅ ជាទីដែលមានបរិស្ថានមិនល្អ ហើយមានខ្លះកំពុងខ្វះខាតម្ហូបអាហារ»។ លោកបន្ថែមថា បុគ្គលិកមណ្ឌលសុខភាពរបស់លោក បានទៅសួរសុខទុក្ខពួកគាត់ និងបានផ្ដល់ថ្នាំសង្កូវតិចតួចដល់ពួកគាត់រួចហើយ។
លោក ជា ជាតិ ដែលជាប្រធានកាកបាទក្រហមកម្ពុជាប្រចាំខេត្តកំពង់ធំ បានប្រាប់ឲ្យដឹងថា កាកបាទក្រហមកម្ពុជា នឹងចុះចែកអំណោយដល់ពលរដ្ឋចំនួន ៨០៥គ្រួសារ នៅស្រុកសណ្ដាន់ និង ១០១៣គ្រួសារនៅស្រុកប្រាសាទសំបូរ នៅថ្ងៃសុក្រ និងថ្ងៃសៅរ៍សប្តាហ៍នេះ។
លោកបានឲ្យដឹងបន្ថែមថា អង្គការការីតាស និងអង្គការទស្សនពិភពលោក ក៏នឹងចុះចែកអំណោយដល់ពលរដ្ឋ ១០០០គ្រួសារនៅស្រុកកំពង់ស្វាយ និង ៣០៥គ្រួសារនៅស្រុកប្រាសាទសំបូរ ដោយ ៩០ភាគរយនៃពលរដ្ឋទាំងនោះ បានទទួលរងគ្រោះដោយទឹកជំនន់។
No comments:
Post a Comment
yes