ដោយ ទីន ហ្សាការីយ៉ា
ការលើកឡើងជាថ្មីម្ដងទៀតនេះ គឺនៅក្រោយពេល នាយករដ្ឋមន្ត្រីថៃថ្មី អ្នកស្រី យីង ឡាក់ បានមកទស្សនកិច្ចកម្ពុជាជាផ្លូវការលើកដំបូងរបស់អ្នកស្រី ហើយក៏បានយល់ព្រមដោះស្រាយបញ្ហាជម្លោះខ្មែរ ថៃ ដោយសន្តិវិធី។
រដ្ឋាភិបាលកម្ពុជានៅថ្ងៃទី ១៨ កញ្ញា បានប្រកាសថា កម្ពុជានៅតែរក្សាជំហរដោះស្រាយបញ្ហាព្រំដែន តំបន់ក្បែរប្រាសាទព្រះវិហារដោយអនុវត្តទៅតាមសេចក្ដីសម្រេចរបស់តុលាការយុត្តិធម៌អន្តរជាតិ ហើយកម្ពុជា មិនចាប់អារម្មណ៍ទៅនឹងការលើកឡើងរបស់ភាគីថៃស្ដីពីតំបន់ ៤.៦ គីឡូម៉ែត្រក្រឡា ថាជាកម្មសិទ្ធិរបស់ថៃនោះឡើយ។
រដ្ឋាភិបាលកម្ពុជា បានលើកឡើងអំពីជំហររបស់ខ្លួនដូច្នេះ នៅបន្ទាប់ពីរដ្ឋមន្ត្រីការពារជាតិថៃជារដ្ឋមន្ត្រីទើបតែងតាំង ដោយរដ្ឋាភិបាលថ្មី ដែលភាគីកម្ពុជារំពឹងពីមុនមកថា នឹងអាចដោះស្រាយបញ្ហាព្រំដែនខ្មែរ-ថៃ បានងាយជាងរដ្ឋាភិបាលចាស់នោះ បែរជាគេបញ្ជាក់ថា តំបន់ ៤.៦ ជាកម្មសិទ្ធិរបស់ថៃដូចនឹងរដ្ឋាភិបាលចាស់ ដែលដឹកនាំដោយលោក អាភិស៊ីត ដែរ។
លោក ផៃ ស៊ីផាន ជាមន្ត្រីនាំពាក្យនៃទីស្ដីការគណៈរដ្ឋមន្ត្រីកម្ពុជា។ លោកមានប្រសាសន៍ថា លោកមិនចាប់អារម្មណ៍ទៅនឹងការលើកឡើងណាមួយរបស់មន្ត្រីជាន់ខ្ពស់ថៃ ទាក់ទងនឹងបញ្ហាព្រំដែនយ៉ាងណានោះទេ។ ប៉ុន្តែ លោកបញ្ជាក់ថា បញ្ហាសំខាន់ គឺកម្ពុជាគោរពទៅតាមការបកស្រាយរបស់តុលាការយុត្តិធម៌អន្តរជាតិ។
កាសែតបាងកកប៉ុស្តិ៍ (Bangkok Post) របស់ថៃ បានស្រង់សម្ដីរដ្ឋមន្ត្រីក្រសួងការពារជាតិថៃ លោក យុត្ថាសាក់ សាស៊ីប្រ៉ាប៉ា (Yuthasak Saisiprapa) ដែលលោកបានអះអាងថា តំបន់ ៤.៦ គីឡូម៉ែត្រក្រឡា ក្បែរតំបន់ប្រាសាទព្រះវិហារជាកម្មសិទ្ធិរបស់ថៃ គឺយោងលើការបញ្ជាក់របស់នាយករដ្ឋមន្ត្រីថៃអ្នកស្រី យីង ឡាក់ បានសរសេរដាក់នៅលើបណ្ដាញសង្គម ឬហៅថា Facebook។
ទោះបីជាយ៉ាងណាក្ដី អ្នកស្រី យីង ឡាក់ (Yingluck Shinawatra) បានបញ្ជាក់ថា កន្លងមកកម្ពុជាបានអះអាងថា តំបន់ ៤.៦ នោះជាដីរបស់ខ្លួន។ ដូច្នេះ រដ្ឋាភិបាលនៃប្រទេសទាំងពីរនឹងដោះស្រាយបញ្ហាជម្លោះនៅតំបន់នេះតាមរយៈការទូត មានន័យថា វាអាស្រ័យលើភស្តុតាងជាក់ស្ដែង ហើយស្ថិតនៅក្រោមច្បាប់អន្តរជាតិ ដោយហេតុថា រដ្ឋាភិបាលចង់រក្សាទំនាក់ល្អជាមួយប្រទេសជិតខាង។
ទាក់ទងទៅនឹងការលើកឡើង ជាថ្មីរបស់រដ្ឋមន្ត្រីការពារជាតិថៃពីបញ្ហាតំបន់ ៤.៦ គីឡូម៉ែត្រក្រឡា ដែលគេមើលឃើញថា តំបន់នេះជាចំណុចមួយ ដែលធ្វើភាគីកម្ពុជាថៃ បានបង្កជម្លោះកាន់តែធំរហូតដល់ផ្ទុះអាវុធដាក់គ្នានាពេលកន្លងមកនោះក្ដី។ ប៉ុន្តែ កាលពីថ្ងៃទី ១៥ កញ្ញា នាយករដ្ឋមន្ត្រីថៃ អ្នកស្រី យីង ឡាក់ ស៊ីណាវ៉ាត្រ និងនាយករដ្ឋមន្ត្រីកម្ពុជាលោក ហ៊ុន សែន បានឯកភាពគ្នាតាមដីកាបង្គាប់របស់តុលាការយុត្តិធម៌អន្តរជាតិ ថ្ងៃទី ១៨ ខែកក្កដា ឆ្នាំ ២០១១ និងដោះស្រាយបញ្ហាសំខាន់ៗ មួយចំនួនទៀត។
ការមកបំពេញទស្សនកិច្ចនៅកម្ពុជាលើកទី១ របស់អ្នកស្រី យីង ឡាក់ ក្រោយពេលអ្នកស្រីបានជាប់ជានាយករដ្ឋមន្ត្រីថ្មីនោះ ក្រុមអ្នកវិភាគនយោបាយនៅកម្ពុជា បានព្យាករណ៍ថា វាមានផលវិជ្ជមានច្រើនក្នុងការដោះស្រាយបញ្ហាជម្លោះព្រំដែនខ្មែរ ថៃ ដែលអតីតរដ្ឋាភិបាលថៃ ដឹកនាំដោយលោក អាភិស៊ីត បានបរាជ័យក្នុងការដោះស្រាយបញ្ហាជម្លោះព្រំដែនជាមួយរដ្ឋាភិបាលកម្ពុជាជាច្រើនលើកមកនោះ។
បញ្ហាជម្លោះព្រំដែនខ្មែរថៃ តំបន់ប្រាសាទព្រះវិហារ ដែលបានកើតមានតាំងពីឆ្នាំ ២០០៨ មក នៅមិនទាន់ដោះស្រាយបញ្ចប់ជម្លោះនេះនៅឡើយទេ ហើយគេនឹងរង់ចាំមើលការដោះស្រាយបញ្ហានេះរវាងរដ្ឋាភិបាលថៃថ្មី និងរដ្ឋាភិបាលកម្ពុជា ថាតើភាគីថៃនឹងគោរពតាមការសម្រេចរបស់តុលាការយុត្តិធម៌អន្តរជាតិ លើការបកស្រាយជាថ្មីរបស់តុលាការយុត្តិធម៌មួយនេះដែរឬទេនៅពេលខាងមុខ៕
ពីវិទ្យុ អាស៊ីសេរី
No comments:
Post a Comment
yes