ប្រជាពលរដ្ឋជាង១០០នាក់ជាជនជាតិដើមភាគតិចព្រៅ តំណាងឲ្យជនជាតិដើមរាប់រយគ្រួសាររស់នៅក្នុងភូមិច្រប់ ឃុំក្បាលរមាស ស្រុកសេសាន បានដាច់បាយដាច់ទឹក ខណៈនាំគ្នាទៅ តវ៉ាចំពោះ ក្រុមហ៊ុនសុភ័ក្កនីកា ដើម្បីរារាំងមិនឲ្យគ្រឿងចក្ររបស់ក្រុមហ៊ុននេះគាស់កាយឈូសឆាយដីជាកេរដូនតារបស់ពួកគាត់តាម ទំនៀមទម្លាប់ជនជាតិព្រៅ ដែលរក្សានូវការធ្វើស្រូវចម្ការវិលជុំ។
លោកអឿ មឿន មេភូមិច្រប់ បានថ្លែងថា ប្រជាពលរដ្ឋទាំងនេះបាននាំគ្នាមកតវ៉ាពីផលប៉ះពាល់ ដីធ្លី ជាមួយក្រុមហ៊ុន ព្រោះតែក្រុមហ៊ុនបានចុះកិច្ចសន្យាជាមួយរាជរដ្ឋាភិបាលលើដីសម្បទានសង្គម កិច្ច ហើយក្នុងនោះមានដីរបស់ជនជាតិដើមភាគតិចដែលតាមទំនៀមទម្លាប់ពីដូនតា គឺអាស្រ័យ ផលដំណាំវិលជុំ។
លោកស៊ុយ ជុំ ក្រុមប្រឹក្សាឃុំបានមានប្រសាសន៍ថា ចាប់តាំងពីថ្ងៃទី៨ តុលា រហូតមកដល់ពេលនេះនៅមិនទាន់បានដោះស្រាយជូនពួកគាត់ទេ ហើយក្រុមហ៊ុនបានបាញ់ថ្នាំក្រហមកាត់ស្រែប្រជាពលរដ្ឋធ្វើឱ្យពួកគាត់ព្រួយបារម្ភថា ក្រុមហ៊ុនបាញ់ថ្នាំត្រឹមណា គឺយកត្រឹមនោះ ដូច្នេះ ហើយពួក គាត់សុំឱ្យអាជ្ញាធរស្រុកជួយដោះស្រាយ ។ ចំណែកក្រុមហ៊ុនបានអះអាងថា ការបាញ់ថ្នាំក្រហមនេះគ្រាន់តែយកតាមគំនូសផែនទីប៉ុណ្ណោះ ឯចំពោះដីស្រែប្រជាពលរដ្ឋមិនប៉ះពាល់ឡើយ។ ខាងក្រុមហ៊ុនបានបញ្ជាក់ទៀតថា យើងយកផែនទីឆ្នាំ២០០៦ បានបង្ហាញថា ដីប្រជាពលរដ្ឋមាន៣៧៩ហិកតា ហើយក្រុមហ៊ុនបានកាត់ដីបន្ថែម៣៦ហិកតាទៀតឱ្យប្រជាពល រដ្ឋឯក្រៅពីនោះជារបស់ក្រុមហ៊ុន ។ ទោះបីជាមានការអះអាងបែបនេះក្តី ប៉ុន្តែក្រុមហ៊ុនបែរជាដាក់គ្រឿងចក្រគាស់កាយប៉ះពាល់ដល់ដីពួកគាត់ដដែល ។
បងប្អូនជនជាតិភាគតិចព្រៅ បានសំណូមពរដល់អាជ្ញាធរស្រុកក៏ដូចជាខេត្ត សូមមេត្តាជួយរកដំណោះស្រាយដើម្បីឲ្យពួកគាត់បានដីទាំងនោះ មកធ្វើស្រែចម្ការតតំណពីដូនតាទៅដល់កូនចៅជំនាន់ក្រោយទៀត ប្រសិនបើក្រុមហ៊ុនមិនយល់ព្រមទុកដីស្រែចម្ការឲ្យពួកគាត់ខ្លះដើម្បីអាស្រ័យផលដំណាំទេ មិនដឹងជាទៅធ្វើអ្វីទៀតបានឡើយ ព្រោះជនជាតិភាគតិចមានការយល់ដឹងតិចតួចក្នុងការជ្រើសរើសមុខរបរនាពេលបច្ចុប្បន្ន។
បងប្អូនជនជាតិភាគតិចទាំងនោះបាននិយាយប្រាប់កោះសន្តិភាពថា ពួកគាត់បានដាក់ពាក្យ បណ្តឹងទៅលោកមេឃុំ ដើម្បីឲ្យលោកពាំនាំឯកសារនៃការតវា៉នេះទៅដល់លោកអភិបាលស្រុក តែឯកសារទាំងនោះត្រូវលោកមេឃុំផ្អឹបទុកក្នុងផ្ទះរបស់គាត់រហូតមិនដឹងជាមានអ្វីលាក់បាំងទេ លុះក្រោយពីប្រជាពលរដ្ឋទាំងនោះបានធ្វើការតវា៉ជាច្រើនលើកច្រើនសាមក ដំណឹងនេះក៏ឮដល់លោកអភិបាលស្រុកនិងខេត្ត ហើយក្រុមគណៈបញ្ជាការឯកភាពនឹងចុះមកត្រួតពិនិត្យ តែមិន ដឹង ចុះនៅពេលណានៅឡើយទេ ។ ទោះជាយា៉ងណាមន្ត្រីខ្លះអះអាងថា ពេលវេលាដែលត្រូវចុះធ្វើការពិនិត្យ និងដោះស្រាយនោះ ទំនងជាធ្វើនៅក្រោយពីបញ្ចប់ពិធីបុណ្យនាប៉ុន្មានថ្ងៃខាងមុខនេះ ៕
ពីគេហទំព័រ៖ កោះសន្តិភាព
No comments:
Post a Comment
yes