ទាហានសៀមបានបាញ់ពលរដ្ឋខ្មែរស្លាប់ម្នាក់និង៤នាក់ផ្សេងទៀតរបួស ខណៈដែលពួកគេឡើងភ្នំដងរែកស៊ីឈ្នួលកាប់និងអូសឈើគ្រញូង កាលពីរសៀលថ្ងៃទី២៣ តុលា ។ អ្នកដែលត្រូវបាញ់ស្លាប់ឈ្មោះស៊ី បឿន ភេទប្រុស អាយុ៣០ឆ្នាំ រីឯអ្នករងរបួស៤នាក់១-ឈ្មោះលី ប៊ី ភេទប្រុសអាយុ៣១ឆ្នាំ រងរបួសកំភួនដៃខាងស្តាំ និងស្មាខាងឆ្វេង ២-ឈ្មោះជិន មឿន ភេទប្រុស អាយុ៣០ឆ្នាំ រងរបួសភ្លៅខាងឆ្វេង និងស្មាខាងឆ្វេង ៣-ឈ្មោះឡាច រ៉ា ភេទប្រុស អាយុ៣៥ឆ្នាំ របួសភ្លៅខាងស្តាំ និង៤-ឈ្មោះសែន ចាន់ ភេទប្រុស អាយុ៣២ឆ្នាំ រងរបួសកំភួនជើង។ ទាំងអ្នកស្លាប់និងរបួស៣នាក់រស់នៅស្រុកបារាយណ៍ ខេត្តកំពង់ធំ និងអ្នករបួសម្នាក់រស់នៅស្រុកត្រពាំងប្រាសាទ ខេត្តឧត្តរមានជ័យ ។
ប្រជាពលរដ្ឋដែលរត់រួចពីការបាញ់ប្រហារពីសំណាក់ទាហានសៀមបានរៀបរាប់ឱ្យកោះសន្តិភាពដឹងថា មុនពេលកើតហេតុគឺក្រុមពួកគេមានគ្នាចំនួន១៦នាក់ ត្រូវបានឈ្មួញជួលឱ្យឡើងភ្នំដងរែកដើម្បីអូសឈើនិងកាប់ឈើគ្រញូងឱ្យពួកគេដោយឱ្យតម្លៃចាប់ពី១.៥០០ទៅ២.០០០ដុល្លារអាមេរិក ហើយក្រុមឈ្មួញបានចាត់ឱ្យមេការដែលធ្លាប់ស្គាល់ផ្លូវនិងភូមិសាស្ត្រនាំពួកចូលទៅចំណុចភូមិសំរោង ឃុំបាក់ដង ស្រុកឃុនហាន ខេត្តស៊ីសាកេត ស្ថិតក្នុងដីប្រទេសថៃ។ ប្រជាពលរដ្ឋទាំងនេះបានបញ្ជាក់ថា ពេលកំពុងតែអូសនិងកាប់ឈើគ្រញូងនៅវេលាម៉ោង៣រសៀលថ្ងៃទី២៣តុលា ស្រាប់តែក្រុមទាហានសៀមមកដល់បាញ់ស្រោចជា ច្រើនគ្រាប់មកលើ បណ្តាលឱ្យម្នាក់ស្លាប់បាត់បង់ជីវិតនៅនឹងកន្លែងកើតហេតុ ចំណែក៤នាក់ទៀតរងរបួសធ្ងន់ និងស្រាលបានរត់រួចទាំងត្រដាបត្រដួស និងត្រូវគេនាំយក ទៅសង្គ្រោះនៅមន្ទីរពេទ្យខេត្តសៀមរាបទាំងយប់ ។
លោកវណ្ណ កុសល អភិបាលស្រុកត្រពាំងប្រាសាទបានឱ្យកោះសន្តិភាពដឹងថា រឿងទាហានសៀមបាញ់ប្រជាពលរដ្ឋកម្ពុជានេះ មិនមែនជាលើកទី១ហើយជារឿងយូរឆ្នាំមកហើយ បើគិតពីអ្នកស្លាប់វិញគឺច្រើននាក់ ឯរងរបួសធ្ងន់ស្រាលរាប់រយនាក់ និងចាប់ខ្លួនក៏រាប់រយនាក់ ត្រូវគេនាំយកទៅដាក់ពន្ធនាគារក្នុងប្រទេស ថៃ ។ លោកអភិបាលស្រុកបានបញ្ជាក់ថា កន្លងមកគឺអាជ្ញាធរស្រុកត្រពាំងប្រាសាទតែងតែយកចិត្តទុកដាក់ចំណាយថវិកាចុះធ្វើការផ្សព្វផ្សាយដល់ប្រជាពលរដ្ឋក្នុងភូមិ-ឃុំនិងប្រជាពលរដ្ឋចំណាកស្រុកមកពីតាមបណ្តាខេត្ត-ក្រុងផ្សេងៗ ព្រមទាំងបានទប់ស្កាត់និងឃាត់ខ្លួននាំយកមកអប់រំ ហើយដោះលែងឱ្យទៅជួបជុំប្រពន្ធកូនវិញជាច្រើន លើកច្រើនសា។ ទោះបីជាយ៉ាងនេះក្តី ហេតុការណ៍នេះនៅតែកើតមានដដែល ។ ជាក់ស្តែងវេលាម៉ោង៣រសៀលថ្ងៃទី២៣តុលា កន្លងទៅនេះ មានប្រជាពលរដ្ឋមួយក្រុមបានឡើងទៅភ្នំដងរែក ស្ថិតនៅចំណុចផែនទីលេខ៣៥/៨៩ ក្នុងភូមិសាស្ត្រភូមិសំរោង ឃុំបាក់ដង ស្រុកឃុនហាន ខេត្តស៊ីសាកេត ប្រទេសថៃ នៅទល់មុខភូមិអភិវឌ្ឍន៍ឃុំអូរស្វាយ ស្រុកត្រពាំងប្រាសាទ ក៏ត្រូវក្រុមទាហានសៀមបាញ់ស្លាប់បាត់បង់ជីវិតម្នាក់ នៅកន្លែងកើតហេតុ។ រីឯមនុស្សចំនួន៤នាក់ទៀតរងរបួសធ្ងន់ស្រាលបាននាំយកទៅសង្គ្រោះនៅមន្ទីរពេទ្យខេត្តសៀម រាប ។ ចំណែកអ្នកឯទៀតបានរត់រួច ។
ហេតុការណ៍ថ្មីនេះ បានកើតឡើង៤ថ្ងៃប៉ុណ្ណោះ បន្ទាប់ពីសពពលរដ្ឋខ្មែរ៤នាក់ត្រូវបានភាគីសៀមប្រគល់ឱ្យក្រុមគ្រួសារវិញ តាមច្រកទ្វារព្រំដែនជាំសាង៉ាំ ។ ទោះបីជាបែបណា អ្វីដែលនៅពីក្រោយខ្នងប្រជាពលរដ្ឋទាំងនេះ គឺពួកឈ្មួញហាក់ដូចជាមិនអាចទប់ស្កាត់បានសោះ ក្រៅតែពីជួលមនុស្សឡើងភ្នំកាប់និងអូសឈើគ្រញូង ហើយត្រូវទាហានសៀមបាញ់សម្លាប់ជាបន្តបន្ទាប់ ។
កាលពីពេលកន្លងមកថ្មីៗនេះ អាជ្ញាធរស្រុកត្រពាំងប្រាសាទ បានទប់ស្កាត់ប្រជាពលរដ្ឋចំនួន៦៦នាក់ ស្ថិតក្នុងក្រុមផ្សេងៗគ្នាជាច្រើនក្រុមដែលបំរុងឡើងភ្នំសីុឈ្នួលកាប់ និងអូសឈើគ្រញូង ។ ទោះបីជាយា៉ងណាក្តី នៅតែមានអ្នកលួចប្រព្រឹត្តបែបនោះ ហើយទទួលរងគ្រោះថ្នាក់ដោយទាហានសៀមបាញ់ទាល់តែបាន៕
ពីគេហទំព័រ៖ កោះសន្តិភាព
No comments:
Post a Comment
yes