Thursday, October 6, 2011
សិង្ហបុរីគាំទ្រកម្ពុជាធ្វើជាប្រធានអាស៊ាននៅឆ្នាំ2012ខាងមុខ
លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោហ៊ុន សែន បានប្រាប់ឱ្យដឹងថា ក្នុងជំនួបសម្តែងការគួរសមជាមួយសម្តេចតេជោនាយករដ្ឋមន្ត្រីហ៊ុន សែន នារសៀលថ្ងៃទី៥ ខែតុលា នៅវិមានសន្តិភាព លោក ក-សានមូហ្គាម រដ្ឋមន្ត្រីក្រសួងការបរទេសនៃសាធារណរដ្ឋសិង្ហបុរីបានមានប្រសាសន៍ថា នេះជាដំណើរទស្សនកិច្ចលើកទី១របស់លោកមកកាន់កម្ពុជាក្នុងឋានៈជារដ្ឋមន្ត្រីការបរទេស។ លោកកត់សម្គាល់ឃើញថា រវាងកម្ពុជា និងសិង្ហបុរីកំពុងតែមានទំនាក់ទំនងល្អ។ គោលបំណងរបស់លោកមកកាន់កម្ពុជានៅពេលនេះគឺដើម្បីបន្តទំនាក់ទំនងល្អនេះ និងបញ្ជាក់នូវជំហរគាំទ្រយ៉ាងពេញទំហឹងរបស់សិង្ហបុរីដល់កម្ពុជាធ្វើជាប្រធានអាស៊ាននៅឆ្នាំ២០១២ខាងមុខនេះ។
លោកមានប្រសាសន៍ថា លោកបានជួបពិភាក្សាជាមួយលោកឧបនាយករដ្ឋមន្ត្រីហោ ណាំហុង ហើយក្នុងកិច្ចពិភាក្សានេះផ្តោតទៅលើការជំរុញកិច្ចសហប្រតិបត្តិការលើវិស័យកសិកម្ម ជាពិសេសការវិនិយោគទៅលើការកែច្នៃអង្ករសម្រាប់នាំចេញ។
ជាការឆ្លើយតបសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីមានប្រសាសន៍ថា សម្តេចបានសង្កេតឃើញមានប្រជាជនកម្ពុជាជាច្រើនធ្វើដំណើរទៅសិង្ហបុរី ហើយទីនោះមានបំរើផ្នែកសុខភាពដល់ប្រជាជនកម្ពុជាផងដែរ ។ នេះគឺឆ្លុះបញ្ចាំងអំពីទំនាក់ទំនងល្អរវាងប្រទេសយើងទាំងពីរ ។
ពាក់ព័ន្ធនឹងការវិនិយោគលើវិស័យកែច្នៃ ផលិតផលកសិកម្ម ជាពិសេសអង្ករ សម្តេចតេជោនាយករដ្ឋមន្ត្រីមានប្រសាសន៍ថា កម្ពុជាឆ្នាំនេះទោះបីមានទឹកជំនន់ក្តី អាចនៅមានស្រូវប្រមាណ៤លានតោនសម្រាប់នាំចេញ។ ទាំងនោះគឺជាសក្តានុពលមួយដែលសម្តេចចង់ឱ្យសិង្ហបុរីមកវិនិយោគលើការកែច្នៃផលិតផលស្រូវដើម្បីនាំចេញទៅប្រទេសក្រៅក៏ដូចជានាំចេញទៅប្រទេសសិង្ហបុរីផងដែរ ៕
ពីគេហទំព័រ៖ កោះសន្តិភាព
Subscribe to:
Post Comments (Atom)
No comments:
Post a Comment
yes