យ៉ាងហោចណាស់មនុស្សប្រុស-ស្រីពីរនាក់បានស្លាប់បាត់បង់ជីវិត ដោយថ្មសំណង់រលំបាក់សង្កត់ និងស្រីម្នាក់ទៀតបានរងរបួសធ្ងន់ ខណៈពួកគេជាកម្មករសំណង់ និងមេជាងម្នាក់បានសាងសង់ជារបៀបស្តូប ឬអាចថា អគារធំមួយនៃរមណីយដ្ឋានលើខ្នងភ្នំសុពណ៌កាឡី ហើយស្រាប់តែសំណង់នោះរលំបាក់សង្កត់ពីលើ កាលពីវេលាម៉ោង៦ល្ងាចថ្ងៃទី៣ តុលា ២០១១ ស្ថិតក្នុងភូមិជ្រោយថ្ម ឃុំចំបក់ ស្រុកព្រែកប្រសព្វ។
សូមបញ្ជាក់ថា អគារសំណង់នេះ ស្ថិតក្នុងសួនច្បាររមណីយដ្ឋានជ្រោយថ្ម ជាកម្មសិទ្ធិរបស់ឈ្មោះឆាន់ វឌ្ឍនៈ ដែលប្រភពព័ត៌មានមួយបានប្រាប់ឱ្យដឹងថា ទីតាំងអគារថ្មដែលបានបាក់រលំដួលសង្កត់កម្មកររហូតស្លាប់នេះ ជាចេតិយរបស់មន្ត្រីថ្នាក់ដឹកនាំ ក្នុងជួររដ្ឋាភិបាលម្នាក់។ លោកស៊ុម សុឃីម អធិការស្រុកព្រែកប្រសព្វ បានឱ្យដឹងថា ជនរងគ្រោះដែលជួបហេតុការណ៍បាក់រលំសំណង់នេះគឺ ១-ឈ្មោះដា ភេទស្រី អាយុ២៧ឆ្នាំ មានទីលំនៅភូមិពណ្ណរាយ ក្រុងសួង ខេត្តកំពង់ចាម ជាកម្មករ ត្រូវឥដ្ឋរលំបាក់សង្កត់ បណ្តាលឱ្យរងរបួសធ្ងន់ និងត្រូវបានជួយកាយយកចេញ ដឹកទៅសង្គ្រោះបន្ទាន់នៅមន្ទីរពេទ្យបង្អែកស្រុកឆ្លូង ២-ឈ្មោះទិត ជឿន ភេទស្រី អាយុ៣២ឆ្នាំ ជាកម្មករសំណង់ និងទី៣-ឈ្មោះប្រាក់ ឃីម ភេទប្រុស អាយុ៥៨ឆ្នាំ ជាមេជាងចាក់បេតុង។ ជនរងគ្រោះទី២ និងទី៣នេះមានទីលំនៅក្រុងសួង ខេត្តកំពង់ចាម ត្រូវស្លាប់បាត់បង់ជីវិតដោយសារគ្រឿងសំណង់ និងដើមឈើបាក់រលំសង្កត់ពីលើ ជួយសង្គ្រោះមិនទាន់។
សូមបញ្ជាក់ថា ខណៈសំណង់នេះបាក់រលំគឺកម្មករជាង៧០នាក់ផ្សេងទៀតបាននាំគ្នាចេញទៅហូបបាយអស់ទៅហើយ នៅសល់តែ៣នាក់នេះតែប៉ុណ្ណោះ ។ អគារបាក់រលំអស់មួយសន្ទុះធំទៅហើយទើបអ្នកភូមិផ្អើលឆោឡោ និងឮដល់ពួកកម្មករដែលទៅហូបបាយមកជួយកាយរកឃើញស្ត្រីឈ្មោះដា នៅវេលាម៉ោង១២យប់ រងរបួសធ្ងន់ ហើយប្រញាប់នាំយកទៅសង្គ្រោះតែម្តង ចំណែក២នាក់ដែលស្លាប់នោះគឺដោយសាររកមិនទាន់ឃើញ រហូតដល់ព្រឹកស្អែក (ទី៤ តុលា) ទើបកាយបន្តទៀត និងបន្តរហូតដល់ម៉ោង៣រសៀល ថ្ងៃទី៤ តុលា ២០១១ ទើបរកឃើញសព។
លោកផុន ណារឹទ្ធ ជាមការសំណង់កើតហេតុខាងលើបានឱ្យដឹងតាមទូរស័ព្ទថា សំណង់មួយនេះមានកម្ពស់១២ម៉ែត្រ ទទឹង១៨ម៉ែត្រ គុណ២០ម៉ែត្រ និងកំពុងតែចាប់ផ្តើមរៀបឥដ្ឋ និងចាក់បេតុងរយៈពេល២ថ្ងៃជាប់ៗគ្នា ជាច្រើនម៉ែត្រការ៉េ និងមានកម្មករប្រុស ស្រីជាង៧០នាក់ មកធ្វើការងារនេះ ៕
ពីគេហទំព័រ៖ កោះសន្តិភាព
No comments:
Post a Comment
yes