សពស្រ្តីវ័យក្មេងដែលត្រូវជនមិនស្គាល់មុខបាញ់សម្លាប់
ក្រោយពីកើតមានអំពើបាញ់ប្រហារស្ត្រីវ័យក្មេងម្នាក់ដែលគេស្គាល់ថាជាប្រពន្ធក្រោយរបស់បុរសអាណិកជនខ្មែររស់នៅប្រទេសញូវហ្សេឡែន នគរបាលព្រហ្មទណ្ឌកម្រិតធ្ងន់រាជធានីភ្នំពេញបានកោះហៅប្អូនជីដូនមួយបុរសអាណិកជននោះម្នាក់ គឺឈ្មោះអ៊ុន សំអាត អាយុ៤៨ឆ្នាំ ជាមន្ត្រីនគរបាលការិយាល័យប្រឆាំងគ្រឿងញៀនមកសាកសួរ ។
ការកោះហៅប្អូនជីដូនមួយអាណិកជនរូបនេះ ដោយសារនគរបាលព្រហ្មទណ្ឌសង្ស័យពាក់ព័ន្ធក្នុងអំពើឃាតកម្មបាញ់សម្លាប់ស្ត្រីវ័យក្មេងនៅក្នុងបរិវេណមណ្ឌលសុខភាពចំការដូង ស្ថិតក្នុងសង្កាត់ដង្កោ ខណ្ឌដង្កោ រាជធានីភ្នំពេញ ។ តាមប្រភពព័ត៌មានពីមន្ត្រីនគរបាលព្រហ្មទណ្ឌឱ្យដឹងថា លោកអ៊ុន សំអាត គ្រាន់តែត្រូវបានអញ្ជើញទៅសាកសួរ ឬជួយបំភ្លឺប៉ុណ្ណោះ មិនមែនជាការឃាត់ខ្លួននោះទេ ។ ការអញ្ជើញទៅសួរនាំនោះដោយសារលោកអ៊ុន សំអាត ត្រូវជាប្អូនជីដូនមួយលោកគឹម សំអុន អាណិកជនខ្មែរ រស់នៅប្រទេសញូវហ្សេឡែន និងត្រូវជាប្តីស្ត្រីវ័យក្មេងរងគ្រោះ ។
មន្ត្រីនគរបាលព្រហ្មទណ្ឌឱ្យដឹងទៀតថា បានជានគរបាលព្រហ្មទណ្ឌអញ្ជើញលោកសំអាត ទៅសាកសួរពីព្រោះលោកស្និទ្ធស្នាលជាមួយបងជីដូនមួយគឹម សំអុននោះ ។ ពិសេសទៅទៀត ពេលណាលោកគឹម សំអុន មកស្រុកខ្មែរម្តងៗ លោកអ៊ុន សំអាត តែងតែជូនដំណើរនិងមើលការខុសត្រូវជានិច្ច ម៉្លោះហើយការស៊ើបអង្កេតរបស់សមត្ថកិច្ចត្រូវតែស្រាវជ្រាវតាមរយៈអ្នកជិតដិត និងជនរងគ្រោះដើម្បីរកពន្លឺឈានទៅវែកមុខឃាតកពិត ។
ក្រោយពីសាកសួរជុំវិញករណីឃាតកម្មកំបាំងមុខនេះ លោកវរសេនីយ៍ទោជួន ណារិន្ទ ប្រធានការិយាល័យនគរបាលព្រហ្មទណ្ឌកម្រិតធ្ងន់អះអាងថា លោកអ៊ុន សំអាត ពុំមានពាក់ព័ន្ធនឹងរឿងបាញ់សម្លាប់ស្ត្រីវ័យក្មេងត្រូវជាប្រពន្ធចុងបងជីដូនមួយនោះទេ ដូច្នេះលោកអ៊ុន សំអាត ក៏មិនត្រូវបានឃាត់ខ្លួនដែរ ។ លោកជួន ណារិន្ទ បន្តទៀតថា ការិយាល័យជំនាញព្រហ្មទណ្ឌរបស់លោកកំពុងដុតដៃដុតជើងស្រាវជ្រាវរកឃាតកពិតឱ្យឃើញ ព្រោះការប្រព្រឹត្តអំពើអមនុស្សធម៌យ៉ាងចំហនេះមិនមែនមានផ្សែងអត់ភ្លើងនោះទេ ៕
ពីគេហទំព័រ៖ កោះសន្តិភាព
No comments:
Post a Comment
yes