លំនៅដ្ឋានពលរដ្ឋនៅក្រុងខេមរភូមិន្ទ ត្រូវអាជ្ញាធរខេត្តកោះកុងរុះរើកម្ទេច
កាលពីម្សិលមិញ
ភ្នំពេញៈ កម្លាំងប្រដាប់អាវុធចម្រុះបានផ្ទុះអាវុធនៅក្នុងប្រតិបត្តិការបន្តរុះរើផ្ទះប្រជាពលរដ្ឋជាង១០០ខ្នងបន្ថែមទៀត នៅភូមិ១ សង្កាត់ស្មាច់មានជ័យ ក្រុងខេមរភូមិន្ទ កាលពីម្សិលមិញ ។
ក្រុមអ្នកភូមិឲ្យដឹងថា កម្លាំងចម្រុះប្រមាណជិត៥០នាក់ ដែលចុះប្រតិបត្តិការបន្តរុះរើផ្ទះពលរដ្ឋ ម្សិលមិញបានបាញ់គំរាម ធ្វើឲ្យអ្នកភូមិភិតភ័យរត់ចែកជើងគ្នាខណៈផ្ទះជាង៤០ខ្នងត្រូវរុះរើបំផ្លាញខ្ទេចពីថ្ងៃអង្គារ និងបានឃាត់អ្នកភូមិម្នាក់ឲ្យធ្វើកិច្ចសន្យាផង មុននឹងដោះលែងវិញ។
អ្នកស្រី អ៊ុក ណេង ជាអ្នកភូមិម្នាក់ប្រាប់ថា អ្នកភូមិជាង៧០ នាក់ បានផ្តុំគ្នាខ្លះកាន់បដាពាក្យស្លោកនិងរូបថត លោកនាយករដ្ឋមន្ត្រី ហ៊ុន សែនផង បានរារាំងមិនឲ្យកម្លាំងចម្រុះចូលទៅរុះរើផ្ទះពួកគាត់ ប៉ុន្តែ នៅម៉ោងប្រហែល១០ព្រឹក អ្នកភូមិមិនអាចទប់ស្កាត់កងកម្លាំងទាំងនោះបានទេ ព្រោះតែគេគំរាមថា៖«បើអ្នកណាហ៊ានចូលមករារាំង គេនឹងបាញ់! ពេលនោះខ្ញុំឮសំឡេងគ្រាប់កាំភ្លើងពីរគ្រាប់ ក៏ធ្វើឲ្យអ្នកភូមិដែលឈរផ្តុំគ្នារត់ចែកជើងគ្នា ទាំងខ្ញុំទាំងគេ ប៉ុន្តែគ្រាប់កាំភ្លើងមិនបានបាញ់ត្រូវនរណាម្នាក់នោះទេ»។
អ្នកស្រី សំ សេរី អ្នកភូមិម្នាក់ទៀតអះអាងថា គាត់រស់នៅលើដីនេះជាង៥ឆ្នាំហើយ មានលិខិតស្នាមទទួលស្គាល់ពីអាជ្ញាធរមូលដ្ឋាន ជាមួយអ្នកភូមិប្រមាណ៤០គ្រួសារទៀត ប៉ុន្តែ រដ្ឋបាលព្រៃឈើចោទថា ពួកគាត់ទន្ទ្រានកាន់កាប់ដីរដ្ឋធ្វើឲ្យកើតការប្តឹងប្តល់គ្នាទៅតុលាការរហូតតុលាការចេញដីកាសម្រេចបណ្តោះអាសន្នជាប់គាំងដល់សព្វថ្ងៃ។ អ្នកស្រី បន្តថា នៅថ្ងៃទី២៥ ខែកុម្ភៈឆ្នាំនេះ អ្នកភូមិមានបញ្ហាដីធ្លីបានស្កាត់ទៅជួប និងប្រគល់លិខិតជូន លោក ហ៊ុន ម៉ាណែត ពេលលោកចុះសាកសួរសុខទុក្ខ និងសម្ពោធសមិទ្ធផលក្នុងខេត្តកោះកុងសុំឲ្យលោកជួយដោះស្រាយលោកក៏បានសន្យាថា កុំឲ្យពួកគាត់ព្រួយបារម្ភ គ្មានការរុះរើផ្ទះអីនោះទេ។
លោក ធូ វិបុល អភិបាលក្រុង ខេមរភូមិន្ទថ្លែងថា លោកបញ្ជូនកម្លាំងប៉ូលិស ប៉េអឹម តាមសំណើមន្ត្រីរដ្ឋបាលព្រៃឈើឲ្យជួយទប់ស្កាត់ការទន្ទ្រានយកដីរដ្ឋពីក្រុមអ្នកភូមិ។ លោកថា វាមិនមែនជាផ្ទះទេគឺគ្រាន់តែជាខ្ទមទើបសង់ថ្មី ក្រោយពីការសន្យារបស់លោក ហ៊ុន ម៉ាណែត ប៉ុណ្ណោះ។ លោកបន្តថា អ្នកភូមិជាប់ដីកាសម្រេចបណ្តោះអាសន្នរបស់តុលាការ ពួកគាត់ពុំមានបញ្ហាទេ«ប៉ុន្តែ មានអ្នកភូមិចំណូលថ្មី មានអ្នកបំផុសបំផុលនៅពីក្រោយ ចូលមកបង្កចលាចលចាប់យកដីព្រៃរដ្ឋបាលព្រៃឈើ»។ លោកក៏បដិសេធថា គ្មានការបាញ់គំរាមពលរដ្ឋទេ។
លោក ឱម មាក់ការី នាយខណ្ឌរដ្ឋបាលព្រៃឈើដងទង់បានឲ្យដឹងដែរថា ដោយអ្នកភូមិមានកាំបិត ដំបង ហើយរារាំងនិងវាយមកលើកម្លាំងចម្រុះ សមត្ថកិច្ច ក៏បានបាញ់ការពារខ្លួន។ លោកថា៖«វាគ្រាន់តែជាការបាញ់ឡើងលើទេ។ យើងកំពុងស្រាវជ្រាវចាប់ខ្លួនមេខ្យល់ ដែលញុះញង់ឲ្យពលរដ្ឋទិញលក់ដីរដ្ឋ ខណៈយើងកំពុងពន្យល់អ្នកភូមិឲ្យយល់ ហើយធ្វើការរុះរើខ្ទមនោះដោយខ្លួនឯង ចេញពីដីរបស់រដ្ឋ»។
លោក អ៊ិន គង់ជិត មន្ត្រីស៊ើបអង្កេតសិទ្ធិមនុស្សលីកាដូ ខេត្តកោះកុង ឲ្យដឹងថា ទំនាស់ដីមាន ៣៦ហិកតា រដ្ឋបាលព្រៃឈើកំពុងដាំដើមអាកាស្យា តែពលរដ្ឋថា គ្មានផ្ទះសម្បែងនិងដីធ្លីបានចូលទៅសង់ផ្ទះ ក្រោយពីបានដាក់លិខិតជូនលោក ហ៊ុន ម៉ាណែត កាលពីថ្ងៃទី២៥ កុម្ភៈ។
ប៉ុន្តែលោក ឱម មាក់ការី តបថា បើពួកគាត់អត់ដីនៅ គាត់អាចស្នើអាជ្ញាធរមូលដ្ឋានឲ្យស្នើបន្តមកខេត្តឲ្យរកដីសម្បទានសង្គមកិច្ចណាមួយជូនពួកគាត់ មិនត្រូវដើរទន្ទ្រានកាន់កាប់ដីរបស់រដ្ឋដោយខុសច្បាប់នោះទេ៕
No comments:
Post a Comment
yes